کەنەکە بە ڕۊحوو مدرامانوو کۊبانۍ، وێتا بە ساعیبوو وەرنیشتی بزاندۍ
کەنەکە، داوا وەنەو گرد لاێوە کەرۊ، کە بە ڕۊحوو مدرامانوو کۊبانێوە وێتا بە ساعیبوو وەرنیشتوو کوردستانی بزاندۍ، چونکوم پارێزنای وەرنیشتی بە ماناو وێبەساعیبزانای گردوو کوردستانی مۍ.
ماوەی یەرۍ ڕوان دەوڵەتوو تورکی ئەرەگیری هجوومێوە عاسمانیی هەسش پەی سەروو وەرنیشتوو کوردستانی دەس پەنە کەرڎەن، چێرخانی ئابووری و سەرچەمەکاو ژیوای و مەنتێقە مەدەنییەکا بۊردومان کەرۊ، چا بارەوە کۊنگرەو نەتەوەیی کوردستانی (کەنەکە) ئەرەیاوناێوەش وەڵا کەرڎۊ.
ئەرەیاوناکەی کەنەکەینە ئامان، "دەوڵەتوو تورکی چا هجوومانە گردوو پیمەرە ئینسانی و یاساییەکا پاشێل کەرۊ، کە سەرجەموو بنکە و ناوەندەکا چێرخانی ئابووری و سەرچەمەکاو ژیوای خەڵکی، بە ئامانج گێرۊ، بە پاو یاسا میاننەتەوەییەکا دەوڵەتوو تورکی تاوانی جەنگی و دژەئینسانی کەرۊ".
کەنەکە ئانەیچشە ئەرەیاونان، "ئی هجوومۍ چی وەختانە ڕێککەوتۍ نییەنۍ و بەڵکوم پلانەشا پەی مجیێنەرە، کە هاموەختا چەنی ساڵڕۊو دەسپەنەکەرڎەی پیلانگێڵنیی میاننەتەوەیی ساڵەو ١٩٩٨ و هجوومکەرڎەی سەروو کۊبانۍ و مدرامانوو کۊبانۍ، جارێوە تەر دماو نۊ ساڵا هێزەکاو ئەرڎۊغانی هجوومشا دەس پەنە کەرڎەن، پەوکای ئینە ڕێککەوت نییا و درێژەپەنەدەروو هجوومەکاو داعشین".
بەشێوە تەروو ئەرەیاونایەکەو کەنەکەینە ئامان، "ئیساتۍ هێزەکاو یەپەگەی و یەپەژەی و خەڵكوو وەرنیشتی گرد لێوە جوابوو هجوومەکاو ئەرەگیرا مداوە، مەبۊ وەرنیشت بە تەنیا جیا بازییۊ و مشۊم پارێزگارییش وەنە کرییۊ، چونکوم وەرگێریکەرڎەی یی جە وەرنیشتی، وەەرگێریین جە کوردستانی، پێویسا بە ڕۊحوو مدرامانوو کۊبانێوە هاگاما جە وەرنیشتی بۊ".
ئاخرۊ کەنەکە ئاماژەش کەرڎەن، "ئێمە پێسەو کەنەکەی پارێزنای وەرنیشتی پێسە هاگابییەی جە گردوو کوردستانی وینمی، دەوڵەتوو تورکی و گردوو هامبەشەکاش بەتندی سەرکۊنە و شەرمەزار کەرمۍ، ئێمە داوا جە هێزە میاننەتەوەییەکا کەرمۍ و ماچمێ: چەمۍ جە هجوومەکاو دەوڵەتوو تورکی مەپۊشدۍ و وەراوەروو ئا هجوومانە بێدەنگۍ مەبیدۍ، جگە چانەیچە دەسوەشی و سڵام جە مدرامانوو هێزەکاو وەرنیشتی، هێزەکاو یەپەگەی و یەپەژەی، هێزەکاو قەسەدەی، وێڕاوەبەری و خەڵکوو وەرنیشتی کەرمۍ."
س.ز
