کۊمیتەو هامپەیمانی و پەیوەندییە دیموکراتیکەکاو کەژەکەی داواش وەنەو لاێوە کەرڎە، یوەمین ساڵیاڎوو کوشیای ژینا ئەمینی-ێنە بەشداریی چالاکییەکاو شۊڕشوو 'ژەنی، ژیوا، ئازادی'ینە کەرا.
کەژەکە بە بۊنەو یوەمین ساڵیاڎوو کوشتەی ژینا ئەمینی-ێوە ئەرەیاوناێوەشا وەڵا کەرڎۊ، دلێشەنە پەی بەشداریکەرڎەی جە چالاکییەکاو شۊڕشوو 'ژەنی، ژیوا، ئازادی'ینە داواشا کەرڎە.
جە ئەرەیاوناکەینە کەژەکە داواش جە دەوڵەتوو ئێرانی کەرڎێنە، دمایی بە فشارەکاش پەی سەروو ژەنا بارۊ و داواو ئازادکەرڎەی زەینەب جەلالیانێش ئەوەخوای کەرڎێنۊ.
ئەرەیاونیاکەو کەژەکەی ئینەن:
"٧٦ ژەنە گەشمەرڎۍ شۊڕشوو 'ژەنی، ژیوای، ئازادی'، پەی ئانەی جیهانی ستەموو پیایا، ڕەگەزپەرسی، نەتەوەپەرەسی و فاشیزم ڕزگار کەرا، کۊشیۍ. پەی بەنرختەرین بییەی وێشا فیدا کەرد، گیانوو وێشا کەرد قوربانی پەی ئازادی، جە کەسایەتیی ژینا ئەمین-یۍ و شلێر ڕەسوڵێنە بە ڕێز و پەنەزانایۊ یاڎشا کەرمێوە.
جە کەسایەتیی قارەمانە ژەنانە کە کۊشیای ڕەواو وێگیرانەو زیندانەکاو ژەنانە، کە جە یەک ملیمەتری پاشەکشێشا جە ئازادی نەکەرڎە و چەخماخەو مدرامانیشا سەرجەنۊ داوە وەنە، ئێمە سڵام جە کۊشیای ژەناو وەرکەوتوو کوردستانی و ئێرانی کەرمۍ. سڵام وەنەو گردوو ئانیشا کە گرد یاگێوەنە گوڕ بە کۊشیای ژەنا مدا. سڵام وەنەو گردوو ژەنا، کە دژوو ستەموو پیای وێگێری کەرا!
ژەنی، ژیوای، ئازادی فاڕییا پەی بۊ فۊرمولوو ژیوای و ئازادی
هەقیقەتوو 'ژەنی، ژیوای، ئازادی' کە وەڵۍ چندین ساڵانە ڕابەر ئاپۊی وست ڕووە، ساڵەی وەڵینە چی ڕوانە بی بە هاواروو ئازادی و کرێڵی ئەفسوناویی ژیوای ژەناو ئێرانی. ژەنی، ژیوای، ئازادی پەیمانە و قسۍ ئا ژنانە، کە سەدەو ٢١ کەرا سەدەو شۊڕشوو ژەنی. پەوکای جە ڕووەو جەوهەرییوە پارادایموو ژیوای ئازادوو ئێمەی ژەنا. ئا پاڕادایمە نامۍ ئا فەلسەفەینە کە گلێرگە، ژەنی، کولتوورەکۍ جە کرڎەوە کۊیلەدارانەکاو دەسەڵاتدارەکانە ڕزگار کەرۊ، بە سەرمەشقایەتیی ژەنی ژیوای ئازادانە مەرزنۊرە. ژەنی، ژیوا، ئازادی ئارۊ فاڕییان پەی کاراکتەرێوە گەردوونی، کە فۊرمولوو ژیوای و ئازادین پەی ژەنا. ساڵەی وەڵینە چی ڕوانە شایەتۍ ئانەیە بێنمۍ، کە گرد ڕوۍ گرد مەیدانێونە، گرد شۊنێوە دنیێنە جە چالاکییەکانە ژەنی هەنگامەی گەورۍ شۊڕشگێڵنییەشا ورگێرتە.
