جمیەروو ژەناو کوردی ئەورووپانە (تەژەکە-ئە) حەوتەم کۊنگرەو وێش بە بەشداریی نوێنەراو ڕێکوزیایە چەترئاساکا، جە حەوت وەڵات و ڕێکوزیایەکاو سەرجەموو پارچەکاو کورڎسانینە ساز کەرد. ئەنجامنامەو کۊنگرەکەیچ ئەرەیاونیا.
تەژەکە-ئە بەینوو ٣٠ حوزەیرانی و ٣ تەمووزینە بە بەشداریی نوێنەراو ڕێکوزیا چەترئاساکا جە ٧ وەڵاتانە، ڕێکوزیایەکاو چوار پارچەو کورڎسان، ڕێکوزیایەکاو سەر بە ئایین و باوەڕەکا، لوجنەکاو هەرمانۍ و ڕێکوزیایە جیاجیایەکا، بە ئامادەبییەی زیادتەر جە١٠٠ نوێنەرا کۊنگرەو حەوتەموو وێش بەستش.
کۊنگرەکە بە دروشموو 'بە ژەنی، ژیوای، ئازاڎییوە بەرەو شۊڕشوو ژەنۍ هەنگامە منیەیمێ' ساز کریا. کۊنگرەکە پێشکەش بە ئەڤین گۊیۍ کریا، کە ٢٣ کانوونوو یووەموو ٢٠٢٢ پاریسنە تیرۊرە کریا.
پلانسازیی وەرەچەم و بەرجەسە
ئەنجامنامەو کۊنگرەکەی بە ئەرەیاوناێوە ئاشکرا کریا. جە ئەنجامنامەکەنە ئەرەیاونیان، کە کۊنگرەکەنە گۊشەگیری تندکریاو سەروو ڕابەروو گەلوو کوردی عەبدوڵا ئۊجالان پێسە تەوەرێوە سەرەکی سەرشۊ مردیا و گۊشەگیری سەروو ئۊجالانی پێسە ئەوەڵوو سیاسەتو کۊکوشی جە دژوو گەلوو کوردی ورسەنگنیا. ئانەیچە وزیا ڕووە، کە ژەناو کوردی پا سیاسەتا نامێنێرە و نمەیایچرە و ڕەتیچش کەراوە و ئانەیچ وزیا ڕووە، کە "وەفاداریی ڕاس و درووس پەی ڕابەرایەتی پانەی کریۊ، کە بەدروسی یاومێشنە و بە هەرمانەش پەنە کەرمێ".
جە ئەنجامنامەکەنە ئامان: "مشۊم جە ٢٥ ساڵەشنە سیستموو ئەشکەنجەو ئیمراڵی ورشنیۊوە و ئازاڎیی جەستەیی ڕابەریما مسۊگەر کەرمۍ. ئێمە پێسە تەژەکە-ئە مسۊگەرکەرڎەی ئازاڎیی جەستەیی ڕابەر ئاپۊی، پێسە پەرسۍ و بابەتوو بییەی و جەوهەروو وێما وینمۍ، پەوکای جە چوارچووەو 'هەڵمەتەو وەخت وەختوو ئازاڎیین' هەرمانە و چالاکییەکا پەی ئازاڎیی ڕابەرایەتی بە هەرمانە و چالاکیی سەرەکیی وێما منیەیمێرە. سەروو ئابنەمێچە کۊنگرەو حەوتەمینە قەرار دریا کە تا مسۊگەرکەرڎەی ئازاڎیی جەستەیی، زیادتەر گوڕ بە کۊشیای بدەیمۍ، هەرپاسە پەی ئانەی فەلسەفەو ئازاڎیی ڕابەر ئاپۊی بیاونمۍ ژەناو کوردی، سەروو بنەماو هۊشیاریی گلێرگەی و برەودای بە ڕێکوستەی ژەنا، پلانەی بەرجەستۍ نریارە".
