هېزە ئەمنیەکۍ ئېرانی پۍ ڕاگېرتەی جە حەرجۊرە ناڕەزایۍ، جە ساڵیاڎوو سەرهۊرداو"ژەنۍ، ژیای، ئازاڎیی"نە ئیجارە فشارەکېشا سەرو دوکانداراو کاسبکاراوە تن کەرڎېنۍ، پۍ ئانەی بەشڎاری جە حیچ جۊرە مانگېرتەیېنە نەکەرا.
سەرکوتکەرڎەی و فشارەکۍ حکومەتوو ئېرانی جە سەروەختوو نزیک بیەیۊ یۋەمین ساڵیاڎوو سەرهۊردای"ژەنۍ، ژیای، ئازاڎیی"نە، پۍ سەرو چین و توېژەکا ۋەرکەوتوو کورڎسانی ۋەردەواما و ئیجارە هېزەکۍ سەر بەدەوڵەتی کاسبکارۍ و دوکاندارېشا کەرڎېنۍ ئامانج و هەڕەشېشا ۋنەکەرا.
بەپاو ماڵپەڕوو کۊڵبەر نیوزی، هېزەکۍ سەربەدەسەڵاتی جە شارەکا ۋەرکەوتوو کورڎسانی بەتایبەتی مەهاباد و بۊکانەنە هەڕەشېشا جە دوکانداراو کاسبکارا کەرڎەن کە جە یۋەمین ساڵیاڎوو سەرهۊردای"ژەنۍ، ژیای، ئازاڎیی"نە پېسە بەربڕیەو ناڕەزایی دوکانەکاشا نەوزارە و مانی نەگېرا.
ماڵپەڕەکە جە زۋان و سەرچەمە دلېینەکاوە ۋەڵاشکەرڎەنۊ، هېزە ئەمنیەکۍ جە شارەکا بۊکانی و مەهابادینە هەڕەشېشا جە دوکانداراو کاسبکارا کەرڎەن، قەرارنامەیچشا پانیشا پەڕکەرڎەنۊ، کە جە ساڵیاڎوو سەرهۊرداکەینە، ۋېشا جە وستەیرەی دوکانەکاشا و بەشڎاری کەرڎەی جە حەرجۊرە مانگېرتەیۍ دوور گېرا.
'جەئەگەروو وستەیرەی دوکانەکاشانە سزاشا سەرەرە مسەپنا'
ئاماژە پانەیچ کریان، هېزە ئەمنیەکۍ هەڕەشۍ ئانەیچشا جە کاسبکارا کەرڎەن، کە جە ئەگەروو وستەیرەی دوکانەکاشانە سزای دارایشا مڎا.
ئینەیچ جە وەختېنە کە ساڵەی ۋیەرڎۍ، دوکاندارۍ و کاسبکارۍ، پۍ بەربڕیەی پاڵپەشتی ۋېشا پۍ ۋېنیشاندەرا، چنڎین جارۍ بەشڎاریشا جە منگېرتەی سەرانسەرینە کەرڎەبۍ.
هـ.ش
