کۆردیناسیۆنوو کەژەکەی جە پەیامێوەنە پۍ چالاکییەکەو شاروو کۆڵنی جە ئەڵمانیا بانگەوازش کەرد، تا ئازاڎیی ڕابەروو گەلوو کوردی عەبدوڵا ئۆجالانی، بە ڕۆحوو سەفەربەرییوە درێژە بە کۊشیای بڎەیدۍ.
جە پەیامەکەو کۆردیناسیۆنوو کەژەکەینە کە جە گلێرۊبیە گۆرەکەو شاروو کۆڵنینە جە ئەڵمانیا ۋنیاوە، داواو ئازاڎیی جەسڎەیی ڕابەروو گەلوو کوردی عەبدوڵا ئۆجالانی و چارەسەری سیاسی پۍ پرسوو کوردی کریا و وچیا: "ژیۋای ئازاڎ چنی ڕابەری ئازاڎیی جە گرڎ وەختۍ نزیکتەرا ".
پەیامەکە و کۆردیناسیۆنوو کەژەکەی پێسەنە:
"سڵام کەرمۍ جە چالاکی و بەشداربیەکەیتا کە هۊرگیروو ئامانجێوە پیرۆزیا، جارێوەتەر ماچمۍ کەس مەتاوۆ ڕۆکەیما تاریک کەرۆ، ڕۊشنایی جە دوورگەو ئیمراڵییوە بەرەو جەهان وەڵابیەنۆ!
٢٥ ساڵۍ ویەرد سەروو پیلانگێڵنیی میان نەتەوەیی ١٥ و شوباتیرە دژوو ڕابەر ئاپۆی. جە ٢٥ ەمین ساڵیاڎوو پیلانگێڵنینە، هێزە پیلانگێڵنەکا شەرمەزار کەرمۍ و جارێوەتەر تەئکیدش کەرمێوە جە ساڵەو ٢٦ ەمینینە کۊشیای و مدرامانی ئازاڎیما گۆرەتەر کەرمۍ.
سەرەتا گرڎوو گەشمەرڎاما کە بە درووشمەو "مەتاودۍ ڕۆما تاریک کەردۍ" جە دەوروو ڕابەر ئاپۆیرە بیۍ بە بازنێوە جە ئاێری، بەڕێزوو حورمەتۆ یاڎ کەرمێوە.
سڵام کەرمۍ جە چالاکا مانگرتەی جە واردەی زینڎانەکانە، ئەڎایاما جە ئێشکگیری دادپەروەری و گرڎوو ڕاپیماکەرا ئازاڎیی؛ حەرپاسە مدرامانوو ژەنا و گەلەکەیما و دۆسەکاما پیرۆز کەرمۍ کە دژی پیلانگێڵنیی جە کوردسانۆ دەسشا پنە کەرد و جە تەماموو جەهانینە وەڵابیۆ و ٢٥ ساڵێن بەردەواما.
جارێوەتەر ئا دەوڵەتا شەرمەزار کەرمۍ کە بەشدارێبێنۍ جە پیلانگێڵنی میان نەتەوەیینە و ئەرەیاۋنمێش کە هەمیشە ۋەروودەم و گەلانە، ۋەروو دەم و تاریخینە دادگایی کریا و پی تاوانە قیزەونێوە یاڎ کریاوە.
هێزی سەرەکی پەشتەو پیلانگێڵنی میان نەتەوەیی سیستموو مۆدێرنیتەی سەرمایەداری جەهانی بۍ. ئامانجشا ئانە بۍ جە کەسایەتی ڕابەر ئاپۆینە، دمایی بە تەڤگەری ئازاڎیی کوردسانی بارا، حەتا بتاوا فەرمانڕەوایی کوردسانی و گرڎوو ۋەرکەوتوو دلێڕاسەی کەرا.
پۍ ئەرەگیرکەردەو جەهانی و بەشکەردەی ۋەرکەوتوو دلێڕاسەی، جەنگێوە گۆرەی مەسڵەحەتیشا کەرد و گەلوو کوردی و گەلا ۋەرکەوتوو دلێڕاسەیشا کەردۍ قوربانی مەسڵەحەتە گڵیاوەکاشا.
