٢٠ ساڵ چێوەڵتەر جە ١٢ و ئاداروو ٢٠٠٤ ینە قامیشلۆنە جە ساحێوە تۆپەو پەیانە هجومێوە ئەنجامدریا. دماو هجومەکەی جەنگ ڕووەشدا و پا مەڵامەتۆ دەیان کەسۍ کوشیۍ. گەلوو قامیشلۆی دژوو هجوومەکا مجیێرە جاڎەکا و ڕاپیمای و چالاکیشا ئەنجامدا، دماتەر بە چن شارێوە تەرەرە ۋەڵابیۆ. سەرهۊرداکەی چن مانگێوەش خواینا. کۆنسەو ڕاوەبەری کۆنگرەو نەتەوەیی کوردسانی (کەنەکە) بۊنەو ٢٠ ەمین ساڵیاڎوو کۊکوشی و سەرهۊردای قامیشلۆیۆ ئەرەیاۋنێوە نویسیاش وەڵاکەردۆ.

کەنەکە ئەرەیاۋنۊش سەرهۊرداو ١٢ و ئاداروو ٢٠٠٤ بناغەو ئاخێزوو ۋەرنیشتیش ئەرەمەرزنا و ماچۆ: "سەرهۊرداو ١٢ و ئاداری بناغێوە هێقمش پۍ ئاخێزوو ۋەرنیشتی نیارە. پی بۆنۆ گرڎوو گەشمەرڎا سەرهۊرداکەی بەڕێزوو ئیحترامۆ ویرمارمێوە".

حەرپاسە واوەیش کەردۆ سەرهۊردای ١٢ و ئاداری مەعنێوە حەقەتین و ئاخێزیش دیاریکەرد و واتش: "ئی سەرهۊردایە میراتێوە تاریخیا و نامونیشانێوە گرنگا کە کۊشیای دەیان ساڵەی پۍ دیموکراسی دژوو چەوەسنایۆ و کوشتەی و زۆرداری ڕژێموو بەعسی ڕاڤە کەرۆ.

ئێمە پێسە کەنەکەی گەشمەرڎا ١٢ و ئاداری و گرڎوو گەشمەرڎا ئاخێزوو ۋەرنیشتی بەڕێزۆ ویرمارمێوە و ماچمۍ، بە گرڎوو پا گیری و مەجالوو ۋێماوە پەشتیوانی داخوازییەکا گەلەکەیما کەرمۍ. داوا جە گرڎوو هێز و پێکئاما گلێرگەی وڵاتپارێز و دیموکراتیکەکا کەرمۍ بە گرڎوو هێزوو ۋێشاوە پەشتگیری ئاخێزوو ۋەرنیشتی کەرا. سەرکۊتەی پۍ گەلەکەیمانە".