گلېرگەو ژەنا ئازاڎیی ۋەرکەوتوو کورڎسانی (کەژار) جە نۆەمین ساڵوەگېڵو کۆکوشی ٣ۍ ئابو ٢٠١٤و شەنگالینە ئەرەیاۋناش: چی ڕۋەنە یاڎو گرڎو گەشمەرڎا کەرمېوە. کۊشیای و مدرامانو گەشمەرڎا فرەو ڕا قورسەکاش ئاسان کەرڎەن و ۋەردەوامی ڕاو گەشمەرڎا سەرکۊتەی مسۆگەر کەرۊ.

ئرەیاۋنانش: جە کۊکوشی ٧٤ەمینو سەرو ئێزدییەکانە، دوژمنو مرۆڤایەتی حۊلشدا جە کەسایەتی شەنگالینە گرڎوو دەسکۊتەکا مرۆڤایەتی ئەرەگیر کەرۊ. هێزێوە تاریکپەرستی پېسە داعشی جە بنەڕەتەنە نوێنەرایەتی ئەقڵیەتی پیاسالاری  و دەسەڵاڎداری پیای کەرۊ، کە مەعنەویەت پاشێل کەرۊ. جە ئاکامو ئا هجومەینە ژمارېوە فرە جە ژەنا ئێزدی گیریۍ، بەشێوە فرەشا ورەشیۍ و تائیسەیچ چارەنۋیسو بەشێوەشا دیار نییا. ئانەیچ راسی ئەقڵیەتی پیا سالاری عال نیشانە مڎۊ، کە حەر یاگېنە بۊ، هجوم کەرۊ سەرو دەسکۊتەکا گلېرگەی و لایەنی مەعنەوی گلېرگەی.

'جە ٢٠١٤نە ژەنۍ کورڎی سەرو بنەماو فکرېوە ڕاسی، تاریکی داعشیشا دلېنەبەرڎ'

کەژار ئەرەیاۋنانش: "حەرچنە هێزە هەژموونوازەکۍ گەرەکشابۍ کە جە کەسایەتی داعشینە جە گرڎ یاگۍ ۋەرکەوتوو دلېڕاسەینە ۋېشا زاڵ کەرا، بەڵام کۊشیای ژەنا جە کورڎسانەنە ئا پلانېشە پوچ کەرڎۍ. چنڎین ساڵېن جە کورڎسانەنە ژەنی بیېنۍ سەرمەشقو گلېرگەی و جە گرڎو بوارەکانە ۋېشا رێکوستەن. جە شەنگالیچ بەهەمان شېوە، ژەنی سەرو هزر و پاڕادایمو ڕابەر ئاپۆی هێز و ئیراڎەو ۋېشا ئشناسا، جە بەشە کۆمەڵایەتی، سەروازی و سیاسینە ۋېشا رێکوست. حەر یۊ چانیشا بیۍ بە سەرمەشقو گلېرگەی کە تەرسیشا وستە دلۍ دڵو داعشیۊ. ژەنی ئێزدیۍ نیشانەشادا کە ئازاڎیی قوربانیش گەرەکا، پۍ شکس پنەئارڎەو داعشیچ قوربانیۍ فرېشا بەخشۍ".

'سیستمو مەلاکا ئێرانی، داعش و تالیبان جە بنەڕەتەنە دژبە ژەنانۍ'