جە ۋەران ۋەروو ئی پیلانگێڵنییە قیزەونەینە کە ڕۊو قڕکەردەی کوردا و ژەنان، ڕابەر ئاپۆ چارەسەروو مۆدێرنیتەو دیموکراتیکیش دەسنیشان کەرد، کە پۍ گەلی و ژەنا کوردی بی بە ڕاو سەرکۊتەی کۊشیای و بیەی و ئازاڎیی. سەرۆک ئاپۆ دەسنیشانش کەرد کە ڕای سەرەکی پۍ گلێرگێوە دیموکراتیکی پەشتی بە ئاخێزوو ئازاڎیی ژەنا و ئاخێزوو ئیکۆلۆژیکی بەسۆ.
بە وەشکەردەو هێزێوە چارەسەری چی جۆرەیە، ڕاسی هێزەکاو مۆدێرنیتەی سەرمایەداری کە پیلانگێڵنی میان نەتەوەیشا ئەنجامدا، ئاشکرا کەرد کە ئاڎۍ دوژمنۍ ئازاڎیی و دیموکراسی و ژەنا و گەلانۍ، ئی هێزۍ کە گەرەکشابۍ جە کەسایەتی ئاڎینە گلێرگەی دیموکراتیکی دادگایی کەرا، ۋێشا دادگایی و مەحکوم کریۍ.
دلۍ سیستموو قڕکەردەی ئیمراڵینە کە واچێنۍ "وردە وردە کوشمێش و دلێشەنە بەرمۍ"، ڕابەر ئاپۆ بە واتەی "جە ئەڎابیەی یەرەمی" پارادایمەکەش فاڕا. چا یاگێنە کە واچێنۍ ویرکەردەیۆ نییا، ڕابەر ئاپۆ فیکری تازەش خولقنا کە بیۍ بە هیواو جەهانی و دەنگوو ژیۋای ئازاڎیشا یاونا بە گرڎوو جەهانی کە هێزە هەژموونوازەکۍ گەرەکشا بۍ کپش کەرا. پۊکەی پێویسا جارێوەتەر ئاماژە پانەی کریۆ کە پیلانگێڵنی میان نەتەوەیی بە مدرامانوو ڕابەر ئاپۆی و شێوازوو کۊشیاکەیش جە ئیمراڵینە پووچکریاوە.
جە ۋەران ۋەروو پیلانگێڵنی میان نەتەوەیینە کە گەرەکشا بۍ ڕۊو مرۆڤایەتی تاریک کریۆ، ڕابەر ئاپۆ کۊشیایۍ گۊرەش ئەنجامدا، ئاستوو ڕابەرایەتی نەتەوەییش ویەرنا پۍ ئاستوو ڕابەرایەتی جەهانی. بی بە ڕابەروو چێردەسا و ژەنا و مرۆڤایەتی و گەلا. حەقیقەتوو ڕابەر ئاپۆی جە دژوو هێزە پیلانگێڵنەکا ژەنیش کەردە هێز و ڕێوە پۍ ڕزگاربیەی.
