کۊنگرەو نەتەوەیی کوردستانی ئەرەیاوناش، وەزیروو بەروو تورکی هاکان فیدان بە نۊعێوە کە مایۍ شەرمی و تەرێقبییەیۊ ئینسانین هەولێرنە خێرامایش وەنە کریان، سەرنجەش بۍ سەروو دەوروو فیدانینە جە تیرۊرکەرڎەی دەیان جەنگاوەرا و سەرمەشقاو کورڎانە.
دەسەو ڕاوەبەریی کۊنگرەی نەتەوەییی کوردستانی (کەنەکە)ی ئەرەیاوناش، سەرڎای وەزیروو بەروو تورکی هاکان فیدان پەی عێراقی و پانیشتوو کوردستانی پەی ڕەوایەتیدای و درێژەداین بە هجوومەکاو ئەنقەرەی پەی سەروو هەرێمی.
کەنەکە یادش ئارڎۊ، کە چا چوار دەوڵەتەینە کوردستاننە باڵادەسێنێ؛ جە ڕووەو دەستووری دایمیی عێراقیوە ماف و بییەی کورڎا بەڕسمی مشناسۊ، وەلۍ دەوڵەتوو تورکی گەرەکشا وزۊش سەروو خەتەو وێش و و گێڵنۊشۊ پەی سەرڎەموو سەدامی.
کەنەکە ئانەیجش وست ڕووە، کە حەز و نیازوو دەوڵەتوو تورکی ' دلێنەبەرڎەی سەرجەموو بەرژەوەندی و دەسکەوتەکاو گەلوو کورد'ین و ئاماژەش بە هەڵوێستوو تورکیای وەختوو ڕیفراندۊموو سەربەویۍ کەرد، کە وەڵۍ شش ساڵانە کریا.
ئەگەر دوژمن سپاس و یانەئاواییتا کەرۊ، مشۊم دە جارۍ ویرێش چەنە کەرڎێوە
کەنەکە شێوەو خێرامای جە هاکان فیدانی لە هەولێرنە پیسە ورسونیشتیوە نیشانە دا، کە مایۍ شەرمینە و واتش، فرەو جەنگاوەرا وسەرمەشقاو کوردی بە قەراروو هاکان فیدانی و ئا دەزگایە سەرکرڎایەتییش کەرۍ، تیرۊرۍ کریۍ.
کەنەکە ویرش وستۊ، کە هاکان فیدان سپاسوو سەرۊکوەزیرانوو حوکمەتوو پانیشتوو کوردستانیش کەرڎێنە و ئەرەیاوناش، " ئەگەر دوژمن سپاس و یانەئاواییتا کەرۊ، مشۊم دە جارۍ ویرێش چەنە کەرڎێوە ".
ئەرەیاوناکەو کەنەکەینە ئامان، کە پەدەکە جیای هەڵوێستورگێرتەی دژوو هجوومەکاو دەوڵەتوو تورکی، ئاسانکاری پەی ئا هجووما کەرۊ و ئانەیچ وزیا ڕووە، کە وەختوو کۊکوشییەکاو پێنجوێنۍ، سیدەکانی و برادۊستینە، کە وەختوو سەرڎایەکەو فیدانینە پەی هەولێری کریۍ، ڕاوەبەرایەتیی پانیشتی بێدەنگۍ بێنۍ.
داوایۍ پەی حوکمەتوو عێراقی و پەدەکەی
کەنەکە داواش وەنەو حوکمەتوو عێراقی کەرڎە، کە هامکاریی دەوڵەتوو تورکی نەکەرۊ، حەرپاسە داوایچش کەرڎە، کە وەراوەروو هجوومەکاو دەوڵەتوو تورکی مرڎاوە.
کەنەکە داواش وەنەو پەدەکەی کەرڎە و واتش، کە مشۊم دەسبەرڎارۍ هەڵوێستەکەیشا با، کە وێشا وستەن پاڵوو دەوڵەتوو تورکی و پەنەوازا گێڵاوە پەی سەروو خەتۍ نەتەوەییۍ.
کەنەکە داواش وەنەو سەرجەموو هێزەکاو کوردستانیچ کەرڎە، وەراوەر بە ئەرەگیرا مرڎاوە و کۊشیای ئازادینە بەشدارۍ با.
کەنەکە هەرپاسە سڵامش ئاڕاستەو ئا هێزا کەرد، کە زاپ، مەتینا و ئاڤاشیننە دژوو سوپاو تورکی ئەرەگیری وێگێری کەرا.
س.ز
