جەنگاوەرا عەرەبی شەڕڤان ئاگر و یەعقوب فەلەستین ئەرەیاوناشا؛ پەکەکە ٤٦ ساڵېن سەرەمڕە ئەۋەکۊشای مکەرۊنە و گرڎو هجومەکا دژمنیش پووچێ کەرڎېنێ و واتشا: "پەکەکە بە پڕۆژەو نەتەوەی دیموکراتیکی بېیەن بە هیوا پەی گەلا وەرکۆتو مېیامینی."
شەڕڤان ئاگر و یەعقوب فەلەستین دووێ گەریلێنۍ جە گەلوو عەرەبی، جە کەشەکا کوردەسانینە بە ئایدیۆلۆژیاو ئازادی ڕابەر ئاپۆی جە دژو ئەرەگیرا جەنگ مکەرانە. شەڕڤان ئاگر و یەعقوب فەلەستین بۆنەو ٢٧ نۆوەمبەری ساڵڕۆو ئەرەمەرزنایرەو پەکەکەی، قسێشا پەی ئاژانسوو هەواڵوو فوراتی کەردۍ.
یەعقوب فەلەستینی جە سەرەتاو قسەکاشەنە، ئاماژەش پانەیەدا کە ویرۆکەو ڕابەر ئاپۆی ئارۆ یاوان بە گەلوو عەرەبی و واتش: "پەی ئێمە پێسەو گەلو عەرەبی ماچو، ئێمە بێ گۆرە و سەرمەشقێنمێ. بەڵام ئیتر ئیمە گۆرە و سەرمەشقما هەن. سەرمەشقما ڕابەر ئاپۆن، ڕاسا گەلوو کوردیچ بەدیل گیریان بەڵام ڕابەر ئاپۆ ڕابەرو گردیمانە. ئێمەیچ پێسەو گەلوو کوردی و گەلوو عەرەبی دیلۍ کریێنمۍ، نمونە گەلوو فەلەستینی. پېسە گەریلا عەرەبەکا ئایدۆلۆژیاو ڕابەر ئاپۆی کاریگەریێوە فرەش سەرو ئێمە نېیانەرە، هەرپاسە سەرمەشقی گەشمەرڏە عەزیز عەرەبی هەرەکەتما پنە بەخشۆ. دلێ پارتیمانە پەکەکەی حیچ جیاوازیێ جە بەینو عەرەبی و کوردینە نییا، کورد و عەرەب، ژەنێ و جوانێ پەی یەک مەبەسی و هەدەفی ئەرەکۆشمێ نەک هەر جە دژو دۆڵەتو تورکی، بەڵکم جە دژو گرڎو ستەمکارا و فاشیستا جەنگ مکەرمێنە. بێجگە جە پەکەکەی پارتێوە تەر نمەتاوۆنە وەرا وەر پا هجومە قورس و مەترسیڎارا مڏرامان بکەرۆنە.
هجومەکۍ دۆڵەتو تورکی و دۆڵەتو ئیسرائیلی پەی سەرو گەلا جە سیاسەتی ئەرەگیرینە هامشێوەو یۆینۍ، ئی دووە دۆڵەتە جیاوازی بەینو گەلانە نمەکەرا. دۆڵەتو تورکی جەیەکڕیزی کوردی و عەرەبی تەرسۆنە و پیلانێ فرێ مجۆرە پەی ئانەی کاریگەری تەڤگەری ئازادی نەیاوۆ بە جوانا عەرەبی، بەڵام ئیسە هەمڕێ فرۍ عەرەبێما هەنۍ جە دلێ جمیەرو ئازادینە و بەشدارێنی. من فرە دڵوەش بونە کاتێ هەمڕێوە عەرەبی موینونە. جەنگو ئێمە جە دژو دژمنی بە گرڎ جۆرە تاکتیکێ و ڕێبازێوە کاریگەری بەردەوامش هەن. هەرپاسە کاتێ بەشداری چالاکیەکا مکەرو ورێوە فرەم پنە بەخشۆ. دۆڵەتو تورکی ئینا ئاژێوە فرە لاوازەنە و جە گرڎ هەمڕێوە ئێمە متەرسۆنە. پۆکەی سیاسەتو جەنگی تایبەتی پەیڕەو مکەرۆنە و هەوڵ مڎۆ نەتیجۍ دەس وزۆ. تا ڕابەر ئاپۆ ئازاد نەبۆ کوردەسان ئازاد نمەبۆنە و گەلا دیلکریێ ئازادێ نمەبا، نە جە فەلەستین و نە جە سوریا و نە جە حیچ یاگێ تەرەنە گەلا ئازادێ نمەبا. پۆکەی دۆڵەت جە ئایدیۆلۆژیاو ڕابەرایەتی تەرسۆنە. بانگەوازو من پەی گردو جوانا عەرەبی ئانەن؛ فکر و فەلسەفەو ڕابەر ئاپۆی وەناوە و بییاوانە، وێشا جە پیلانەکا دۆڵەتی ڕزگار بکەرا، ڕووە بکەرا کەشو کوردەسانی و جە ئازادی نزیکێ باوە.
