جەمەو ڕۆنامەنوویسا ژەنا میزۆپۆتامیای (MKG) گوزارشتەو مانگۊو حوزەیرانیش سەبارەت بە پاشێلکارییەکا مافو ژەنە ڕۆنامەنوویسا وەڵا کەرڎۆ. جە گوزارشتەکېنە ئامان کە پاشێلکارییەکې ۋەرا ۋەر بە ژەنە ڕۆنامەنوویسا جە مانگۊو حوزەیرانینە درێژەش هەن. جە هۊرسەنگناکەیشەنە باس چانەی کریان کە هەرمانەو ڕۆنامەنوویسی بە تاوانە مزانیۆ و پا بۆنۆ ڕووبەڕوو فشارەکا بۆوە.

هەرپاسە جە گوزارشتەکېنە ئامان کە چی مانگێنە فرێوە جە ڕۆنامەنوویسا باڵبەسې و زینانی کریێنې و جە درێژەو ئەرەیاۋناکەینە ئامان: "یۆ جە ڕوودایە دیارەکا ئی مانگې هەڕەشەکەردەی بیەن پەی سەرو پەمکیانەو ئاژانسوو میزۆپۆتامیای زەینەب دورگوتې سەبارەت بە گوزارشتێوەش سەرو کەیسێوە تاوانکاری، زەینەب دورگوتە جە لایەنو ئا کەساوە کە نامېشا جە گوزارشتەکېنە ئامان هەڕەشێش ۋنەکریا و ئی ئاژە دیسان بیەن بە مەترسی سەرو ڕۆنامەنوویسا.

جە بەردەوامی گوزارشتەکېنە ئامان: "جە پاشێلکەردەی ئازادیی ویر و ڕابەربڕیەینە، ژمارەو ئا دۆسیا کە جە دژو ڕۆنامەنوویسا کریێنێوە، سزاو زینانیشا سەرەرە سەپیان و دادگاییکەردەکې بەرش وزا کە دەسەڵاتی دادوەری ڕۆنامەگەری پېسە ئامێرێوە فشاری بەکارمارۆ و هەرجۆرە چالاکیێوە چا بارۆ بە تاوانە منیۆرە، پۊکەی ئینە نیشانەش مڎۆ کە ئازادی ڕابەربڕیەی بە شێوێوە سیستماتیک ڕاش ۋنە گیریۆنە.

هەرپاسە جە بوارو مافە ئابووری و کۆمەڵایەتییەکانە، بەرکەردەی ئا ڕۆنامەنوویسا کە پەی دەنگو ئەمەریکای هەرمانە مکەرا، جارێوەتەر کاریگەریی نەرێنی سەرو ڕۆنامەنوویسا وەش مکەرۆ."

مەکەگە جە درێژەنە سەرنج وزۆ سەرو پەنەوازی پارېزنای مافە بنەڕەتییەکا ڕۆنامەنوویسا، بەتایبەتی جە بوارو سڵامەتی، ئازادی ڕابەربڕیەی، مافو هەرمانکەردەی، هەرپاسە دمایئاردەی بە ئاستەنگییەکا ۋەردەمو مافو ڕۆنامەنوویسا جە وەشکەردەی گوزارشتەکا و دمایئاردەی بە ۋنەپەرسایۆ و پاشێلکاریی مافەکاشا.

مەکەگە جە گوزارشتەکېنە، ئی پاشێلکاریێشە ئاشکرا کەردێنې: "هرووژم کریان سەرو ٢ڕۆنامەنوویسا و دەزگاکا ئەرەیاۋنای، هۊرشا کوان سەرو یانەو ٣ڕۆنامەنوویسا و ٧ ڕۆنامەنوویسې باڵبەسې کریێنې، ٢ ڕۆنامەنوویسې زینانیې کریێنې، ٢ڕۆنامەنوویسې مامەڵەی نەشیاوشا چنی کریان، هەڕەشې جە ٣ ڕۆنامەنوویسا کریان، ڕاگیری جە ٢ڕۆنامەنوویسا کریان ۋنەپەرسایۆ پەی ٢ ڕۆنامەنوویسا کریانۆ و ٢ ساڵې و مانگێوە زینانی پەی ڕۆنامەنوویسێوە بڕیانۆ، ١٠دۆسیې کە دژو ١١ڕۆنامەنوویسا کریانۆ بەردەواما، ٧ ڕۆنامەنوویسې زینانی کریێنې، مافو هەرمانې جە ڕۆنامەنوویسێوە سنیانۆ و ئیجازەو ڕۆنامەنوویسێوە هاڵی کریانۆ."