شۊڕشگێڵن، گەریلا و ڕۊنامەوانی گەورە سیەد ئەڤران ٢٢ۍ ئەیلوولینە بۊنەو ئانەیۊ دڵش مرڎا، گەشمەرڎە بی. ڕۊنامەوان زنار یڵدزی هامڕاش باسوو کۊشیای سەید ئەڤرانی کەرۊ.

یڵدز ئوەوڵ باسوو ئانەیش کەرد، کە چەنی سەید ئەڤرانش ئشناسان: " جە کۊشیای شۊڕشگێڵنیی کوردستانینە هامڕێوە چانە بۍ، کە وەڵتەر ئشناسیۍ. ئێمە شۊنیرەلوایما پەی ڕۊنامە و وەڵاکریایوەکای تەروو کۊشیایرە کەرد. جە یوەم قۊناغەکانە من نامۍ هامڕا سەیدیم ئشاناسا، نویسیایەکام واناوە. دماو ئانەیە بەشداریم جە کۊشیاینە کەرد جە مەیدانوو گەریلاینە ئشناسام. شانازی و سەربەرزی بۍ، کە دلۍ کۊشیاینە ئادی بە شناسنامەی شۊڕشگێڵنی و ڕۊنامەوانییوە بشناسی".

ڕۊنامەوانییش پەی شۊڕشی کەرد

سەبارەت بە تایبەتمەندییە وەرەچەمەکاو سەید ئەڤرانی، زنار یڵدز واتش، "هامڕا سەید هامڕێوە چانە بۍ، کە هەست بە ئازارەکاو هامڕایەکاش کەرۍ. بەڕاسییچ زانۍ بۊ بە هامڕا. هەست بە هامڕایەکاش کەرۍ. دڵوەشی و ئازارەکاشا وینێ".

زنار یڵدز باسوو کەسایەتیی بنکۊڵکاریی سەید ئەڤرانینە واتش، "ئینسانێوە جانە بۍ، کە پانەیۊ نەمرڎۍ کە وینێش. پەی حەر ڕووەدایۍ دیۍ، پاسە مامەڵە کەرۍ، کە چێش پشتەو ئا ڕوودایۊ هەن، چێشش چەنە گنۊوە، ئاخۊم بە چێشێوە بەسیانۊ، ئایا پەیوەندییش بە چێشیوە هەن. ئانەو وەروو دەساش حەرگیز بەئاسانی قبووڵ نەکەرۍ. هەڵوێستێوە چانەش بۍ، کە بەرڎەوام پەرسێوە. جە پەیوەندییشنە چەنی ئینسانەکا مرۊڤەکان و ڕووەدایەکا بەرڎەوام هەوڵۍ دۍ دیمە نەوینیایەکا بوینۊ، ئانەیچ بۍ بە پاڵکیانێوە تا هامڕا سەید کۊڵییۊوە. من ئجۊم وەروو ئانەیچە ڕۊنامەوانییش ورچنی. کەسایەتیی هامڕا سەیدی فرە گونجیا بۍ پەی ڕۊنامەوانیی شۊڕشی. وەروو ئا تایبەتمەندییاشە دەسش بە ڕۊنامەوانیی شۊڕشگێڵنیی کەرد.

پەرسی کەرۍ و شۊنەو چێوی تازەیرە گێڵۍ  

کەسایەتیێوە بنکۊڵکارانەش بۍ کە بۍ بایسووو ئانەی چێوە ئارۊییەکا قبووڵ نەکەرۊ. شۊنەو  فاڕیایرە بلۊ. پێسە شۊڕشگێڵنیوە دلۍ کۊشیای فاڕیای ئارۊیی و سەرڕاسکەرڎەیۊ غەڵەتەکانە بێ".

خەڵکی وەش ئسیێ

زنار یڵدز وستیچش ڕووە، کە سەید ئەڤران پەیوەندیێوە جوانش چەنی خەڵکی بی و واتش، "ماوەو ١١ ساڵوو هەرمانەو شۊڕشوو وەرنیشتینە بنەیانێوە، زارۊڵێوە نەبێنی، کە سەیدشا وەشنەسییۊ. ژەنێوە، پیێوە، کەسێوە پیر نەبۍ، کە جە هامڕا سەیدی دڵش ئێشابۊ. لوۍ هەرمانیوە کەرۍ خەڵک مرۊڤەکان قبووڵش کەرۊ و وەششا بسییۊ".

ڕۊنامەوانیی پێسە شۊڕشێوە ورسەنگنێ

یڵدز جە باسوو پێناسەو 'مەژگوو ئەرەیوانای ئازاد'ینە، کە بارەی سەید ئەڤرانیوە بەکار برییۊ واتش، "ئانە کە سەید ئەڤرانش کەرد بە مەژگوو ئەرەیاونای ئازادی وێش بۍ. هامڕا سەید حەرگیز پێسە پیشێوە ڕۊنامەوانی نەوینۍ، تەنیا پەی شۊنیرەلوای نەکەرێش پێسە شۊڕشێوە وینێش، ڕۊنامەوانیی لاشۊ ئانە بۍ کە هەرچۍ نەویینیۊ بۍ و وزۊش وەروو چەما، غەڵەتەکۍ ئاشکرۍ کرییا، ئانە پێویس بۊ کرییۊ، پاسە ڕۊنامەوانی کەرۍ، وێش ئینەنە شۊڕشگێڵنی".

گەرەکش بۍ ژیوای شۊڕشگێڵنی بیاونۊ بە گەلی

یڵدز درێژەنە واتش، "ڕۊنامەوانی و شۊڕشگێڵنیش جە یۊترینی جیا نەکەرڎێوە. لاو سەیدیوە یووە جە هەرمانە سەرەکییەکاش ئانۍ بۍ، کە ڕەنج و هەوڵەکاو شۊڕشی، خودوو شۊڕشی گێڵنۊوە، باسوو شۊڕشگێڵنا کەرۊ، ئامانج و ژیوای شۊڕشگێڵنا بیاونۊ بە گەلی".

هاگاییبییەی جە نەریتوو ئەرەیاونای ئازادی

دمادمایی قسەکاشۊ زنار یڵدز واتش، "شۊنکەوتێوە نەریتوو موسا عەنتەری تا ئۊزگور ئولکە و غوربەتلی ئەرسۊزی بۍ. چێوۍ فرێچش پەی ئا نەریتەیە زیادۍ کەردبێنۍ. پەوکای گێرتەیرەوەروو نەریتوو سەید ئەڤرانی گێرتەیرەوەروو ڕاو ئا نەریتەینە. ئەگەر ئامانجما شۊنکەوتەی ئا نەریتەیە بۊ، یوەم هەرمانەما ئانێنە، کە ئا نەریتەیە گێرمێنە وەر".

زنار یڵدز دەسنیشانش کەرد، کە پەی هاگاداربییەی و وێبەساعیبزانای سەید ئەڤرانی مشۊم، فرە سەروو کۊشیایۊ پۍ گیریارە و واتش، "مشۊم ئێمە جە کەسایەتیی سەیدینە وینمۍ، کە بە چە ڕا و ڕێبازێوە کۊشیای کریۊ و ئانە بەرڎەوام بۊ".

س.ز