گەریلاکۍ یەژاستاری کە جە هەرېموو مەتینای ۋېڕاگری مکەرا، جەبارەو ئا جەنگەیۊ کە جە هەرېمەکەنە ئینا ئارانە پۍ ئاژانسوو هەواڵی فورات(ANF)ی قسېشا کەرڎۍ.

خوندا کۊبانیە، گەریلۍ یەژاستاری ئەرەیاۋناش،جە مېڎانوو کەش و ئۊرتۍ و چارچەلی مەتینای، هامڕېکېما مدرامانۍ گۊرە کەراو  ۋاتش:"ئېمە هېزەکۍ یەژاستاری و هەپەگەی، دژوو دوژمنی جەنگۍ گۊرە کەرمۍ،دۊڵەتوو ترکی ئەرەگیری سەرەڕاو بەکارئارڎەی تەکنیکی جەنگیچ جە وەران ۋەرمانە مەتاۋۊ سەر گنۊ. ئېمە هېزوو گەریلای گورزەی قورسە ئەو ئەرەگیرا مڎەیمۍ، مدرامانما گەشتەر کەرمۍ و میاونمېش بەبەرزتەرین ئاست. مدرامانما ئیسفاڎە جە ڕابەر ئاپۊی و هامڕایاما، کە پەی ئازاڎیی گەشمەرڎۍ بیۍ، هۊرگېرۊ. دۊڵەتوو ترکی جە حەر بستېوە خاکوو کورڎسانینە کە ئەرەگیرش کەرڎەبۊ، هېزەکۍ گەریلای ڕووبەڕووش مرڎاوە.

تەئکیدش کەرڎۊ، پارېزنای خاکوو کورڎسانی تەنیا ئەرکوو گەریلای نیا، ئەرکوو گرڎوو گەلوو کورڎیا. چونکی ئی قۊناغۍ، قۊناغېوە ویژدانیەنەو گرڎ کەسۍ گېرۊوە. پەنەوازەن گرڎ کەسۍ دەوروو ۋېش چی قۊناغېنە گېڵنۊ. گرنگا خەڵکوو کورڎسانی بزانا، کە هېزەکۍ گەریلای پۍ ئانەی ئازاڎیی گەلوو کورڎی بەدی بارا، ۋېڕاگری مکەرا. ئەگەر ئېمەی گەلوو گەریلا پېوەرە کۊشیای کەرمۍ، دۊڵەتوو ترکی ئەرەگیری شکس مارۊ. ئېمە گەریلاکا یەژاستاری پۍ ئازاڎیی گەلەکەیما تا دما هەناسە ۋېڕاگری کەرمۍ و ئازاڎیی گەلەکەیما مسۊگەر کەرمۍ.

حەرپاسە سڵاڤ فراتە، گەریلۍ یەژاستاری جە بارەو مدرامانوو مەتینای ۋاتش،"بەتاکتیکەکا گەریلای پڕۊفیشناڵی دوژمنی کەرمېنە ئامانج. ئېمە گەریلاکا یەژاستاری و هەپەگەی جە مېڎانەکا مدرامانی جە مەتینانە هەناسە جە ئەرەگیرا بڕمۍ. بە هېزوو ئیراڎېوە کە جە ڕابەر ئاپۊیۊ هۊرما گېرتەن، ئۊپەراسیۊنوو دۊڵەتوو ترکی دلېنە بەرمۍ، پېسە مزانیۊئەرەگیرەکۍ بە چڕی هجوم کەرا سەروو مېڎانەکا مدرامانوو مەتینای. جە ۋەران ۋەرەنە هامڕېکېما بە پەشت بەستەی بە هېزوو ئیراڎەی گۊرۊ، گورزەی قورسە ئەو دوژمنی شانا. چېش بۊ با بۊ، سازش سەروو مدرامانی دژوو ئەرەگیرا مەکەرمۍ. ئەرەگیرەکۍ ۋەران ۋەر بە مدرامانوو مەتینای شکس مارا. ڕا مەڎەیمۍ ئەرەگیرەکۍ خاکوو کورڎسانی پاشېل کەرا. تا دما هەناسە ۋېڕاگری کەرمۍ و سەرکۊتەی مسۊگەر کەرمۍ".