حەر یۆ جە ڕێکوزیاو ژیوای، مەڵبەندو ڕۆشنویریی هۆرامانی، یانەو سیاوچەمانەی، سەندیکاو هونەرمەندا/لەقو هەڵەبجەی و کەناڵوو هەورامان نیوزی، چلێ هونەرمەنڎی گەورەو هەورامانی جەمیل نەوسووڎی بەرا ڕاوە.
هێزی چوارشەمە (١٣-٣- ٢٠٢٤) پارێزگاو هەڵەبجەینە جە پانیشتو کوردسانینە، حەر یۆ جە، ڕێکوزیاو ژیوای، مەڵبەندو ڕۆشنویریی هۆرامانی، یانەو سیاوچەمانەی، سەندیکاو هونەرمەندا/لەقو هەڵەبجە، کەناڵو هەورامان نیوزی، کە پەنج ڕێکوزیێ فەرهەنگێینێ، یانەو سیاچەمانەینە، بە مەراموو ئامادەسازیی پەی چلێ کۆچکەردە "جەمیل نەوسووڎی"ی هونەرمەندی ساحیب پایەو هەورامانی کوێ بیێوە.
کاروان حەسەن هەورامی ڕاوەبەروو ڕێکوازیاو ژیوای بە ئاژانسوو هەواڵوو فوراتیش وات، کە ڕێکوزیاکەشا بە هامبەشی چەنی ڕێکوزیایە نامێبریایەکا ئینێ هەوڵینە پەی ڕاوەبەردەی مەراسیموو چلێ هونەرمەندی گەورەو هەورامانی جەمیلی نەوسووڎی و ئەرەیاوناش، کە ئەرەنیشتەکەو ئارۆیشانە ڕاوەبەرو مەڵبەندو ڕۆشنویری ئێژا "ئەیوب ڕۆسەم" جە بارەو چلێ ڕەوانشاڎیوە پەیلوای و سەرنجەکێ وێش وستێنێ ڕووە، دماتەر وەرپەرسوو ڕێکوزیایەکاو "ژیوای، یانەو سیاچەمانەی، سەندیکاو هونەرمەنڎا /لەقوو هەڵەبجەی، کەناڵوو هەورامان نیوزی"یچ جە کۆنیشتەکەنە پەیلوای وێشا وستەن ڕووە و بە کۆو دەنگی بەرنامێ شایستەسا پەی یاڎوو هونەرمەنڎی نامڎاری ئاماڎە کەردەن و وەرپەرسوو هەر یۆ جە ئەرەمەرزیاکا جە بەرنامەکەنە دیاری کریان.
هەورامی درێژەو قسەکاشنە ئەرەیاوناش چلەکێ گنۆ دماو مانگەو ڕەمەزانی و شاروو هەڵەبجەی شەهیدینە و هۆڵوو د. مستەفا زەڵمینە ملۆ ڕاوە.
یاگێ واتەینە هونەرمەندی گەورەو هەورامانی جەمیل نەوسووڎی ڕێککەوتوو ٤ ئاداروو ٢٠٢٤ وەراوەر بە ١٤و سیاوکامی ۋەرکەوتوو کوردسانینە و بە نەوەشی دماو خزمەتێوە فرەی بە کولتووروو هەورامانیو عومروو ٧٨ساڵینە کۆچی دمایینش کەرد.