ژەنا و گەلا هەمیشە کۊشیانە جە دژوو پیلانگێڵنیی ١٥و شوباتی، ئازاڎیی ڕابەر ئاپۆی کەرا بە مەڵامەتوو ژیۋای ۋێشا و پێسە ئیراڎەو ۋێشا پارێزناش. بە فاڕای هوشیاری و پراکتیکوو چالاکیی شۆڕشگێڵنانەی، بەشداری جە هەڵمەتەو ئازاڎیی تاریخی ڕابەر ئاپۆینە کەرا. پارادایموو ڕابەر ئاپۆی و فەلسەفەو ژەنی ژیۋای ئازاڎیی وەڵابۆوە. ئازاڎیی گەلوو کوردی چنی چارەنوویسوو گەلا ۋەرکەوتوو دلێڕاسەی یۊگێرۆ. ئاینڎەو دیموکراتیکی گەلا ۋەرکەوتوو دلێڕاسەیچ بە چارەسەری کوردسانی دیموکراتیک-خۆسەری مۍ دی. کۊشیای ئازاڎیی ژەنا، پێسە سیستمێوە جەهانی تازەی کە سەروو بنا‌غەو پارادایموو دیموکراتیکی و ئیکۆلۆژیکی و ئازاڎیی ژەنا، دەرفەت پۍ چارەسەری کۆنفیدراڵیزمی دیموکراتیکی خوڵقنۆ. داواو سیستمێوە تازەی جڤاکی پۍ ژەنا و گەلا، کۊشیای جڤاکی وەڵۍ وزۆ. هێزە هەژموونوازە میان نەتەوەییەکۍ کە ئی وەڵێکۊتەیا وینا و دەوڵەت-نەتەوە ئەمرەو واقیع‌پارێز و ستەمکارەکا هەرێمەکەی، پا گیری سەروو ستراتیج و پیلانگێڵنی کەرا. دژوو ئی سیستمەیە کە ژەنیش بێ شناسنامۍ و بێ قیمەت کەردێنۍ، کەردێنێش بە کاڵێوە سانای و ورەتەی و جە بەهاکاش دوورش وستەنۆ، جە دیواروو یانەکانە بەسۊشاوە، یا دلۍ سنووروو دەوڵەتانە قەتیسێش کەردێنۍ! بە پارادایموو دیموکراتیکی و ئیکۆلۆژیکی و ئازاڎیی ژەنۍ ئی دیوارشە ماڕا کە پێسە چارەنوویسوو ژەنا سەپیان و ئارۆ فەلسەفەو ژەنۍ ژیۋای ئازاڎیی بیەن بە سەرمەشقوو ئاخێزوو ژەنا و گلێرگەکا!
جە ۋەران ۋەروو ئا هێزاو مۆدێرنیتەی سەرمایەدارینە کە پۍ وەڵێکۊتەی و بەردەوامیی ۋێشا ژەنی پێسە موڵکۍ گرنگوو ۋێشا وینا، پارادایموو ئازاڎیی ڕابەر ئاپۆی بیەن بە بەرەو ژیۋایۍ ئازاڎیی کە ژەنی بەرەو ڕووش هەنگامە منیا. ئا سیستمەی کە جە ڕاو کاراکتەروو سەردەسی پیایۆ و ژەنی کۆیلێوە بەردەوامیش هەن، جە ۋەران ۋەروو پارادایموو ژیۋای ئازاڎیمانە شکس مارۆ. پۊکەی جە سەڎەو ٢١ ەمینینە کە ئێمە بە سەڎەو ژەنۍ پێناسەش کەرمۍ، عالتەر وینمۍ کە پیلانگێڵنی میان نەتەوەیی جە ڕاسینە پیلانگێڵنیێوەن جە دژوو گرڎوو ئا ژەنا کە شۊنەو ژیۋایۍ ئازاڎیرە گێڵا. پۍ ئینەیچ پێویسا ژەنی پا هوشیارییەی کە پیلانگێڵنی و گۆشەگیری دژوو ئاڎیشان، کۊشیای ۋێشا جە پیلانگێڵنی و گۆشەگیری بەرزتەر کەراوە. هامشان چنی ئانەی کە ئازاڎیی ڕابەر ئاپۆی ئازاڎیی ئاڎیشان، تا بەدیئاردەو ئازاڎیی جەسڎەیی ڕابەر ئاپۆی، پێویسا بە ڕۆحی سەرفەربەرییوە بەشدارۍ با و ڕێکوستەی ۋێشا بەقوەتتەر کەرا.
پی بۆنۆ، داوا جە تەماموو گەلەکەیما و بەتایبەت ژەنا و گەنجا و ڕای گرڎیی دیموکراتیکی و دۆسا ۋێما کەرمۍ پۍ ماڕای دیوارەکا ئیمراڵی کە بە مەعناو قڕکەردەی ژەنۍ و سرووشتی و مرۆڤایەتییا، دژوو پیلانگێڵنیی میان نەتەوەیی و پۍ مسۆگەرکەردەی ئازاڎیی جەسڎەیی ڕابەر ئاپۆی بە ڕۆحوو سەفەربەریوە ئەرەکۊشایشا پۍ بەرزتەرین ئاستی بەرز کەراوە!
ژیۋای ئازاڎی چنی سەرۆکی ئازاڎیی جە گرڎ وەختۍ نزیکتەرا!
ژەنی ژیۋای ئازاڎیی
بژیۋۆ سەرۆک ئاپۆ".
