رۆزەرین کەمانگەرە، ئەنڎامەو کۆمیتەو پەیوەنڎییەکا گلېرگەو ژەنا ئازاڎیی ۋەرکەوتوو کوردسانی (کەژار)ی جە چەمپنەکۊتەیېنە چنی ئاژانسوو ژنهای ئاماژەش پا هۊرسەنگنا کەرڎ کە سەبارەڎ بە لایەنە جۆر بەجۊرەکا ئاخېزوو ''ژەنۍ، ژیای، ئازاڎیی''نە جە ۋەرکەوتوو کوردسانی و ئێرانی، جە ماوەو یەک ساڵی ۋیەرڎەینە کریېنۍ و ۋاتش: "ئی سەرهۊردایە پېسە ئاخېزېوە پێناسە کریان و بە ئاخېزوو ''ژەنۍ، ژیای، ئازاڎیی'' بەنامۍ کریان. واتە فاڕیای و هۊرچەرخنایۍ دەروونی و کولتووری ڕووەشدا، کە گرڎوو گلېرگەیش گېرتەنۊ. مەڵامەتو و سەرمەشقی ئی فاڕیا و ئاخېزیە ئەقڵی و دەروونییەیچ خودوو ژەنا ۋېشا بېنۍ، کە جە ماوەو یەک ساڵی ۋیەرڎەینە سەرمەشقیشا کەرڎەن.

کەمانگەرە جەبارەو ئامانج و مەڵامەتەکا ڕووەدای ئاخېزوو ''ژەنۍ، ژیای، ئازاڎیی''نە ۋاتش: "جە سەرەتاکا ئاخېزینە باس چانەی کریۍ، کە چېش بی بە مەڵامەتوو ئانەی ئی ئاخېزە ڕووە بڎۊ، فرە گرنا ۋەنایۊ پۍ ئاخېزی کریۊ، چونکی دماو ئانەی متاومۍ ئەنجامێوە عال جە بارەو ئاخېزیۊ وزمۍ ڕووە. چوونکی گرڎوو گلېرگەی یاوابۍ ئا ئەنجامەی دماو ئازاڎیی ژەنا، متاویۊ باس جە ئازاڎیی گلېرگەی کریۊ. چا چوارچێوەیچەنە جە ماوەو ئی یەک ساڵەینە هەم ژەنا و هەمیچ گلېرگە درێژەشا بە کۊشیای و چالاکییەکاشا دان. جە ماوەو یەک ساڵی ۋیەرڎەینە، قۊرتۍ و پەرسەکۍ تایبەت بە ژەنا نەتەنیا چارەسەر نەکریېنۍ، بەڵکم ئاژەکە فرە قورستەر بیەن و سنووردارکەرڎەی ژەنا و هجومی دوژمنکارانە پۍ سەریشا زیاڎش کەرڎەن.

دەسەڵات ڕووبەڕوو جیلېوەن کە ئاماڎە نییا ملکەچ کەرۊ و بە دەنگێوە بەرز بە دەسەڵاتی ماچۊ نا

ڕۆزەرین کەمانگەرە، سەرنجش وست سەرو چڕکەرڎەیۊ حۊڵەکا دەوڵەتوو ئێرانی پۍ سەرکوتکەرڎەی ژەنا و ئاخېزوو ''ژەنۍ، ژیای، ئازاڎیی''و  ۋاتش: جە ماوەو ١١ مانگا ۋیەرڎەینە، دەسەڵاتی دیکتاتۆری ئێرانی پۍ لەحزېوەیچ وازش جە کردەوە و هەڵسوکۊتەکاش دژ بە ژەنا نارڎەن و حەر جە سەرەتاوە هجومش کەرڎ سەروو کناچە خۊنەرا و زانشتگەکېش تەوقەدۍ و بە شێوازی جیاجیا جە جاڎەکاوە تا یانەکا، جە ۋەننگەکاوە تا زانشتگەکا، جە دەگاوە تا شارەکا، هجومشا کەرڎ سەرشا و گېرتەیشا یاۋنا بە بەرزتەرین ئاست.

ڕۊشنشکەرڎۊ، خۊنکارەکۍ زانشتگەی جە ماوەو ئا ١١ مانگەینە ئەرک و ۋەرپرسیاریشا گېرتەن ئەستۊ، پەی ئېستەیۊ حەقیقەتی و ڕاسی، کە جە ماوەو ٤٠ ساڵی ۋیەرڎەینە کەمتەر هامشېوەش ۋینیان. ئینە جیا چانەی کناچە خۊنکارۍ عمر ١٣ ساڵ بەرەوسەرېما ۋینۍ، کە ڕووبەڕوو هجومی کیمیاۋیی دەسەڵاتی پۍ سەروو ۋەننگەکاشا بیېوە، ئینۍ جیلېوەنۍ کە ملکەچوو دەسەڵاتی مەبا و بە دەنگێوە بەرز پنەش ماچا سەرمەشقی کۊشیای کەرا.

ۋیریچش ئارڎۊ، جە ماوەو یەک ساڵی ۋیەرڎەینە حەرپېسە چنی دەسەڵات حیچ ئەنجامێوەش جە هجومە کیمیاۋییەکا پۍ سەروو ۋەننگەکا کناچا بەدەس نارد، بە هەمان شێوەیچ نەتاواش جەڕاو زیاڎکەرڎەی ژمارەو جە داردایۊ خەڵکی چەم تەرس کەرۊ.

