ئێروو نەورۆزی جە عوسمانیەنە بە جۆش و خرۆشۆ گیسیانە. پەرلەمانتاروو دەم پارتی عەلی بۆزان جە مەراسیمەکەنە ئەرەیاۋناش، کە پرسوو کوردی جە ڕاو دیالۆگی چنی رابەروو گەلوو کوردی عەبدوڵا ئۆجالانیۆ چارەسەر کریۆ.
رێکوستەی پارتوو دیموکراسی و یەکسانی گەلا (دەم پارتی) بە دروشمەو "هۊربێزدۍ، وەخت وەختوو ئازاڎیی و سەرکۊتەیا" جە کۊڵانەو یونسئەمرەی عوسمانیەی مەراسیموو پیرۆزکەردەی نەورۆزیش سازکەرد. ئەرەنیشتۍ هەرێمەکەی کە سەرسەعب جە دووۍ خاڵێوە لووۍ دلۍ مێڎانوو نەورۆزی، جە مێڎانەکەنە زەماۋنەشا گێڵنا. بەشدارا بە جلوبەرگی کوردیوە هۊڕپڕایشا سازکەرد.
جە مێڎانەکەنە لافیتەو "هۊربێزدۍ، وەخت وەختوو ئازاڎیی و سەرکۊتەیا" هۊرواسیابۍ و حەرپاسە ئاڵاکۍ دەم پارتی شۊکیێنێوە.
مەراسیمەکە بە دەیەقێوە بێدەنگی و ڕێزگرتەی جە یاڎوو گەشمەرڎا دەسشپنەکەرد. دماتەر کاندیدەو هامسەرۆکایەتی شارەوانی عوسمانیەی زیوەر گوموشە قسێش کەردە. گوموشە دماو پیرۆزکەردەی جە گەلی بە بۆنەو نەورۆزیوە دەسش بە قسەکاش کەرد، دماتەر سەرنجش وست سەروو هۊرچنیەو شۊنەکۍ و داواش جە گرڎ کەسی کەرد کە خاوەنداری جە ئیرادەیشا کەرا.
پەرلەمانتاروو دەم پارتی جە بازنەو مێرسینی عەلی بۆزان جە مەراسیمەکەنە قسێش کەردۍ و سەرنجش وست سەروو گۆشەگیری دژواروو سەروو رابەروو گەلوو کوردی عەبدوڵا ئۆجالانی. بۆزان ئەرەیاۋناش: "ئارۆ جە عوسمانیەنە داوا کەرمۍ، مشۊم دەموودەس کێشەو کوردی چارەسەر بکریۆ. پۍ چارەسەرکەردەو پرسوو کوردیچ مشۆم گۆشەگیری سەروو بەڕێز ئۆجالانی دمایش پنەبۍ. زینڎانیا سیاسی پەی دمایی ئاردەی بە گۆشەگیری مانیشا جە واردەی گرتەن. حەرپاسە ئەڎایا ئینۍ ئێشکگیری دادپەروەرینە. ئەگەر گەرەکما بۆ ئی وڵاتەیە چی قەیرانە ئابوریە دژوارۍ رزگار کەرمۍ، مشۊم پرسوو کوردی چارەسەر بکریۆ. ڕاو چارەسەرکەردەی پرسوو کوردی، بە دیڎار چنی بەڕێز ئۆجالانی مسۆگەر بۆ".
دماو قسەکا بۆزانی و ئەڎایا ئاشتی بە جۆش و خرۆشۆ ئێروو نەورۆزیشا گیسنانە. ئا هاموڵاتیۍ کە ئاماڎۍ بێنۍ دەوروو ئێروو نەورۆزیرە هۊرپڕایشا سازکەرد، بە جۆش و خرۆشۆ نەورۆزشا پیرۆز کەرد.
مەراسیمەکە بە گۆرانیەکاو گولهان بیشەنگۍ دمایشپنەئاما.