دژوو سیاستە دوژمنکارانەکاو دەوڵەتوو ئێرانی، کە سەروو ژیوای، جەستە، هزر و ڕەنجوو گەلی و ژەناوە سازنانش، ژەنی بە چالاکیی ڕادیکاڵ ورێستۍ سەروو پایا، گردوو بەشەکاو گلێرگەی بەشدارییشا چا چالاکییانە کەرد و ژەنی سەلەمناشا، کە شناسنامە و هێزی سەرمەشقوو شۊڕشە کۊمەڵایەتییەکانۍ. مدرامانوو ژەنە ڕێکوزیایا، کە وەراوەر بە ستەم، فشار، کۊلۊنیالیزمی و قەدەغەکارییەکاو ستەمکارا بێدەنگ مەبۊ، سەرە مەکۊمنۊرە و بە بەختکەرڎەی گیانیش ڕەتش کەرۊوە. هەمان وەختەنە گەرەنتیی ئازادی، دیموکراسی، گردوو ماف و ئازادییەکان. داواو فاڕیای و تووڕەیی دلۍ ئا چالاکییە شکۊمەندانەینە شاریێبێنێوە، ئارۊ بە شێوەو وێشا بەرڎەوامێنۍ. پاڵنەرەکاو ئا چالاکییا بێنۍ، کە بیۍ بە ساعیبوو کاراکتەرێوە مدرامانی جیهانی پێسە هیزی ئارۊیچ بە جددی درێژە بە بییەی وێشا مدا.
پێسە ژەنا، داواکارییەکاما، کۊشیای ڕەواما بە پاو داواکاریی گردوو بەشەکاو گلێرگەی، بە سیستمی ستەمکارانەوە زیانمەندۍ بیێنۍ. ئا وێنیشانەدایۍ کە بە داواکاری ماف و ئازادیی ژەناوە ئێرانۊ دەسشا پەنە کرد، جیاوازۍ بێنۍ جە گردوو نۊعەکاو مدرامانی کە وەڵتەر هێزەکاو لایەنگێراو فاڕیای کەرڎەبێشا. وەرووئانەیە مدرامانێوە بە دەوروو ژەنێوە ڕاسیی ئازادیی ژەناش فاڕا پەی کۊشیای پێوەیی و هامبەشوو گردوو لایەنەکا، کە بۊنەو سیستمیوە زەرەرشا وەرکەوتەن. خاس پا ڕاسییەیەمزانمۍ، دلۍ ئا هەلومەرجانە، کە سیستمی دماکەوتە دلێنە نەشییەن، نەفاڕییان، ئانە سەروو ژینا ئەمینی-ێرە ئاما، بەئاسانی متاوۊ سەروو گردوو کەسیرە بۍ. وێشا پەی وێشا ژەنی لەچک و سەرپۊشەکێشا فڕە دۍ، سۊچنێشا قژێشا پێسە شیوەن و ئەرەپڕای بڕیۍ، جادەکێشاپەڕۍ کەرڎێوە. پڕکرڎەوە. ئێمە چالاکی و وێنیشاندایەکاو ئی نۊعەو ژەنانما بە جیهانی دیۍ. ژەنی ئەرەیاوناشا کە ئیتر گەرەکشا نیا، جە ژیوای پەڕ ستەموو دەسەڵاتدارینە بژیوا، شێوە و ڕسموو ئا ژەنا، کە سیستموو رەگەزپەرسی وێناش کەرا، ڕەت کەراوە.
