مەسعود بارزانی سەرۆکوو پەدەکەی جە کۆبییەێوە وزیارەنە ددان پانەیرە منیۆ،کە چەنی سوپاو تورکیش پەلکێشوو پانیشتوو کوردسانی کەردێنە و بە قسێ بەشدارێوە کۆبییەیوەکەی 'بارزانی وێچش پەی کەردەی ٣١ێوە تەروو ئابی نیشانە دێنە'.
ڕۆو ٣١و ئابی، یانێ جە ساڵیادوو خیانەتوو ٣١و ئابو ١٩٩٦ مەسعود بارزانی بڕێو مامۆسێ ئاینیێش پیرمامەنە کوێ کەردێوە، بێ ئانەیە مافوو قسەکەردەیشا بدۆ پەنە.
دماو حەفتێوە یۆ جە مامۆسا ئاینییە بەشدارەکاو کۆبییەیوەکەی، ڕاو نامێوە کە پەلیانەو شارپرێسی وەڵا کەردەنۆ، دلێنەو کۆبییەیوەکەیش ئاشکرا کەردەن.
مامۆسا ئایینیه‌كه نویستەنش:"بەئاماده‌بییەی نزیکەو (٢٠٠) مامۆسا ئاینییا کە هیچ کامشا یەکیەتیێ نەبێنێ هاموەخت فازڵ میرانی و هۆشیار زێباری و سیداد بارزانییچ بێنێ، ئەوەڵ وەڵێ ئامای مەسعوود بارزانینە،سەرۆکوو یۆبییەی زانایا، بە ڕێککەوتەی جەنی وەزیروو ئەوقافی، مامۆسێش تەڵقینی دێ، چونکوم فرێنێ نمەتاوا پرسیارێ بکەرا و بارزانی ڕاستەوخۆ کۆبییەیوەی تەرش هەن، متاوا گەر پەرسێتا هەنە بە وەرەقە بنویسدێش دمایی میاونمیش یاگێ (نەوەک نامەکا بدانە بە نەسعوود بارزانی بوانۆشۆ)، دماتەر زانیان دلء هۆڵەکەینە و ئاخرۆ ئانێ هاگادارێ بیێنێ واتەنشا نامەکێ هیچشا نمەیاوا لاو مەسعوود بارزانی."
ئانەیچە وزیان ڕووە، "دماو ئامای مه‌سعود بارزانی، جیای دەسپەنەکەردەی بە ئایەتە مەبارەکاو قورعانی، سه‌رۆكوو زانایا دەسش کەرد بە قسەکەردەی و مەدح و سەناو سەرۆکی و ڕۆو ٣١ و ئابیچ ڕوێ تارێخی و مەبارەکا و دیاریی خودایا".
پێسە ئاشکرایچش کەردەن، کە مەسعود بارزانی بە زوانێوی نزم و پەڕ جە قین باسوو نەیارەکاش بەتایبەتی مامۆسا ئیبراهیم ئەحمەد و بافڵ تاڵەبانی کەردەن و چندین کەلیمێ نەشیێش دژشا واتێنێ.
جە بەشێوی قسەکاو مەسعود بارزانیینە ددانش پانەیرە نیان، کە چەنی دژوو پەکەکەی هامکاریی دەوڵەتوو تورکی مکەرا و بانگەشەو ئانەیشە کەردەن" کە پەکەکە گەرەکش بێ مەنتێقەو دهۆکی و ئامێدیینە سەیتەرات و بنکە و بارەگا بنیۆرە و برەگۆشما نمەکەرۆ، ناچارێنمێ (ڕام پەی تورکیای کەردێنۆ، چێش مکەرۆ با بکەرۆش دژوو پەکەکەی."
مامۆسا ئاینییه‌كه كه وێش مه‌سعود بارزانىیشآ دییەن و باسوو ئانەیش کەردەن کە " مه‌سعود بارزانی هیچ وەختێوە پێسەو ئی جارەیە نەپەشۆکیابێ و مانیا دیار بێ و تەرسێوە فرێش سەروو ورچنیەی پۆوە نیشتێبێ، قسەکێچش گرد هەڕەشێ بێنێ، مەبەسش بێ بە مامۆسایا بواچۆ (ڕام بدەیدێ ٣١ ێو تەروو ئابی وەش بکەرووە و شنمە شایەتێم بیدێ کە من خەتابار نییەنا)."
ئی دداننیایپۆرەیەو مەسعود بارزانی ئینا جە وەختێوەنە کە دەوڵەتوو تورکی بادینانەنە بنکە و بارەگێ و بازگێش نیێنێرە و خاکوو کوردسانیش ئەرەگیر کەردەن و ئەنەیچ کە هامکارییش مکەرۆ پەدەکەن، کە هەر نەک هامکاری بەڵکوم پەلکێشیچش کەردەن، بە هەمان شێوە کە ٣١و ئابینە ڕژێموو بەعسیش دژوو یەنەکەی پەکلێشوو کوردسانی کەرد.
