وێرەگاو هیزی، شاروو کەرکووکوو پانیشتوو کوردستانینە، پەی هاندای پەی وەنای و پەشتیوانی جە تەلەبا و زارۊڵاو گەشمەرڎا و بۍ ئەداوتاتا و کەمدەرامەتا، کۊمەڵەو هێڤی پەی پەشتیوانیی قوربانییاو جەنگی سەرۍ مەکتەبەکاو خانزادوو کناچا و بەرڎەقارەمانی تێکەڵاویشدا، کە میانەو سەرڎاکەیشانە پەنەوازییەکاو مەکتەبیشا پەی  ٨٠ تەلەباو شاروو کەرکووکی ئارڎێبێنۍ تەلەبەکێچ زارۊڵاو گەشمەرڎا و بۍ ئەداوتاتا و کەمدەرامەتۍ بێنۍ.  

دەسوو ئاشتی بەرز کەرمێوە پەی پێوەرەژیوای  

 سەرڎایەکەینە، عەبدولوهاب ئەحمەد ئەنداموو کۊمەڵەو هێڤی پەی پەشتیوانیی قوربانییاو جەنگی، قسێش پەی تەلەبا کەرڎۍ و واتش: "ئێمە پێسە کۊمەڵەو هێڤی پەی پەشتیوانیی قوربانییاو جەنگی ئامێنمۍ سەرێتا دەیمۍ پێسە زارۊڵاو ئی گلێرگەیە، بێگومان  گردما ئاستوو گلێرگەو وێمانە جەنگیەخێش گێرتێنمۍ، پەوکای مشۊم گردما نەعلەتە ئۊو جەنگی کەرمۍ و دەسوو ئاشتی بەرز کەرمێوە پەی پێوەرەژیوای، چونکوم جەنگ سەبەبوو دلێنەبەرڎەی ئینسانی و ژیوگەی و کەمئەندامکەرڎەی ئینسانین".

ئاواتوو ئێمە گلێرگێوە هۊشیار و ڕۊشنویرا

هەرپاسە عەبدولوهاب ئەحمەد پەی تەبا ئەرەیاونایچش: "داواکارنا هەوڵۍ دەیذۍ پەی سەرکەوتەی واناکەیتانە و مەکتەبنە و یانەیچەنە دایمە تەبۍ و کۊکۍ بیدۍ و هامکارۍ یۊترینی بیدۍ تا بتاومۍ سەرۍ گنمۍ جە بەدەسئارڎەی ئاشتی و پێوەژیواینە، دروشموو ئێمە کۊشیای، سەرکەوتەی، ئاشتی و برایەتیین، یاواین بە ئاواتەکاو وێما جە ڕاو گلێرگێوە هۊشیاری و ڕۊشنویریوە".