قوەدای بە کۊشیای
جە ئەنجامنامەکەنە ئامان کە یۊ جە بابەتە گەرم و بنچینەییەکاو کۊنگرەی کۊشیاین دژوو سیستموو فاشیستی ئاکەپە-مەهەپەی و ئاماژە بە هجوومە وەرفراوانەکاو ساڵۍ ویەرڎی ئاکەپە-مەهەپەی جە دژوو ژەنا، گەلوو کوردی و بەتایبەتی هجوومە وەروەڵایەکا پەی سەروو هەرێمەکاو پارێزنای مێدیای بە چەکی کیمیاوی و قەدەغەکریای دریا.
جە ئەنجامنامەکەنە ئامان: "جە کۊنگرەو حەوتەمیمانە دژوو هجوومە ئەرەگیرییەکا و سیاسەتی فاشیستوو ئاکەپە-مەهەپەی کە دوژمنوو ژەنان، خاڵەی گرنگە دەسنیشانە کریا و ئاڕاستەو قوەدای بە کۊشیای وزیا ڕووە".
شۊڕشوو ژەنا
بە پاو ئەنجامنامەکەی یۊ جە بابەتە سەرەکییەکاو ڕۊی جە حەوتەم کۊنگرەنە بابەتوو 'بە ژەنی، ژیوای، ئازاڎییوە بەرەو شۊڕشوو ژەنا هەنگامە منیەیمێ' بۍ. جە ئەنجامنامەکەیچنە ئامان، کە جە کۊنگرەکەنە ئانە دەسنیشان کریان کە سەنگەرەکاو ئازاڎیی، ئیساتۍ متاویا بە شۊڕشوو ژەنا تاجدارۍ کریا و پاگێرتەیرە سەروو بەیاگەیاونای هەڵمەتەکۍ جەختش سەرۊ کریاوە. باسوو ئانەیچە کریان، "پەوکای قەرار دریان، کە ئا هەڵمەتۍ جە مەیدانی کۊمەڵایەتی و گردوو مەیدانەکانە، کە جمیەروو ژەنا دلێشەنە وەڵۍ بیێنیوە و پەیوەندی چەنی مەیدان و ناوەندە جیهانییەکا قەوەت کریۊ، وەروو ئانەیچە توانێکۍ وزیا ئامادەباشییوە و کۊشیای پا مەرامۊ، قەرارڎاری و کاریگەرانە بلۊ ڕاوە".
هەر جە ئەنجامنامەکەنە ئامان، کە پێسە تەژەکە-ئەی ئانەشا پەی وێشا بە سەرەکیتەرین وەرپەرسبییەی نیانرە، کە ئاستی ئایدۊلۊژیکی، ئەزموونی پراتیکی و ئاستوو ڕێکوزیای ژەناو کوردی و ژەناو گەلای تەری وەڵا کەراوە، جە دژوو سیستمی تاتەسالاری کەراش بە بنەماو کۊشیای و ئانەیچە وزیان ڕووە: "پەوکای وەروو ئانەیە فۊرمولوو 'ژەنی، ژیوای، ئازاڎی' بە شێوازی ئارڎەینەرانەی و ورچەرخیای و یۊگێرتەیی بیاوناش بە گردوو ژەنا، قەراری ستراتیژیما دا. جە کورڎسانۊ تا گردوو یاگەکاو دنیۍ پەی چەپسنای سیستموو کۊنفیدڕاڵیزموو ژەنا، پەی وێپاریزنای و وێڕاوەڕێوەبەریی ژەنا، ئانەما پەی وێما کەرڎەن بە ئامانجێوە سەرەکی، کە هەرمانێوە هامبەشە چەنی ژەناو دنیۍ بەرمۍ ڕاوە".
