لۆرا کاستێل فۆرتە، دەستنیشانش کەرد کە گۆشەگیری ئیمراڵی جە جیهانەنە هامشێوەش نییا و واتش، "بەڕێز ئۆجالان رووبەڕوو ئەشکەنجەی دژواری بیەنۆ. جە گواتیمالایچەنە سیستمێوە گۆشەگیری پی جۆرە نەوینیان. نمەکریۆ ۋەرا ۋەر پانەی بێدەنگۍ بیمۍ".
ڕابەروو گەلوو کوردی عەبدوڵا ئۆجالان زیاتەر جە ٢٥ ساڵان جە زیڼانوو دوورگەو ئیمراڵینە ئینا دلۍ هەلومەرجی دژواروو گۆشەگیرینە و ٤٠ مانگێن هیچ هەواڵێوەش نمەزانیۆ. دەوڵەتوو تورکی کە ئیمراڵینە رژێمێوە گۆشەگیری تایبەتش ئەرەمەرزنان، هەم یاساکاو ۋێش و گرڎوو یاسا مېیان نەتەوەییەکا بە نەبیەی منیۆرە و یاسای دوژمنکارانە ۋەرا ۋەر بە ئۆجالانی مسەپنۆ و مافوو دیڎاری چنی بنەیانەی و پارێزنەرا زەوت مکەرۆ.
کۆمیتەو ڕاگێرتەی جە ئەشکەنجەو ئەنجومەنوو ئەوروپای (سی پی تی) جە ۋەرا ۋەروو پاشێلکارییە نایاساییەکانە جە لایەنوو دەوڵەتوو تورکیوە، بەردەواما جە بێدەنگی و پی جۆرە هامبەش و یاردیدەرا جە بەردەوامی گۆشەگیرینە.
دژوو ئا پاشێلکەردەو یاسۍ چنڎین لایەنۍ مەدەنی جە ١٠و تشرینی یووەم و ٢٠٢٣ېنە کوۍ بیێوە و سەرو ئاستی میاننەتەوەیی هەڵمەتەو 'ئازاڎیی پەی عەبدوڵا ئۆجالانی، چارەسەری پەی پەرسو کورد'یشا دەسپنەکەرد. ئا لایەنە مەدەنی و کۆمەڵایەتیۍ پەی ماڕای گۆشەگیری چڕی بەردەوامێنۍ جە خەباتی یاسایی و دیپلۆماتیکی.
یۆ چا ناوەندا گۆشەگیری ئیمراڵی چنەشەنە بیەن بە رۆژەڤ، ناوەندوو ئەنجومەنوو مافەکا مرۆڤین جە نەتەوەیەکگرتووەکانە. جمیەروو دۆسایەتی گەلا دژوو نەژاڎپەرسی (مراپ) کە جە چوارچێوەو نەتەوە یۆگێرتەکانە کار مکەرۆ، جە میانوو ئەرەنیشتەی ٥٦ەمینوو ئەنجومەنوو مافەکا مرۆڤوو نەتەوەیۆگێرتەکانە کە جە ١٨و حوزێرانی دەسشپنەکەرد و جە ١٢ و تەمووزی دمایش پنە مۍ، جە کۆنفڕانسێوەنە کە سازش کەرد، سەرنجش پەی سەرو هەلومەرجوو گۆشەگیری دژوو عەبدوڵا ئۆجالانی نیشانەدا.
'عەبدوڵا ئۆجالان ۋەرەن ڕوو ئەشکەنجەی دژواری بیەنۆ'
یۆ چا کەسا جە کۆنفڕانسەکەنە قسێش کەردۍ ئەندامەو ئەنجومەنوو نوێنەرا ئیسپانیای سیناتۆرەو کاتالانی ئەندامەو ئەنجومەنوو پەرلەمانتارا کۆنسەو ئەوروپای لۆرا کاستێل فۆرتە، سەبارەت بە گۆشەگیری ئیمراڵی قسێش پەی ئاژانسەکەیما کەردۍ.
لۆرا کاستێل فۆرتە ئانەش وست ڕووە کە هەلومەرجی گۆشەگیری کە عەبدووڵا ئۆجالان چنەشەنە راگیریان هیچ پەیوەندیێوەش بە یاسای و لایەنی مرۆڤییوە نییا و واتش، "بە قەناعەتوو من جە ئیمراڵینە رژێمێوە گۆشەگیری وەشکریان و حکومەت جە تورکیایچەنە رژێمێوە گۆشەگیریش بنیاڎنیان. جە کارو چالاکییەکا ۋەڵتەریمانە بە شێوێوە ڕۊشن دیما کە بەڕێز ئۆجالان رووبەڕوو ئەشکەنجەی دژواری بیەنۆ".
'جە گواتیمالایچەنە نمونەی هامشێوەو ئینەی بیەیش نییا'
سیناتۆر لۆرا کاستێل فۆرتە دەسنیشانش کەرد کە نمونەو گۆشەگیری جە ئیمراڵینە جیهانەنە بیەیش نییا و پی جۆرە بەردەوامە بیە: "ساڵەکا ١٩٧٠-١٩٨٠ جە گواتیمالایچەنە سیستمێوە و رژێمێوە پی جۆرەو گۆشەگیری نەوینیان. چا سەردەمەیچەنە بەردەوام ڕادریۍ پەیوەندی بە زیڼانیاوە بکریۆ. بەڵام هیچ هەواڵێوە جە بەڕێز ئۆجالانیۆ ۋەردەس نییا و ئینا ئاژێوە گۆشەگیری چڕەنە. ئانە پاشێلکەردەی مافەکا مرۆڤین و نمەکریۆ ۋەران ۋەرشەنە بێدەنگۍ بیمۍ".
'جە ۋەرا ۋەروو گۆشەگیرینە بێدەنگبیەی بە ماناو پەسەڼکەردەیشا'
لۆرا کاستێل فۆرتە رەخنەش جە بێدەنگی ۋەرپەرسا مېیاننەتەوەیی جە ۋەرا ۋەروو پاشێلکارییەکانە جە ئیمراڵی گېرت و واتش، "بێدەنگی جە ۋەرا ۋەروو پاشێلکارییەکا پی جۆرەو مافەکا مرۆڤینە، جە حەقەتینەنە بەماناو وەرگیریا جە ئەنجامدەرا ئی ئەشکەنجەیە. رێکوزیا مېیاننەتەوەییەکا پېسە ئەنجومەنوو ئەوروپای و نەتەوەیۆگێرتەکا کە ماچا ئاڎۍ جە دژوو پاشێلکاری مافەکا مرۆڤی مرداوە، ۋەرا ۋەر بە مژاروو عەبدوڵا ئۆجالانی هەڵای بێدەنگېنۍ ئانە دەبڵ ستاندەری و دوو فاقی ئا رێکوزیا و دەوڵەتا بە شێوێوە ڕۊشن نیشانە مڎۆ".
