ماڵپەڕوو ئەلمۊنیتەری نامېوە دزەپنەکریا و سەرۊک وەزیرانی ماوە سەرشیەو هەرېموو کورڎسانی ۋەڵا کەرۊوە، کە پۍ جۊبایدن و سەرۊک و ئەمریکای نۋیسیان و داواو بەپەلە دەسوەردای کەرۊ جە قوڵنەبیەیۊ قۊرتەکا بەینوو حکومەتی فیدراڵی و هەرېمینە.

مەسروور بارزانی، جە پېخامەکەشەنە ئاماژەش پانەی کەرڎەن کە ئا فشارۍ ئینۍ سەروو حکومەتوو هەرېمی، قەوارەو هەرېمیشا ڕووە و لېوارو هەرەسۍ بەرڎەن و چا ڕووانگەیچۊ داوا کەرۊ ئەمریکا بۍ سەروو خەتی.

جە پېخامەکەشەنە نۋیستەنش،"ئیسە ئا پېخامتە پۍ منۋیس و هەمڎیسان جە ساتە وەختۍ چارەنویسسازی تاریخیمانە، ئاژېوە کە تەرس و چانەینە زەحمەتیما بۊ، پۍ ئانەی سەرشەرە زاڵۍ بیمۍ، ئېمە جە ڕوو ئابوریوە ۋنیما چنە چۊڕیۊ، جە ڕوو سیاسیچۊ ۋنی جە جەستەمانە خجڵا دمایش بۍ، پۍ ئەوەڵ جاری چا وەختۊی من سەرۊک وەزیرانەنا، نیگەرانیېوە قوڵی گېرتەنارە کە ئا هەڵمەتە نا ئەخلاقیۍ کە دژما ملۊڕاوە، چانەینە بۊ بە مەڵامەتوو وڕای ئا مۊدېلە فیدراڵیەو عېراقی کە ئەمریکا جە ٢٠٠٣ ېنە پەشتیوانیش کەرڎ و چا وەختۊن پەشتیشۊ مرڎان".

حەر جە پېخامەکەشەنە مەسروور بارزانی ئانەیچش وستەن ڕووە کە حکومەتەکەش جە ڕوو ئابوری و سیاسیوە ئینا ئاژەو ئیفلیج بیەینە.

ئی پېخامە جە وەختېنە کە بارزانی جە کۊبیەیۊ ڕۊو دووەشەممەینە جە هۊلېر چنی باڵیۊزوو ئەمریکای جە عېراق ئەلینا ڕۊمانۊڤسکیېنە، داواو بەشڎاری زیاتەروو ئەمریکایش کەرڎەبۍ پۍ یاردیدایشا جە چارەسەرکەرڎەو قۊرتەکانە.

ئەلمۊنیتەر ئانەیچش ئاشکراکەرڎەن،"وەزارەت و جبەروو ئەمریکای ئاماڎەنیا جواب و پېخامەکەو بارزانی بڎۊوە و هەڵای وەرپەرسا ئەمریکای پېخامەکەشا لاو ۋېشاوە بەبۍ جواب ئاستەنۊ".

ۋەڵابیەیۊ نەواخن و  ئا پېخامەیە کاروەدایۍ فرەش شۊنەو ۋېشەرە ئارڎ و ڕۊنامەنۋیسۍ و چالاکۍ مەڎەنی هەرېمی باس چانەی کەرا، جە وەختېنە مەسروور بارزانی جە ڕاو یاۋنەریەکاشۊ پڕووپاگەنڎەو ئانەی پۍ ۋېش کەرۍ کە "سەرۊک وەزیرانی ۋېڕاگرا" بەڵام ئیسە پەی ڕزگارکەرڎەی حکومەتەکەیش، جە ئەمریکای پاڕیۊوە.

چا بارۊ کەمال چۊمانی نۋیسەرو ڕۊنامەنۋیس نۋیستەنش،"چن ڕووۍ چېوەڵتەر مەسروور بارزانی سەروو حساب و بودجەی گرڎینی دۊکیۊمېنتاریېوەش پۍ ۋېش وەش کەرڎ بەنامۍ(سەرۊک وەزیرانی ۋېڕاگریۊ)، جە ئەوەڵ ڕۊیچۊ باس جە (کورڎسانۍ بەقوەتتەری مکەرۊ)، ئی پېخامە ڕېک پېچەوانەکەیش نیشانە مۊ".

ئانەیچش وستەن ڕووە،"هیواڎارەنا ئیسە مەسروور بارزانی یاوابۊنە کە دژایەتیکەرڎەی ئازاڎیی و دیموکراسی باجەکەش ئانەن کە ۋەرودەم و گەلەکەو ۋېش و دنیېنە سەرشۊڕش کەرۊ و مشۊم چەمیۊوە، وتارەی فوکریاینە و تاکڕەوانەو پۊپۊلیستیانۍ، کە حساب پۍ پەڕلەمانی، دیموکراسی، قانون و فشاروو دلېینەی میان دۊڵەتی مەکەرۊ. توشوو ئا خەجاڵەتیتە مکەرۊ".