ژەنی بە وێنیشانەدایەکاو ژەنی، ژیوای، ئازادی سەلەمناشا، کە جیهانێوە چێرڎەسەیی هامبەشنە، کۊشیای ژەنایچ هامبەش بۊ. ژینا ئەمینی-یە لایەنوو مەژگی بکوشوو پیایۊ کوشیا. وەلۍ ئا کۊکوشییە دماییش پەنە ناما. سیاسەتە دوژمنکارانەکاو دەوڵەتاو دنیۍ وەراوەروو ژناوە، جە ساڵەوەڵینەکاوە ئاستوو دڕندایەتینە بەرڎەوامۍ بێنی، گرد ساڵێوە بە هەزاران ژەنۍ کوشییا. وەڵاتا پێسە ئێران، تورکیا، ئەفغانستانینە وەراوەروو ئا ژەنانە زیندان کریێنۍ کرڎەوۍ نائینسانانۍ کریا. ئا ژەنۍ ئارۊ ژمارەشا یاوان دەیان هەزار کەسۍ، پێسە تاوانباری فکری ئینۍ دلۍ زیندانەکاو تورکیاینە. ئا ژەنۍ بە ناڕەوا دلۍ زیندانەکانە گیرییا، دلۍ هەلومەرجی دژواری و نائینسانانەینە پەی ژیوای کۊشییا. جە هجوومە ئەرەگیرکارییەکاو دەوڵەتاو کۊلۊنیالیستینە پەی سەروو وەرنیشتی، شەنگال و سەرنیشتوو کوردستانی بەتایبەتی ژەنی کریا ئامانج. پەوکای بەتایبەتی دەوڵەتوو تورکی، دەوڵەتوو ئێرانی، تالیبان و پیاوەتیی هەژموونگەرا و فرەو دەوڵەتاو دنیۍ بە سیاسەتوو تیرۊری گەورەی دژوو ژەنا تاوانۍ کەرا. ئا مەژگە کە ژیناش کوشت، سەرچەمەکەش ئا ئەقڵیەتەو پیای هەژموونگەراین. وەروو ئانەیچە سەرەوردای ژەنا و کۊشیای یەکسانوازی و ئازادیی ژەنا بێئەنجام نییا.
تا کۊکوشیی ژەنا دماییش پەنە نارییۊ ئازادی دەسەبەر مەبۊ
ئێمەی ژەنی ئیتر ناچارینمۍ پەرسمێوە جە پیاوەتیی ستەمکاری چەپەڵی، ئی مەژگە ستەمکارانە کە، بیەن بە بەڵا ملوو ژەناوە، گەلۍ و ژیوگە دلێنە بەرا و پەی ئانەیچە خەتێوە کۊشیای خولقنا. دروشمەکاو ژەنی، ژیوای، ئازادی کە دژوو ئایینپەرسی، ڕەگەزپەرسی و دەسەڵاتداریی پیاینۍ ژەنیشا یاونۍ بە یۊی، سەلەمناش، کە ئا ڕووەدایۍ ملوو ژەنارە مەیا، گرد یاگێوەنە پێسە یۊینۍ و هامشێوەنۍ. پەوکای چی ئاستەو ئیسەینە دژوو کۊکوشیی ڕەگەزپەرسی و زەوتکەرڎەی مافەکا پێسە ژەنا مشۊم ئێمە داواکارییەکێما دژوو سیستمی دوژمنکارانەو پیای بە هەڵوێستێوە کۊشیای قەوەت و بەرڎەوام نیشانە بدەیمۍ. وەروو ئانەیە گرد کرڎەوێوە تندوتیژی وەراوەروو ژەناوە کریا، پیسە ژەنۍ دڵمانە گرد ڕوۍ پارچێوەما چەنە بۊوە. دژوو ڕرووەدایەکاو کوشتەی بە شێوەو کوشتەی ژینا ئەمینییۍ، کە گرد ڕوۍ دنیانە ڕووە مدا.مشۊم ئێمە لایەن و خاڵە هامبەشەکاما خاستەر کەرمۍ، دەس وزمۍ دەسوو یۊی دژوو ئا سیستمە دڕندەیەو پیای کە لەمپەر وزا وەرڎەموو ئازادیما، مشۊم جە هیزی خاستەر و قەوەتتەر واچمۍ، کە ئێمە کۊشیای وێما گەورەتەر کەرمۍ.
تا گردوو نۊعەکاو فشاری، تندوتیژی و کوشتەی ژەنا و کۊکوشی دماییشا پەنە نۍ، ژیوای ئازاد نمەبۊ، سیستموو دیموکراتیکی دەسەبەر مەبۊ.
