پۊلیسوو یۊنانی ئارۊ سەرسەعب ورش کوا سەروو کەمپوو لاڤریۊی، کە فرەو ئەرەنیشتەکاش کوردێنێ. پۊلیس وەختوو ورکوای سەروو کەمپەکەینە بەرێ و پنجەرێش ماڕێنێ و بە گردیوە ٥٠ پەنابەرێ کوردێ کە ژەنی و زارۊڵێچشا چەنەنێ، بەزۊر کەمپەکەنە بەرێ کریێنێ. ماجا فاڕێنێشاوە پەی کەمپای تەری. یاگێ واتەینە کە ئی ورکوایە سەروو کەمپەکەی وەڵێ کۊبیەیۊ ناتۊین. میدیاکاو سەر بە حوکمەتوو یۊنانیچ پەنابەرە سیاسییە کوردەکێشا پیسە "تیرۊریس"ی ئشناسێنێ. ئا ورکوایە سەرشا پێسە دەسکەوتێوە پێشکەشوو دەوڵەتوو تورکی کریا.

لاێوە تەرۊ وەزارەتوو هەرمانوکاروو کۊچبەرا  پەنابەراو یۊنانیشا پاسە نیشانە دێ کە بە مەیلوو وێشا کەمپەکەشا جیا ئاستەن. ناوەندوو کولتوریی کوردی یۊنانیچنە ئا بانگەشەشە وستۊ دروێوە و پەی شەرمەزارکەردەی ئا هەرمانێ داواو پەشتیوانییش کەردە. پەنابەراو کامپەکەی و ناوەندوو کولتوریی کوردی یۊناننە کردەوەکاو پۊلیسوو یۊنانی و وەزارەتوو کۊچبەرا و پەنابەراشا شەرمەزارێ کەردێ و چند ڕوێ تەر ناڕەزایەتیی وەرفراوان  وەڵا کەراوە. هەرپاسە قەرارا ئارۊ سەعات ١٧:٠٠ کورداو ئەرەنیشتاو یۊنانی بەردەموو ئەکادیمیاو ئەسیناینە هەڵوێسوو پۊلیسی سەرکۊنە کەرا.

س.ز