درێژەو ئەنجامنامەکەینە ئاماژە بە گرنگیی پەروەرڎەی کریان و وچیان: "کۊنگرەو حەوتەمیما هەڵمەتەو 'بە ژەنی، ژیوای، ئازاڎی شۊڕشوو ژەنا بەرەو سەرکەوتەی بەرمێ' سەروو بنەماو ئامادەباشیی پەروەرڎەی پێسە هەرمانێوە بنەڕەتیۍ ورشسەنگنمێ".
جمیەری کۊمەڵایەتی
جە ئەنجامنامەکەنە ئانە وزیان ڕووە، کە تەژەکە-ئە جمیەرێوە کۊمەڵایەتین، زیادتەر پەی ژەنا ئشناسنامێوە ڕێکوزیان و ئانەیچە ئامان، " سەروو بنەماو هەرمانەکاو ئەرەمەرزنایما، ئانە وزیا ڕووە، کە گرد هەرێمێوە بە پاو هەلومەرجوو وەرەچەموو وێش وێش ڕێک وزۊ سەروو بنەماو قەراری هامبەشی، با ئیرادەی هامبەشی کەرۊ بە هەرمانە".
ئامادەباشی ڕێکخستنی
جە ئەنجامنامەکەنە ئامان، کە پێسە تەژەکە-ئەی سەروو بناغەو پاڕادایموو دیموکراتیک، ئیکۊلۊژیک، ئازاڎیپارێزنیی ژەنۍ پەشتی بە سیستمێوە بەسا کە هۊشمەندی، ڕەنج، هونەر و هێزوو ژەنێش کەرڎەن بە بنچینە، کە کۊنگرەکەنە کێشە پراتیکی و کرڎارییەکۍ بە پاو ئا ڕاسییە ورسەنگنیێنۍ. جە درێژەشنە ئامان، "ئامادەباشیی ڕێکوستەی کە جە کۊنگرەکاو وەڵێنە دەسمان پەنە کەرڎەبۍ، پەی سەرڎەمی تازەی پیسە هەمیشەیۍ ورسەنگنیۍ. بە دروشموو 'مشۊم گرد ژەنێوە ڕێک وزی، وێش ڕێک وزی' تا ژەنی یانەنە گەڕەکەنە و شارەکانە قەوەتۍ کریا، قەرارۍ وەرەچەمۍ دریا".
جە ئەنجامنامەکەنە ئاماژە پانەیچە کریان، کە هەرمانەکاو بونیادنیای بە ڕۊحوو ئامادەباشی و سەفەربەرییوە بریا ڕاوە.
ئاخرەکەیچۊ ئانە وزیان ڕووە: "کۊنگرەو حەوتەموو تەژەکە-ئەی، کە جە وەختێوە تاریخینە بەسیا، بە پاگێرتەیرەی و پلانسازیی وەرفراوانۊ پەی بونیادنیای شۊڕشوو ژەنۍ، دەسەبەرکەرڎەی ئازاڎیی گەلوو کوردی ساز کریان. پەی سەر وستەی ئی قۊناغەو کۊشیای تاریخی، کە ڕەوتوو تاریخی فاڕۊ، قەرارڎاری و پاگێرتەیرەی وێش بەروست. قۊناغی وەڵین جارێوە تەر ئانەش نیشانە دا، کە کۊشیاێوە بە ئەوین، جۊشوخرۊش، وەشەسیای، بڕوا و پاگێرتەیرەوە سەرگنۊ. فرسەت و هێزما هەن، کە سەرکەوتەی گەورەتەر تێکەڵ بە قۊناغەکەی کەرمۍ.
سەروو ئا بنەمێوە، سەروو بنچینەو ئایدۊلۊژیاو ئازاڎیی ژەنۍ، ئێمە بە گیان و مەژگی هامبەش پەرە بە کۊشیای مدەیمۍ، بە ژەنی، ژیوای، ئازاڎی بەرەو شۊڕشوو ژەنۍ هەنگامە منیەیمۍ".
س.ز
