ڕۊو ١٠ـو ئایاروو ١٩٧٥ ڕۊنامەو کەیهانی هەوایی، دماو هەرەسوو شۊڕشوو ئەیلوولی و ورئامای مەلا مسەفای و دەسوپێوەندەکەیش پەی کەرەجی، دیدارێوەش چەنی مەلا مسەفای وەڵا کەرڎۊ. ئی واتەواچە ئەمیر تاهری، سەرنویسەروو ڕۊنامەو کەیهانی چەنیش کەرڎەن.
دیدارەکە بە قسەکاو مەلا مسەفای دەس پەنە کەرۊ وەختۍ ماچۊ:
هەرمانەو من تەمامیێنە، من ئیتر دەورێوە چانەم جە ڕابەرایەتیی کورڎەکاو عێراقینە مەبۊ.
ڕۊنامەکە ماچۊ: ئی جەختکەرڎەیۊ مەلا مسەفای نیشانەش مدۊ، کە سەرڎەمێوە گرنگی تارێخیی وناوی عێراقنە پەی دایمەی وزیانەرە.
دماتەر ڕۊنامەکە درێژەنە ماچۊ:
بارزانی ئیساتۍ چەنی خێزانەکەیش نزیکوو تارانینە مژیوۊ، سەرنویسەرەکەو کەیهانی ماچۊ: وەختۍ حەفتێوە چێوەڵتەر لوانۍ دیدارش، فرە وەشحاڵ ئرمانۍ،وەختۍ باسوو مرکیایرەی جەنگیش لای سەریی عێراقی و ئاخروو ژیوای سیاسی و جەنگیی وێشنە کەرۍ، وچکلەکتەرین نیشانۍ تاڵی و پەژارەی قسەکاشۊ دیارە نەبۍ.
ڕۊنامەکە درێژەنە ماچۊ: مەلا ئیساتۍ جلوبەرگی کوردییش نیان لاوە و چاکەتوپانتۊڵ کەرۊنە و بۊینباخ بەسۊ، سەرانسەروو ئا دیدارە ٩٥ خولەکییەینە زوو زوو ئەوەخوایش کەرۊوە:
من بەندێوە ناچیزوو خودای گەورەینا، گرد چێوۍ وەڵتەر دلۍ چارەنویسینە نویسیان و بەندەکێش مەتاوا چەنەش وربەیا.
بارزانی واتش: حەرگیز پێسە ئارۊی هەستم بە تەندروسی و ئارامی نەکەرڎەن، مەتاوو تەسەوروو دماڕۊی کەروو، وەلۍ متاوو واچوو گێرا حەرگیز نەگێڵووە عێراق.
درێژەو قسەوباسوو ڕۊنامەکەینە مەلا مسەفا باسوو ڕێککەوتەی جەزایرینە ماچۊ: حیچ هاگام جە ڕێککەوتەیەکەی نەبییەن، وەلۍ پەشتیوانیی ئی ڕێککەوتەیە کەروو، چونکوم خاسەو گەلاو ئێرانیش ئینا چەنە، هەرچی خێرەو ئێرانیش چەنە بۊ، یاگۍ ڕەزامەندیی گردوو کورڎەکان.
چا وەختانە مەلا مسەفا ئی قسا کەرۊ، پانیشتوو کوردستانینە هەڵمەتەو ڕەمنای و تۊپواران و ورواستەی و گولـلەوارانکەرڎەی و مرکنایراوەو ئەوەمەنەو شۊڕشەکەی هەڵای بڵێسە سانۍ وەرکەوتوو کوردستانیچنە گەلوو کوردی بنەو هەڕەشاو دەزگا خۊفناکەکەو ساواکی و ئایدۊلۊژیاو ڕەگەزپەرەسیی شاهەنشاهیی فارسیینە بێنۍ.
بارزانیی درێژەنە ماچۊ: ماوەو یەک ساڵوو جەنگینە جگە جە ئێرانی کەس یارڎەی کوردیش نەدا.
