ڕۊنامەو شەرقی ئێرانی ڕاپۊرتێوەشنە تایبەت بە ژەنکوشتەی کە هیزی ڕۊو چوارشەممەی وەڵاش کەرڎەنۊ، باس جە ژەنکوشتەی کەرۊ وەرکەوتوو کوردسانی و ئێراننە و ماچۊ، کە ماوەو دووە ساڵی ویەرڎەینە جە هەر چوار ڕوێنە ژەنێوە کوردساننە و ئێراننە کوشیێنە.

 جە ڕاپۊرتەکەو ئا ڕۊنامە ئێرانییەینە پێسە باس جە ئامارەکا کریان، ١٠٨ ژەنۍ جە لایەنوو پیایەکاشاوە، ١٧ ژەنۍ ڕاو براڵاشاوە، ١٣ ژەنۍ ڕاو تاتاشاوە، ٩ ژەنۍ بە دەسوو کوڕیشا و ١٩ ژەنێچ بە دەسوو کەسوکاری تەریشا پێسە هەسوورەی، هێوەری، مامۊ، لالۊی و کەسای تەریوە کوشیێنۍ.

 هەرپاسە ڕاپۊرتەکە سەبارەت بە چەنیەتیی کوشتەی ژەنایچ ماچۊ، کە ٤٣ ژەنۍ بە چەک و ٤٠ ژەنۍ بە چەقووە کوشیێنۍ، هەرپاسە ٣٥ ژەنۍ خنیکیێنۍ، درای وەنەشا و سۊچیێنۍ، ٣٧ ژەنێچ بە شکڵۍ نۊعاونۊع پێسە وستەیرەواری بەرزاییوە و ١٠ ژەنێچ بەنادیاری کوشیێنۍ، جە ١١ کەیسایچنە، بکوش دماو کوشتەی ژەنەکۍ، وێجش کوشتەنۊ.

 یاگۍ باسین ڕاپۊرتەکەنە ئشناسنامەو هەر ١٦٥ ژەنە کوشیایەکا و شۊنەو ژیوایشا ئاشکرا کریێنە و وچیان، ٤١٪ی ژەنە کوشیایا پارێزگاو تارانینە بیێنۍ و ئەوێچۍ پارێزگایەکای تەرنە، پێسە سنە، کرماشان، ورمۍ، ئیلامی و لوڕسانی جە وەرکەوتوو کوردسانینە.

ئینجا ڕاپۊرتەکە کەسۍ پەیوەندیدارۍ پا کەیساوە دلێشنە قسێشا کەرڎێنۍ و ئاشکراشا کەرڎەن کە ئا ئامارۍ میدیاو ئێرانی بارەو ژەنکوشتەیۊ وەڵاشا کەراوە، فرە کەمتەرێنۍ چا ئامارا ڕاسییەکاو ژەنکوشتەی.

س.ز