کەمانگەرە هەرپاسە ئینا جا قەناعەتەنە، ئاویرکەوتەیۊ دارسانەکاو زاگرۊسینە وەرکەوتوو کوردسانینە، کە ڕووبەرێوە وەرفراوانش گێرتەنۊ "پلانەش پەی مجیێنەرە و ئەنجاموو تاوانەکاو دەوڵەتوو ئێرانین پەی بۊ ڕووبەرووبییەیوە شۊڕشوو 'ژەنی، ژیوای، ئازادی' ڕووەش دێنە" و واتش: ماوەو یەک ساڵی ویەرڎەینە، جگە جە گلێرگەی، دیما کە چنڎین جارۍ ژیوگەیچ کریا ئامانج و ئینۍ هەوانتۍ نییەنۍ، بەتایبەتی کوردستاننە کە گردوو دارسانەکاو زاگرۊسی ئینۍ دلۍ ئاویرینە و سۊچا. دەسەڵات هجوومش کەرد سەروو ئا یاگا کە کە خەڵکەکەش ڕۊحوو نیشتمانپەروەرییشا هەن.

"ئی شۊڕشە پەشتقایما بە ئیرادەی جەوهەری و هێزوو خەڵکی"

ئا ئەندامەو کۊمیتەو پەیوەندییەکاو کەژاری باسوو ئانەیچش کەرد، "وەختێوە دەسەڵات جە ڕاوە بەیاگەیاونای سزاو قەنارەدایۊ نەتاواش بیاوۊ ئەنجامێوە، فشارەکێش پەی سەروو ئەدایا و بنەیانەو گیانبەختکەرڎا هەسۍ کەرڎێوە "ئانەیچش بە تەرسەو دەسەڵاتی جە شوڕشی گەڕاندەوە و واتش: بەشڎاریی سەرجەموو چینەکا جە ٧ ساڵیوە تا ٧٠ ساڵی، جە شۊڕشنە نیشانۍ هۊشیاریی گلێرگەینە و پا مانۍ مۍ، کە ئی شۊڕشە پەشتیش بە ئیرادەی جەوهەری و هێزوو خەڵکی بەستێنە.

هاموەخت پێسە خاڵێوە تەرێچ ئاماژەش بە یۊگێرتەیی گەلاو ئێرانی سەرجەموو شار و پارێزگاکانە کەرد و جەختش چانەیە کەرڎۊ، کە یۊگێرتەیی فاکتەرێوە فرە گرنگا و متاوۊ پاشەکشۍ بە دەسەڵاتی کەرۊ. 

"ئێمە یۊبییەی و یەکڕیزیی ژەنا بە بنەما گێرمێ"

ڕۊزەرین کەمانگەرە جەختش جە یۊبییەی و یەکڕیزیی ژەنا کەرڎۊ واتش: بە درێژایی یەک ساڵی وەڵینی بوار پەی چالاکیی هامبەشی ڕەخسیان و کەژاریچش پا ئاراستەرە چنڎین چالاکیێش کەرڎێنۍ، تاوانش پەیوەندیی چەنی بەشێوە فرەو ژەنا ساز کەرۊ، کۊدەنگی چی بارەوە یەکجار گرنگا و ئێمە یۊبییەی و یەکڕیزیی ژەنا بە بنەما گێرمۍ.

کەمانگەرە واتیچش، "وێبەساعیبزانای ونەو گەشمەرڎا یەکجار گرنگا و ژەنێچ، کە پەی ئامایدیی ئامانجەکاشا بە گرد نۊعێوە قوربانییشا دان و کریێنۍ ئامانج، پەنەوازا ڕێکوزیاتەر جوویاوە و پەرسەو یۊگێرتەیی ژەنایچ چی بوارەنە پەرسێوە یەکجار گرنگەنە"

"شۊڕشوو ژەنی، ژیوای، ئازادی بییەن بە هومێدێوە  پەی سەرجەموو ژەناو دنیێ"

ئا ئەندامۍ کەژاری واتەنیچش، "جە یەک ساڵی ویەرڎەنە سەروو ئاستوو وەڵاتاو وەرنیشتیچۊ، وەرکەوتوو دلێڕاسەی و ئێران چالاکیۍ فرەڕەنگۍ کریۍ و شۊڕشوو 'ژەنی، ژیوای، ئازادی'یچ بە گردوو ژەناو دنیێش نیشانە دا،  کە ژەنی ئێراننە هۊشیارێنۍ و ئینەیچە هومێدش بە گردوو ژەنا بەخشان. کەژاریچ ڕێکوزیاێوە ورقوڵیاو ئی گلێرگەینە و چالاکییەکێش پێوەسێنۍ بە وەرکەوتوو کوردستانیوە و ئێرانیوە. بە درێژایی ئی یەک ساڵەیچە جە کییەیۊ، کۊڕ و چالاکییە جیاجیایەکانە، کە کریێنۍ هەوڵێما دێنۍ، بیمۍ بە دەنگوو ژەناو ئێرانی و قسەکاما بارەو پەروەرڎەی و یەکڕیزی و.... هتد، کەرمۍ بە هەرمانە و هەنگامەما نیێنە..

رۊزەرین کەمانگەرە ئاخریچۊ جەختش وەنەو چالاکیەکاو کەژاری کەرڎۊ جە پەیوەندیشنە چەنی کۊشیای ژەنا و واتش، چێگەوە ئەرەیاونووش سەرجەموو ئا ژەنا دڵشا پەی ئازادیی مدۊ وەنە، کۊشیا و گیان بەخشا پەیش، ئێمە شانە بە شانەشا مردمۍ و باوشەو کەژاری پەیشا کریێوەنە.

هـ.ش / س.ز