جە بەشېوە تەرو ئەرەیاۋناکەینە کەژار سەرەڕاو ۋیرئارڎەیۊ ۋیەرنای ١١ مانگا سەرو ئاخېزو 'ژەنۍ، ژیای، ئازاڎیی' و چڕتەر بیەیۊ و فشار و تنوتیژیەکا دەسەڵاڎدارا ئێرانی ۋەران ۋەر بە ژەنا و تنتەرکەرڎەیۊ کۆت و بەنڎەکا سەرو ژەناش ئەرەیاۋنان: حەرچنە دەسەڵاڎدارۍ ئێرانی گرڎ ڕۋۍ جە ڕا جیاجیاکاوە و بە بەرکەرڎەی قەراری و یاسای جە لایەنو پەرلەمانیۊ و قسۍ و فتوا جیاجیاکاوە جە لایەنو مەلاکاوە دژوو ژەنا گەرەکشابۍ هەناسەشا ۋنەبڕا، بەڵام ژەنی ئێرانیۍ بەشێوە فرە جە پێناسەکا دەسەڵاڎداراشا ماڕا، بە دروشمەو ژەنۍ ژیای ئازاڎیی بیۍ بە نمونە پۍ ژەنا جەهانی. جارێوەتەر بەرکۊت کە هێزو ئاخېزو ژەنۍ بە بەرکەرڎەی یاسای مەتاۋیۊ مرڎیۊ".

کەژار گېڵایۊ تالیبانی پۍ سەرو دەسەڵاتی جە ئەفغانستانیچش ۋیرئارڎۊ، کە چنی گېڵایۊیش فشارەکېش پۍ سەرو ژەنا چڕکەرڎەنۊ و گرڎ ڕۋۍ قەراری تازە جە دژوو ژەنا بەرکەرۊ، بەڵام سەرەڕاو ئانیشایچ ژەنۍ ئەفغانستانی هەنگامە پۍ دمای مەنیا و گوڕشا بە کۊشیایشا دان.

حەر جە درێژەنە ئەرەیاۋنانش: "ژەنی عال جە ئېشو یۊترینی میاۋانە و هێز جە یۊترینیۊ هۊرگېرا و جوگرافیا و کولتوری جیاواز ڕاگیر نییا جە ۋەردەمو کۊشیای و یۊگېرتەی ژەنانە. ژەنۍ جە ئەفغانستانەنە با، یاخوڎ ئێران و یان شەنگال، هێز جە یۊترینی هۊرگېرا و کۊشیایشا ۋەرفراوان کەرا".

جە دمایی ئەرەیاۋناکەو کەژارینە ئامان، "جارێوەتەر گرڎوو گەشمەرڎا ڕاو ئازاڎیی ۋیر مارمېوە، ئەرەیاۋنمېش کە تائیسەیچ ئەقڵیەتی پیاسالاری و باڵادەسی پیای بە گرڎ شێوازېوە سەرو گلېرگەی ئێزدی و ئەفغانستانی و ئێرانی-رە ۋەردەواما، پۍ ماڕاو ئا ئەقڵیەتەیە و دمای ئارڎەی بە جینۆسایدو ژەنا پێۋیسا خەبات و کۊشیای سەرەمڕە ئەنجام بڎریۊ".

حەر چا چوارچێوەنە کەژار پەشتیوانی ۋېش پۍ کەمپینو کەژەکەی بەربڕیەن و ئەرەیاۋنانش: "جە ماوەی ۋیەرڎەنە کەژەکە بە دروشمو "جە وەران وەرو هجومەکا پیای هەژمونوازینە، ئێمە ئینایمۍ چنی ژەنا ئەفغانستانی و شەنگالی" فرە ماناڎارا. جە بنەماو ئا کەمپینەینە ئێش و ئامانج و کۊشیای هامبەش هەن. سەرو ئا بنەمۍ پېسە کەژاری هەم ئا کەمپینەیە بە گرنگ منیەیمېرە و هەمیچ حۊڵ مڎەیمۍ کە خەباتو ۋېما پا ئاراسەرە ۋەرفراوان کەرمۍ، حەرپاسە ژەنی و گلېرگەی ئازاڎیواز، گەرەکشانە پەشتیوانی چا کەمپینەیە کەرا. بێگومان بە یۊگېرتەی ژەنا سیستمو دەسەڵاڎداری پیای دلېنە مشۊ".

هـ . ش