دەربارەی ساڵیاڎوو شۊڕشوو 'ژەنی، ژیوای، ئازاڎی'،  وەرکەوتوو کوردستانی و ئێراننە و دلێنەو ئا شۊڕشییە عەلی کەریمی نویسەر و سیاسەتمەداروو کوردی پەی ئاژانسوو هەواڵوو فورات (ANF)ی، قسێش کەرڎۍ و باسوو ورڎەکاریی شۊڕشەکەیش کەرد.

'جوانتەرین و خاستەرین درووشم بۍ پەی دۊخوو ئێرانی'

عەلی کەریمی سەبارەت بە شناسنامەو شۊڕشەکەی واتش: "ئا شۊڕشە جە وەرکەوتوو کوردستانینە وەختوو نیای جەنازەو گەشمەرڎە کناچە گەنجەو کوردی ژینا ئەمینی-ێنە مانگەو ئەیلوولوو ساڵەو پاروو شاروو سەقزینە دەسش پەنە کەرد، درووشمێوە بۍ بەتەمامەتی یاگۍ وێشنە بۍ، جوانتەرین و خاستەرین درووشم بۍ پەی دۊخوو ئێرانی، ئا درووشمە بەتەمامەتی شناسنایی شۊڕشەکەی و مافەکاو ژەنا کەرۍ، کەلیمۍ یوەمەو درووشمەکۍ (ژەنی) بۍ، لە دەوڵەتێوە پێسە کۊماروو ئیسلامیی ئێرانینە، کە ماوەو ٤٤ ساڵان ژەنی ساعیبۍ حیچ مافێوە نییەنۍ، پەوکای ئا درووشمە جەختش وەنەو مافەکاو ژەنا کەرڎۊ، هاموەخت کەلیمۍ دووەمەو درووشمەکۍ (ژیوای) باسوو ئا دۊخەیە کەرۊ، کە دماوا فاڕیای ڕژێموو پاشایی و ئامایسەروو هەرمانەو دەسەڵاتوو کۊماروو ئیسلامیی ئێرانی چێوۍ چا وەڵاتەنە نەمەنەنۊ بە نامۍ ژیوا، بەتایبەتیچ پەی گەنجا و ژەنا. پەوکای وەختوو بەخاک ئسپارای جەنازەو ژینێنە جە مەڕاسیمەکەنە جوامێرێوە هاوارش کەرد (ژەنی، ژیوای، ئازاڎی)، بە جارێوە ئا درووشمە پێسە بورکانێوە تەماموو ئێرانینە وەڵا بییۊ، کەس نەمەن ئا درووشمەیە نەواچۊوە، تەنانەت بنەیانەو شای وەڵینیچ واتشاوە".

"ئا درووشمە جە تێزەکاو ڕابەروو گەلوو  کوردی، عەبدوڵڵا ئۊجالانیوە سەرەش ورڎان"

دەربارەو شناسنامەو درووشموو شۊڕشەکەی، عەلی کەریمی واتیچش: "دروشموو 'ژەنی، ژیوای، ئازاڎی' درووشمێوە بۍ لاو ئا هێز و لایەناوە باوڕشا بە خەباتوو ژەنا و مافوو ژەنا هەن، ئا هێزۍ کە باوڕشا هەن مشۊم ژەنی هامبەشەو ژیوای بۊ، ژەنی هامسەرۊکە و گەریلا بۊ. ێت. ئی بابەتەیچە بڕیانۊ و قسێش سەر نییەنۍ. کە وەرنیشتوو کوردستانینە و تەڤگەروو ئازاڎیینە سەرەش ورڎان، من پەی وێم هاگادارنا پراکتیکنە دماو تێزەکاو ڕابەروو گەلوو کوردی، عەبدوڵڵا ئۊجالانی چندین ساڵێن هەرمانەش سەرۊ کریۊ و دلۍ تەڤگەروو ئازاڎیینە ئەوەڵ جە کۊشیای سەرنیشتوو کوردستانینە و دماییچ جە وەرنیشتوو کوردستانینە زۊر بەهەسی هەرمانەش سەرۊ کریا، سەروو ئا بنەمێوە سیستموو هامسەرۊکییشا سیستموو ئۊرگانەکاشانە وەش کەرد و سەرچەمە و ئیلهاموو شۊڕشەکەو وەرکەوتوو کوردستانی و ئێرانیچ حەر تەڤگەروو ئازاڎیین."

