فاتیمە ئەلمەلە هامسەرۊکەو مەنتێقەو سرینی، بە بۊنەو ٢٧و تشرینو دووەمی ٤٥ەمین ساڵیادو ئەرەمەرزنای پارتو کرێکاراو کوردستان (پەکەکە)ی، پەی ئاژانسو ANF  قسێش کەرڎۍ.

ئەلمەلە دەسنیشانش کەرد، کە ئەرەمەرزنای پەکەکەی بییەن بە هومێدوو ژیواێوە تازەی پەی گردوو گەلاو مەنتێقەکەی و واتش: "ئەرەمەرزنای ی پەکەکەی پەی نەتەوەو عەرەبی واوەی ژیوایوەن. ئێمەیچ پێسە نەتەوەو عەرەبی بەشێوە بیێنمۍ جە کۊیلەکاو دەسەلاتداری و سەروو ئێمەیچ گرد نۊعە تندوتیژیێوە فەرز کریۍ. جەنی سەرەورڎای تەڤگەری ئاپۊیی و ئەرەیاونای ئیدارەو وێڕاوەبەری، ژیواێوە تازەما پەی بنیات نریا، پەوکای ئینە ڕۊو واوەی ژیوایۊو گەلوو عەرەبیچا، تەڤگەروو پەکەکەی بە ٦ کەسێوە دەسش پەنە کەرد، موینمۍ کە ئارۊ بییەن بە ملوێنان کەسۍ، ڕابەر ئاپۊ ڕابەرو تەمامو نەتەوەکان. کۊشیۊ پەی ئازاڎیی گردوو گەلە ستەموەنەکریایا".

ئەلمەلە دەسنیشانش کەرد، کە ڕابەروو گەلوو کوردی عەبدوڵڵا ئۊجالان بە ئەرەمەرزنای ئی تەڤگەرەیە ژەنیش جە کۊیلایەتی ڕزگارۍ کەرڎۍ و درێژەو قسەکاشنە واتش: "ڕابەر ئاپۊ وەراوەروو کۊیلایەتی و ستەمینە چەمکریێوێش کەردیمۍ. ڕاەر ئاپۊ نەک حەر گلێرگەش جە کۊکوشی ڕزگار کەرد، بەڵکوم ژەنیچش چێروو سیستموو کۊیلایەتیی هەزاران ساڵەینە ڕزگارۍ کەرڎۍ. چەنی سەرەورڎای تەڤگەری گرد چێوۍ فاڕیا. ئێمە جە تاریکییوە بەرەو ڕنایی هەنگامۍ منیەیمۍ. ئینەیچە سەیەو سەرەو ڕابەریماوەن. ئێمە ڕۊو ئەرەمەرزنای پەکەکەی وەنەو گردوو گەلاو جیهانی مەبارەک کەرمۍ. ئینە ڕۊو واوەی ژیوایوەن و شانازیی پا ڕوەیوە کەرمۍ کە ڕۊو پەیدابیەیمانە".

ئاخرۊ ئەلمەلە سەرنجەش وستە سەروو هجوومە ئەرەگیرکارییەکاو دەوڵەتوو تورکی فاشیستی و واتش: "دەوڵەتوو تورکی ئەرەگیری تا بتاوۊ فکرو نەتەوەی دیمۊکراتیکی و هێزەکاو  گەریلایما دلێنە بەرۊ بە گردوو  شێوەکا هجوومۍ کەرۊ. مشۊم بزانییۊ کە ئێمە  تا ئاخر دژوو ئا هجووما مردمێوە و خاوەنداری کەرمۍ جە هێزوو وێما".