بارزانی ماچۊ: ئانۍ هەڵسیی تیمساحیۍ پەی کوردی مجا، مەبەسشان تەنیا هجوومی میدیایین دژوو ئێرانی، ئێمە ئێرانش چەنە ترازیۊ، وێما بە قەرزارۍ هیچ دەوڵەتێوە نمەزانمۍ.
ڕۊنامەکە ماچۊ: مەلا مسەفا کە دوۍ مانگێن وازش جە دارجگەرەی ئارڎەن و ئیساتۍ پایپ کێشۊ، پاسە درێژەش بە قسەکاش مدۊ:
ئێمە گردما مەمنوونۍ ئێرانینمۍ چانەیە کە پەیش کەرڎێنمۍ، ئێمە ئێراننە چێروو سەیەو و سێبەرەو شاهەنشاینە، ڕابەریی گردوو ئارینەژادەکانە بە حورمەت و ئاسوودەییوە مژیومۍ.
ڕۊنامەکە وەنەو مەلا مسەفای پەرسۊ: ئەی کورڎەکۍ چێش کەرا؟
مەلا مسەفا جوابەکەشنە ماچۊ:
"من ئینانۍ چۍ و ئادۍ چاگە و گرد چێوۍ پەیوەندییش بە وێشاوە هەن. من ئیتر ڕابەر نییەنا و شمەیچ دڵنیا کەرووە، کە حەرگیز جارێوە تەر مەبووە بە ڕابەر، من تەمامیانۍ، موتڵەقەن تەمامیانۍ، عارەزووم ئانەن نامێم تارێخەنە سڕاوە، وەلۍ شمەی ڕۊنامەنویسۍ وازم چەنە نمارڎێ".
بارزانیی هجوومێوە تند کەرۊ سەروو ئا کورڎا، کە دژوو ئێرانی قسۍ کەرا و ماچۊ:
"ئانۍ ئینسانۍ نییەنۍ، کورڎۍ نییەنۍ، پیۍ نییەنێ".
پەی نموونەی دەربارەو یۊ چانیشا عیسمەت شەریف وانلی، بە "وێورەش" نامێش بەرۊ ماچۊ "ئانە دەعبێوەن شکڵوو ئینسانینە ".
یاگۍ واتەینە عیسمەت شەریف وانلیی یۊن جە شۊڕشگێڵن و نویسەر و یاساشناس و کۊڵیار و تارێخنویسەکاو کوردی و خەباتوو هەرچوار پارچەیش پێوە لکی دان، بە سەفیروو کورڎایەتیی نامییەن و فرەو ژیوایش ئاوارەیی و ڕەماینە بییەن دەسوو دەزگا هەواڵگێرییەکاو عێراقی و ئێرانی و سووریای و تورکیایۊ، تەنانەت وەروو ئانەیە دەزگای هەواڵگێریی عێراقی دماو ١٩٧٥ هەوڵۍ تیرۊرکەرڎەیشا دان. هەرپاسە نوێنەروو شۊڕشوو ئەیلوولی بییەن ئەورووپانە و سەرۊکوو کۊنگرەی نەتەوەیی کوردستانی بییەن.
کەچی مەلا مسەفا مشتەش لکی مدۊ و بارەو ئا زانایۊ ماچۊ:
"کەسۍ کە پێسە هەرمانە کەرۊ و وێش بە سەفارەتێوە بێگانەی ورەشۊ، موسڵمان نییا، خواوەند گرد مەوجووداتێوە بێشەرەفی چینەی سزا مدۊ".
سەرەڕاو جیا ئاستەی گەلوو پانیشتوو کوردستانی و پێشمەرگە دڵسۊز و گیانسەروودەسەکاش، کە وەختوو ئا دیدارەینە چێروو سەیەو شمشێروو دەزگای هەواڵگێریی عێراقی و سوپا فاشیستەکێشنە بێنۍ، کەچی مەلا مسەفا بە نامۍ ئادیشاوە قسۍ کەرۊ ماچۊ:
"بە باوڕوو من فرەو کورڎەکاو عێراقی چەنی بڕیەیۊ جەنگی بێنێ".
