ئارۊ سەعات ١١ یەنەکە جە هۆڵ و تەلاروو هونەری جە شاروو سلێمانى کۆنگرەو ۋېش دەس پنەکەرڎ و هەرمانەکۍ کۆنگرەکەی پۍ ماوەو یەرۍ ڕووا ۋەردەوامۍ با، ئینەیچ پەنجەمین کۆنگرەن جە تاریخوو وەشبیەی ئا حزبەینە، چەمەڕا کریۊ ئی کۆنگرە جەمۍ فاڕیۍ شۊنەو ۋېشەرە بارۊ ، کە کاریگەرییشا سەروو دلېینەو حزبەکەی و ئاژەو هەرێموو کوردسانیچ بۊ.

ئەرەمەرزناو یەنەکەی

بیرۆكەو ئەرەمەرزناو یۊبیەی نیشتیمانی جە دیمەشق و پایتەختوو سووریای وەش بی، ئا وەختە جەلال تاڵەبانی و بەشێوە جە سەرکردە دیارەکا ئا حیزبەیە جە سووریانە ژیوېنۍ و هەرمانەی سیاسیە کەرېنۍ، ڕۊو ٢٢ـۍ ئایارو ١٩٧٥ ی ساتە وەخت و متەیرە و گەڵاڵەکەرڎەی ئا بیرۆکەیە بۍ پۍ حزبێوە سیاسیی کوردی کە تاۋۊنە ئاخېز جە پانیشتوو کوردسانی دەس پنە کەرۊوە، جە دماو ئاشبەتاڵەکەو مەلا مسەفاو بارزانیۊ.

چا ڕووەنە حەریۊ جە جەلال تاڵەبانی، نەوشیران مسەفا، کەمال فوئاد، عادل موراڎ، فوئاد مەعسوم، عەبدولڕەزاق فەیلی یۋەم بەیاننامەو ئەرەمەرزناو یۊبیەی نیشتیمانیشا ۋەڵاکەرڎۊ ، ئی بەیاننامە بی بە بناغە و وەشبیەو یۊبیەی نیشتیمانی و ١و حوزەیرانی پېسە ڕۊو ئەرەمەرزناو ئا حزبەیە دیاریکریا.

یەنەکە جە ساڵەو ١٩٧٧ ی جە برادۆست و ١٩٨٠ جە ناوزەنگ دووۍکۆنفڕانسېش بەستېنۍ و یۋەم کۆنگرەیچش جە ٢٧و کانوون و دووەم و ساڵەو ١٩٩٢ جە هۊلێر و سلێمانی سازکەرڎوو  جەلال تاڵەبانی پېسە سکرتێری گردینە و نەوشیروان مسەفایچ پېسە یاگەگیریش هۊرچنیۍ.

کۆنگرەو دووەم و یەنەکەی جە ٣٠ی کانوون و دووەم و ٢٠٠١ینە حەر جە سلێمانی بەسیا و جارێوەتەر مام جەلال بە سکرتێروو گردینەی و نەوشیروان مسەفایچ بە یاگەگیروو سکرتێری گردینەی هۊرچنیېوە، کۆنگرەی یەرەمیچ جە ١و ئایار و ٢٠١٠ بەسیا و  مام جەلال بە سکرتێری گردینەی هۊرچنیاوە و كۆسرەت ڕەسوڵ و بەرهەم ساڵحی-چش بە یاگەگیرۍ وېش دەستنیشان کەرڎۍ.

یەنەکە ڕۊو ٢١و کانوون و یۋەم و ٢٠١٩ ی کۆنگرەو چوارەم و ۋېش بەست، کە چی کۆنگرەنە چن فاڕیایۍ تازۍ جە پەیڕەوو پڕۊگرام و دلېینە و هەیکەل و حزبەکەینە کریۍ و پۍ یۋەم جاری سیستمى هامسەرۆکایەتىیش پەیڕەو کەرڎ و حەریۊ جە بافڵ تاڵەبانی و لاهور شێخ جەنگی بە هامسەرۆکۍ هۊرچنیۍ، بەڵام جە ٨و تەمووزوو ٢٠٢١ینە لاهور جەنگی و چن ئەنڎامێوە سەرکردایەتی یەنەکەی دوورۍ وزیېوە و جە گلېرۊبیەیېنە بە نامۍ دیڎاروو سلێمانی جە ساڵەو ٢٠٢٢ سیستمی هامسەرۆکایەتی هۊرشېویاوە و بافڵ تاڵەبانی پېسە سەرۆک و یەنەکەی ئەرەیاۋیا.

کۆنگرەی پەنجەم

جە کۆنگرە و پەنجەمینەکە ئارۊ بە دروشمەو "تازەگەری جە هەرمانېنە و کۆدەنگی جە قەرارینە" دەسش بە هەرمانەکاش کەرڎ و یەرۍ ڕووۍ ۋەردەوام بۊ، سەرۆک و سەرکردایەتی تازە پۍ یەنەکەی هۊرچنیا.

چی کۆنگرەنە ٦٠٠ ئەنڎامۍ بەشڎاری کەرا و یۋەمجاریچا کۆنگرەو ئا حیزبەیە وەڵۍ واڎەو ۋېشەنە ئەنجام بڎریۊ، ژمارەو ئەنڎاما سەرکردایەتى جە ١٢٤ ئەنڎاماوە، کریا بە ٥٠ پۍ ٥٥ ئەنڎاما چا ژمارەو سەرکردایەتیچ ١٠ پۍ ١٣ کەسا پۍ مەکتەب و سیاسی هۊرچنیا، هاموەخت ژمارېوە ئەنجوومەنۍ تازۍ پۍ حزبەکەی زیاڎۍ کریا و حەرپاسە پەیڕەو پڕۊگرام و دلېینەی هەمووار کریۊوە و سیستمى هامسەرۆکایەتى جە پەیڕەوەنە لابریۊ.

حەرپاسە جە کۆنگرەو پەنجەم و یەنەکەینە، سەرۆک هۊرچنیۊوە و تا ئیسە دیارنیا سەرۆک یاگە گیرش بۊ، بەڵام ئینەیچ جیا مەنەن پۍ ئەنڎاما کۆنگرەی کە قەرارش سەر بڎا ئایا سەرۆک یاگەگیرش بۊ یان نا، بە ئەگەرۍ فرۊ بافڵ تاڵەبانی پۍ پۆستەکەیش هۊرچنیۊوە.

یەنەکە جیا جە دووۍکۆنفڕانسا و پەنج کۆنگرا، جە ساڵەکا ١٩٩٠، ١٩٩٥، ٢٠٠٧، ٢٠٠٩ و ٢٠١٣ ەینە پەنج پلینیۆمېش بەستېنۍ.