مه‌زڵوم عه‌بدی داوێوەش وەنەو هێزه سیاسی و سه‌روازاییه‌كاو كوردی كەردە
فه‌رمانڎه‌ی گرڎینوو قه‌سه‌دەی په‌یامێوەش ئاڕاسته‌و كۆنفرانسوو لۆزانی كەرد و داواش جە هێزە سەروازی و سیاسییەکاو کوردسانی كەردە، "به‌بۍ مەرج، گنا وۍ و قۆناغه‌كەی ورسەنگنا".
مه‌زڵوم عه‌بدی، فه‌رمانده‌ی گرڎینوو هێزه‌كاو سووریای دیموكراتیك (قه‌سه‌ده)ی، په‌یامێوە ڤیدۆییش ئاڕاسته‌و كۆنفرانسی میاننه‌ته‌وه‌یی په‌یوه‌ست به په‌یماننامه‌و لۆزانی كەرد.
مه‌زڵووم عه‌بدی باره‌و په‌یماننامه‌و لۆزانیوە واتش: سیاسه‌توو نكۆڵیكەرڎەی، كه به په‌یماننامه‌و لۆزانی دەسش پەنە کەرد، هیچ ئه‌نجامێوەش به‌ده‌س نارد و شكسش ئارد. ئارۆ جە وەرکەوتوو دلێڕاسەینە فرسەتێوە پەی كورڎا ڕه‌خسیان، كه ڕاسیی بییەی وێشا و دۆزه‌كه‌یشا جه نه‌خشه‌و وەرکەوتوو دلێڕاسەینە بسه‌لەمنا.
ئاماژه‌شپەی ئانەیچە کەرڎە، كورده‌كۍ پا گیانبازییه گه‌وره‌یه كه دانشا، ده‌سكه‌وتی گەورەشا به‌ده‌س ئارڎەن و واتش: جە هه‌ر چوار پارچه‌و كوردسانینە، پانیشت، سەرنیشت، وەرکەوت و وەرنیشتوو كوردسانینە، هاموەڵاتاو كوردی هه‌وڵۍ مدا مافوو وێشا كه پاشێل كریان، ده‌سه‌به‌ر کەرا.
عه‌بدی پەی پارێزنای ئا ده‌ستكه‌وتا داوێوەش کەرڎە و واتش: پەنەوازا ئێمه شۆنەو ڕێوەرە پەی پارێزنای ئا ده‌سكه‌وتا گێڵمۍ. پانیشتوو كوردسانینە ده‌سكه‌وتۍ هه‌نۍ، كه مشۆم پارێزگاری و پاڵپەشتیشا چەنە کریۆ. سەرنیشتوو كوردسانینە هه‌وڵدای و مدرامانێوە گه‌وره وەراوەروو سیاسه‌توو نكۆڵیكەرڎەی ملۆ ڕاوە. مشۆم پاڵپەشتی جە گه‌لوو سەرنیشتی کریۆ. مشۆم هاگاما جە شۆڕشوو وەرکەوتی بۆ تا یاوای بە مافەکاشا، هاموەخت پاڵپەشتیی وەرنیشتیچ.
فه‌رمانده‌ی گردینوو قه‌سه‌ده‌ی، داوێوەش ئاڕاسته‌و گه‌لوو كوردسانی، به‌تایبه‌تی هێزه سه‌روازی و سیاسییه‌كا كەرڎە، جە كۆشیای و مدرامانی نەمرڎا، هێز و گوتاروو وێشا وزا یۆ،بەبۍ مه‌رجی وەڵین، گنا وۍ و قۆناغەکەی بەڕۆشنی ورسەنگنا".
عه‌بدی جه‌ختیچش كەرڎۆ، قه‌سه‌ده پەی چاره‌سه‌ركەرڎەی پەرسەو كوردی و به‌دیئارڎەی یۆبییەیی هێزه‌كا، پەی گرد دیالۆگێوە ئاماده‌ن.
مه‌زڵوم عه‌بدی ویرش ئارڎێوە، قه‌سه‌ده پەی پێكئارڎەی یۆبییەی هێزه سیاسییه‌كا جە وەرنیشتنە دەسوەڵێوستەێوەش ئەرەیاونابۍ و واتش: جە ڕاو دەسوەڵێوستەکەیماوە هەوڵێما دۍ، کە هێز و لایه‌نه سیاسییه‌كاو مەنتێقەکەی ڕێکۍ وزمۍ. ئێمه لسه‌روو نه‌خشه‌ڕێوە گه‌یه‌كی سیاسیێوە ڕێكۍ كه‌وتێبێنمۍ، وەلی ئا دەسوەڵێوستەیە ئەرەگیریا. وەروو ئانەی ئا دەسوەڵێوستەیۍ درێژەشا بۆ ئامادێنمۍ چەنی گردوو لایەنە سیاسییەکاو کوردسانی نیشمێرە. ئی قۆناغە قۆناغوو خەباتی هامبەشین ، هومێڎ کەرمۍ لایەنە کورڎییەکۍ سەروو میزەو دیالۆگیوە بنیشارە.
س.ز
