ڕۊنامەو ئیعتمادوو سەر بە ڕێفۊڕموازەکاو ئێرانی ڕاپۊڕتێوەنە وەڵاش کەرڎەنۊ، "ئەوەڵوو دەسبەکاربییەی دەوڵەتوو ١٣یەمیوە بە سەرۊکایەتیی ئیبراھیم ڕەئیسی، بەینوو مانگەو ئابوو ٢٠٢١ تا ڕۊو ٣٠ی ئابوو ٢٠٢٣، لاو کەمیوە ١١٠ مامۊسۍ زانکۊی بەزۊرەملۍ لە وانەواتەیۊ دوورۍ وزیێنێوە. فرێچشا دوورۍ وزیێنێوە یا بەناچاری خانەنشینۍ کریێنۍ.  

ڕاپۊڕتەکۍ جەخت وەنەو ئانەیچە کەرۊوە، ژمارەو ئا مامۊسایا کە جە هەرمانۍ دوورۍ وزیێنێوە، فرە چا ژمارەیە زیاتەرا کە وەڵا کریانۊ و تەنیا پەشتیشا پا زانیارییا بەستێنە، کە بەڕسمی یەکلایۍ کریێنێوە.  

بە پاو ڕاپۊڕتەکۍ، زانکۊکاو ئازاڎ، تاران، زانستە پزیشکییەکاو تارانی، عەلامە تەباتەبایی و گەشمەرڎە بەهەشتی فرەتەرین مامۊسۍ، ڕووبەڕووۍ قەرارەکاو دووروستەیۊ، بێبەشکەرڎەی جە وانەواتەیۊنە، بڕیەی مووچەی، دماییئارڎەی بە هامکارییەکاشا و ھەرپاسە خانەنشینکەرڎەی بەزۊری بیێنێوە..

بە پاو ڕاپۊرتەکۍ ڕۊنامەو ئیعتمادی فرەترین حاڵەتۍ دووروستەیۊ مامۊسایا چی زانکۊیانە تۊمارۍ کریێنێ: زانکۊی ئازاڎ ٢٩ حاڵەتۍ، زانکۊو تارانی ٢٧ حاڵەتۍ، زانکۊو زانستە پزیشکییەکاو تارانی ١١ حاڵەتۍ، زانکۊو عەلامە تەباتەبایی ٨ حاڵەتۍ، زانکۊو گەشمەرڎە بەهەشتی ٧ حاڵەتۍ، زانکۊو زانستە پزیشکییەکاو ئێرانی ٥ حاڵەتۍ و زانکۊکاو فیرڎەوسیی مەشهەدی و گەشمەرڎە باهۊنەروو کرمانی حەریۊ ٣ حاڵەتۍ.

حەرپاسە حەریۊ جە زانکۊکاو کورڎسان، ئەسفەهان، سەنعەتی شەریف و زانستە پزیشکییەکاو بابۊلی ٢ حاڵەتۍ، زانکۊکاو گیلان، شیراز، مازەندەران، زانستە پزیشکییەکاو کرماشان، جەهرۊم، حەکیم سەبزەواری، زانستە پزیشکییەکاو تەورێز، خەلیجوو فارس و ئەلزەهرای حەریۊشا یەک حاڵەت جە دووروستەیۊ مامۊسایا تۊمار کریان.

بەپاو شۊنیرەلوایەکاو ڕۊنامەکەی، فرەو ئا مامۊسایا ماوەو سەرەورڎای 'ژەنی، ژیوای، ئازاڎی'ینە بۊنەو  پاڵپەشتیکەرڎەی جە وێنیشاندایەکا و هامپەشتی وانەراو زانکۊی و ئیمزاکەرڎەی بەیاننامە ناڕەزایەتییەکا، جە هەرمانۍ دوورۍ وزیێنیوە و وانەواتەیۊشا وەنە لۍ قەدەغە کریان.  

ئینەیچە جە وەختێوەنە ماوەی ویەرڎەنە و چەنی نزیکبییەیۊ یوەمین ساڵیادوو سەرەورڎای 'ژەنی، ژیوای، ئازاڎی'، شەپۊلێوە تازۍ دووروستەیۊ مامۊسایا ئێراننە و وەرکەوتوو کورڎسانینە دەسش پەنە کەرڎەن، ئانەیچە ناڕەزایەتیی وەرفراوانش دلۍ و جبەروو ئا وەڵاتەینە وەنە کەوتەنۊ و چا چوارچوەیچەنە، ڕۊو ٢٩و ئابیوە ھەڵمەتێوە کۊکەرڎەیۊ ئیمزایا تۊڕە کۊمەڵایەتییەکانە پەی پەشتیوانی چا مامۊسایا، ئەرەیاونیێنە هاموەخت بڕۍ جە وانیارا جەختشا کەرڎەنۊ، پێسە پاڵپەشتیی مامۊسایا بایکۊتوو ھۊڵەکاو وانای کەرا.

س.ز