بە پاو هەواڵوو میدیاکاو ئێرانی، ئارمیتا گەراوەندە کناچە کورڎەی ١٦ ساڵانە، کە جە مردگێوە میترۊینە تاراننە تووشوو پەلامارەو 'پۊلیسوو ئەخلاق'ی بییە، ماوەو ٣ ڕوان ئینا کۊمانە.

ئارمیتا گەراوەندە خەڵکوو کرماشانی ئەرەنیشتۍ شاروو تارانی، دماو ئانەیە ڕۊو ١وو تشرینوو یوەمی جە مردگەو میترۊوو شوهەینە، تاراننە بە پەلامارەو پۊلیسی هۊشوو وێش شییە، ماوەو ٣ ڕوان ئینا کۊمانە و بارودۊخی تەندروسییش خراپا و ئینا چێروو چەمداریینە.  

بە پاو زانیارییەکا کە کۊمەڵەو مافوو ئینسانوو کوردستانی جە شایەتحالەکاش ورگێرتەن، جە مردگێوە میترۊکەینە دەمەبۊڵە بەینوو کناچە تەلەبەکا و پۊلیسینە وەش بییەن، دماو ئانەیە پۊلیس هاگادارێش کەرڎێنێوە کە وێشا پۊژنارە. حەر ئا وەختە ئەفسەرێوە پۊلیسی مدۊ وەنەو ئارمیتۍ، ئارمیتا کە سەرەش مدۊ وەنەو ئاسنێوە، گنۊ سەروو زەمینی. و بە یارڎەیدای ڕەفێقەکاش یاویێنە دلۍ میترۊی، میترۊکەنە هۊشوو وێش شیێنە و یاوێنە دۊخوو کۊمای.

ڕایەداراو ئێرانی ئینەشا ڕەت کەرڎەنۊ و واتەنشا، کە هۊشوێششییەکەیش بۊنەو وەستەیرەی فشاروو ونیوە بییەن.

گردوو ئا گێرتە ڤیدیۊییا کە میترۊکەنە گیریێنۍ، نمازا وەلۍ باوە و ڕاگێری وەنەو ڕۊنامەنویسا، کریۊ، کە ڕوودایەکەی فاڕاوە، هەرپاسە وەختۍ کە ڕۊنامەنویسێوە لوابۍ پەی خەسەخانەکەی، دماو چنڎ سەعاتۍ هێزە ئەمنیەکا گێرت.

س.ز