هەتا پەکەکە بۆنە ئەرەگیر سەر نمەگنۆ
شەڕڤان ئاگر جە پېکئاماو عەرەبو منبجین، باسش جە کاریگەرییەکا جمیەرو ئازادی کەرد و واتش: "کاتۍ داعش هجومش کەرد سەرما، بەسەڎان هەڤاڵێ جە کەشەکاوە بەرەو پیریما ئامۍ. جەنگشا کەرد و چنەشا گەشمەرڏێ بیێ، ئێمە گەشمەرڏە بییەو ئا هەمڕایاما و ویرۆکەو ڕابەر ئاپۆی کاریگەریێ فرەش جیا ئاست سەرو من و گەلەکەیما، کاتێ بەشدارو جمیەرو ئازادی بېیانی، من زیاتەر جە حەقیقەتو ڕابەرایەتی یاوانینە و کەردم بە ئامانجێ کە دژو ئەرەگیرکاری جەنگ بکەرونە و بەشداری ئەرەکۆشای بکەرو. من جە ژیوای گەریلایەتینە قەد وێم دلێ جمیەرو ئازادینە بە غەریب و نامۆ نمەوینو. من گەریلای پێسەو ئەنداما بنەیانەکەو وێم موینو. پۆکەی من موزیڕەنا سەرو لادای گرڎو کۆسپەکا و جە ئەرکو هەڤاڵامانە بەشدار بوو."
گەریلا شەڕڤان ئاگر سەرنجش وست سەرو ٤٦ ـەمین ساڵڕۆو ئەرەمەرزنایرەو پەکەکەی و ئاماژەش بە گرنگی جمیەری پەی گەلا مەنتیقەکەی کەرد و واتش: "ڕابەر ئاپۆ یاوا مەرامو وێش. ٤٧ـەمین ساڵەو ئەرەمەرزنای پارتیما جە گرد کەسێ موبارەک بۆ. ئەرەمەرزیارەو پەکەکەی سەرەتاو ئەرەکۆشای ئازادی بێ. هەرپاسە ڕابەر ئاپۆ چێرو گۆشەگیری ڕەهاینە پەی ئازادی گەلا ئەرەکۆشۆ، ئارۆ پەکەکە بە پڕۆژەو نەتەوەی دێموکراتیکی بیەن بە هیوا پەی گەلا وەرکەوتو مېیامینی. سیستەمو دۆڵەتی ژەنا وەرچەم نمەگێرۆ بەڵام بە بییە و ئەرەکۆشای پەکەکەی قوە و ئەرەکۆشای ژەنا بە چەمو وێما موینمێ پەکەکە بە ئەرەکۆشای ٤٦ساڵەو وێش گردوو هجومەکاش پووچۍ کەردێوە. سەرەڕاو دەرفەتە کەمەکا، ئێمە تەکنەلۆجیای وەڵکەوتەو دۆڵەتو تورکی ماڕمێنە. هەتا پەکەکە بۆنە، دۆڵەتو تورکی قەد نمەیاوۆ بە مەرامو ۋێش. مشۆم جوانا عەرەبی ڕابەر ئاپۆی فکر و فەلسەفەکەیش خاستەر بشناسا و وەناشۆ و وێشا پا جۆرە بەڕێکوزتەی بکەرا."