"ناوەندوو هامکاری گرد چیو بۍ بەس هامکاریی نەبێ"

دەربارەو بەجیهانیبییەی شۊڕشوو ژەنا بە سەرمەشقایەتیی کورڎا و دۊخوو دلۍ کورڎا، ئا نویسەرە باسوو ئانەیشە کەرد: "درووشموو 'ژەنی، ژیوای، ئازاڎی' ئاستوو مەنتێقەییش ویەرنان و دنیانە وەڵا بییەنۊ، فرەو وەڵاتایجەنە بەکوردی وچیۊوە. بێگومان ئانە کە پەیوەندییشبە دلۍ وەڵاتوو وێماوە هەن، کوردستاننە ئێمە حەر جە ئەوەڵۊ داواما کەرڎە، مشۊم بەرژەوەندیی گەلەکەیما وەڵۍ گردوو بەرژەوەندیەکاوە بنریۊرە، پەی ئینەیچە پێویس بۍ گردوو پارت و لایەنە سیاسییەکاو کوردستانی بەرێوە یۊگێرتە وەش کریۊ پەی وەرگێریی وەنەو کۊماروو ئیسلامیی ئێرانی و سەروستەی ئا شۊڕشەیە، هاموەخت پەی گردوو دنیێچ سەلەمنمێش ئێمە پێسە گەلوو کوردی دنیانە سەرمەشقۍ ‌شۊڕشوو ژەنانمۍ ئانە ئێمەنمۍ، کە ئا شۊڕشەما بونیات نیان. بە داخۊ بڕۍ جە هێزە سیاسییەکاو وەرکەوتوو کوردستانی، کە وێچشا بە ڕەسەن مزانا و ئجۊشامشۊم حەر قسۍ وێشا بۊ، نامۍ سەروو ئا تەوازوعەیە کە پێوە هەرمانە کەرمۍ و چێوێشا وەش کەرد بە نامۍ (ناوەندوو هامکاری)یوە، وەلۍ ناوەندوو هامکاری گرد چیوۍ بۍ بەس هامکاری نەبۍ. ئا ناوەندووهامکارییچە تەنیا دووۍ هێزۍ سیاسیۍ بە نامۍ کۊمەڵەی و دیموکراتیوە بێنۍ. کە حەرکەسە و یاگۍ وێشۊ ئەسپوو وێش تاو دۍ و بڕێشا چەنی کوڕوو ڕەزا شای کوۍ بێنێوە، کە ئا خێزانەو شایە زیاتەر جە چل ساڵان بێدەنگێنۍ و حیچ دەورێوەشا جە مەیدانی سیاسیی ئێرانینە نیا، کوڕوو شایچ بڕۍ لومپەنۍ و چەقۊکێشۍ و موعتادێش کیانۍ پەی جادەکاو پاریسی تا ئا شۊڕشوو وەرکەوتوو کوردستانی و ئێرانی چەواشە کەرۊ و ئیسفادەی نامەشروع چا پڕۊژەینە کەرا، بە داخۊ بەشێوە جە هێزە سیاسییەکاو کوردی لوۍ چێروو سەیەو ئا سیاسەتەو کوڕوو شاو ئێرانی و بیۍ بە بەشێوە چا پڕۊژە گڵیاوەیە، کە ئشیا ئانەشا نەکەرڎۍ، بەڵکوم بەپێچەوانەوە ئشیا هامپەیمانییشا چەنی هێزگەلێوە تەری وەش کەرڎۍ، کە ساعیبوو ئا درووشمینۍ و پێوە دەسوو یۊیما گێرتۍ و هێزێوە هامبەشی چەکدارییما وەش کەرڎۍ.

عەلی کەریمی هەڵوێستوو پەژاکیش بارەو شۊڕشوو وەرکەوتوو کوردستانیوە بەرز نرخنا و واتش: "جە ئەوەڵوو شۊڕشەکەیۊ فکرما وەختۍ خەریکۍ کۊکەرڎەیۊ حزبەکا بێنمۍ تا هەماهەنگۍ بیمۍ و پەیوەندیما بۊ یۊگێرتۍ بیمۍ، پەیوەندیم بە پارتوو ژیوای ئازاڎوو کوردستانیوە کەرد، تا بەشدارۍ یەکڕیزی و یۊگێرتەیی با، بە گرد نۊعێوە پەشتگیریی وێشا ئەرەیاونا پەی گرد ڕێککەوتەی و هەماهەنگیێوە، کۊمەڵەو کاک سەید ئیبراهیمیچ بە هەمان نۊع، ئوەڵۊ هەرمانەکۍ خاس لوۍ، وەلۍ دماتەر بڕۍ هێزۍ و لایەنۍ ئامۍ دلێما و وەنەشا تێک دایمۍ."

'سەرمەشقایەتیی سەرەورڎای کەرڎۍ، تا سەرکەوتەی ئا شۊڕشەیە درێژەش دەیدۍ پەنە'

کەریمی ئاخریچۊ واتش: دەربارەو گەلوو ئێرانی و وەرکەوتوو کوردستانی، مشۊم ئێمە سپاسی تایبەتییشا کەرمۍ، چونکوم فیداکاری و سەرمەشقایەتیی گەورەشا پەی ئا شۊڕشەیە کەرد، هومێدەوارێنمۍ جە ساڵیاڎوو ئا شۊڕشەینە جارێوە تەر شارەکاو سەقزی، پاوەی، کرماشانی، سنەی و مەریوانی و... هتد، سەرمەشقایەتی پەی سەرەورڎای کەرا و تا سەرکەوتەی ئس شۊڕشەیە درێژەش بدا پەنە.  

س.ز