پی بۊنەوە وەڵێوە ڕژێموو ئێرانی دوژمنوو ژەنان، هەرپاسە گردوو ئا دەسەڵاتدارییا کەرمۍ، کە ژیوایشا پەی ژەنا کەرڎەن بە زیندان و مافەکاو ژیوای ئازادیشا زەوتۍ کەرڎێنۍ و بە زۊرداری ژەنی وزا زیندان، گەرەکشانە جە ڕاو قەنارەدایۊ چۊکێشا پەنە بدارە، ئێمە ئانەیە ماچمۍ، کۊشیای ژەنا ڕەوان و سەروو حەقین! پێسە جە چالاکی و وێنیشانەدایەکاو ١٦و ئەیلوولوو ٢٠٢٢ێنە وینییا، کۊشیای ژەنا گۊش بە هیچ وەربەسۍ و قەدەغێوە مەدۊ. ئێمە بە دەوڵەتوو ئێرانی ماچمۍ، کە جە یوەم ساڵیاڎوو شۊڕشینە دمایی بە فشارەکا دژوو ژەنە سەرمەشقا کۊشیای ژەنا بارۊ. ئێمە داوا کەرمۍ، کە سزاکاو سەروو ئا ژەنا دمایی پەنە بۍ، چونکوم ئا ژەنۍ گەرەکشانە ژیوای پەی ژەنا، گەلا، ئایینەکا و کولتوورەکا گونجیاتەر کەرا، دمایی بە کرڎەوەکاو ئی سیستمە دژە ژەنەیە بارا. پی بۊنەوە جە کەسایەتیی هامڕێما زەینەب جەلالیانێنە داواکارییەکاما پەی ئازادکەرڎەی سەرجەموو زیندانییە سیاسییا دووەبارە کەرمێوە. وەختوو ئانەیە سەرشییەن، کە گەل، ژەنا بە زۊر، بە قەدەغەکاری، بە ستەمکاری، بە کرڎەوەی دژەدیموکراسی بەرا ڕاوە. جە ڕاو سیاسەتوو ئایینپەرەستی و پارێزگارانەی و کۊنسێرڤاتیستانە هیچ چێوۍ بەدەس نمۍ. دەوڵەتوو ئێرانی تا بتاوۊ وێش جە قەیرانی قووڵی نەجات بدۊ، وێش فاڕۊ، مشۊم ئا سەرەوردایۍ گەلی پەی وێش پێسە فرسەتێوە بزانۊ، پەوکای دەوڵەتوو ئێرانی وەختوو فاڕیایش ئامان. پاگێرتەیرە و سووربییەی سەروو ڕژێموو دژەدیموکراتیکی کۊنی، پەی گەلی و وەڵاتێوە ساعیب دینامیکی کولتووری دۊڵەمەندی قەوەتی، بە ماناو دماکەوتەی، وڕیای و گەورەبییەی قەیرانەکان.
سەروو ئا بنەمۍ ئێمە سڵام جە کۊشیای شکۊمەندانەو سەرجەموو ژەنە وێگیرا کەرمۍ، کە ماچا "ژەنی، ژیوای، ئازادی"، سەرجەموو کەسا بە ڕێزۊ یاڎ کەرمێوە، کە وێنیشاندایەکاو 'ژەنی، ژیوای، ئازادی'ینە ژیوایشا جەدەس دان. پەی ئا چالاکییا جە یوەم ساڵیاڎوو سەرەوردای ژەنی، ژیوای، ئازادی-ینە ڕێکۍ وزیا، ئێمە داوا وەنەو گردوو بەشەکاو گلێرگەی ئازادیوازی و دیموکراتیکی کەرمۍ، کە بەکارایی بەشدارۍ با. هەرپاسە ئەرەیاونمێش، کە شۊڕشوو ژەنا تەنیا یەک سات و ماوێوە کوڵ نییا، مشۊم کۊشیای، پەشتیوانیی بەرڎەوام بۊ؛ پەوکای داوا وەنەو گردوو کەسایەتی و جمیەرەکاو ژەناو لایەنگێراو ئازادیی کەرمۍ، کە دەنگوو وێشا ئامێتەو چالاکییەکا کەرا، پاڵپەشتی و پەشتیوانیی وێشا گەورە کەرا. دژوو سیاسەتە دوژمنکارانا وەراوەروو ژەنا، ئێمە وەعدوو ژیوای جە جوانیی 'ژەنی، ژیوای، ئازادی'ینە ئەوەخوای کەرمێوە".
س.ز
