کاوێز مەلا پەروێز رۆنامەنوویس و چەمڎاری سیاسی، جە چەمپنەکۊتەیێنە چنی ئاژانسوو هەواڵوو فوڕاتی (ANF)ی هۊرسەنگنایش پەی مەترسییەکا فراوانبیەی ئەرەگیریەکا سوپاو تورکی بەهامکاری پەدەکەی کەرڎ.  

 ' پەنەواز بۍ گەلوو کورڎی بە یەک دەنگی جە دژو ئەرەگیری مرداوە '

 کاوێز مەلا پەروێز رۆنامەنوویس و چەمڎاری سیاسی سەبارەت بە ئەرەگیرکەرڎەی خاکو پانیشتوو کورڎەسانی جە لایەنو دۆڵەتو تورکیوە، ئەرەیاۋناش: " پەنەواز بۍ گەلوو کورڎی بە یەک دەنگی جە دژو ئامای سوپاو ئەرەگیرو تورکیای مردابیێوە بەڵام داخەم نمەشۆ یەک دەنگیما نەدی، بەڵکم تورکیا بێ ئانەی کە چەمی میدیایی و هەڵێوە میدیایی و کۆدەنگی کوردی سەرش وەش بکریۆ فرە بەئیسراحەت ناوچێوە فرەش جە هەرێمو کورڎەسانینە ئەرەگیر کەرڎەن".

 'دۆڵەتو تورکی گەرەکش بۍ دەس سەرو شارو کەرکوکیرە بگێرۊ '

 کاوێز مەلا پەروێز رۆنامەنوویس و چەمڎاری سیاسی باسش جە هەوڵەکا دۆڵەتو تورکی کەرد پەی ئەرەگیرکەرڎەو شارو کەرکوکی و ئاشکراش کەرڎ: " تورک تەنیا بە ئەرەگیرکەرڎەو چن ناوچێوە هەرێمو کورڎەسانیوە نەمردان، ماوێوە فرەن دۆڵەتو ئەرەگیریر و تورکیای هەرمانە سەرو ناوچەکا کەرکوکی و چن ناوچێوەتەری مکەرۆ و جیهانێوەش بە ئەجیندای سونەی پێکئاورڎەن کە داخەم نمەشۆ بەشێوە کوردیچ بیەن بە بەشێوە چی ئەجیندا سونیەو تورکیای کە تورکیا بیەن بە چەترەو کۊکەردەیۆیشا، موینمۍ جە کەرکوک و ناوچە کورڎەسانیەکا تەرینە گەرەکشابۍ ئەجینداو ۋێشا ڕاوەبەر بکەرا و دەس سەرو دەسەڵاتو شارەکارە بگێرا پېسە ئانەی جە ماوەو حۆت ساڵی ۋییەرڎەینە جە کەرکوکەنە دیما کە باڵێۆزو تورکیای پېسە شارێوە تورکیای هەڵسوکۆت چنی کەرکوکی کەرۍ".

 ' مشۊم عێراق ڕا جە جابەجێکەرڎەی ئەجینداو تورکیای بگێرۆ '

 جە درێژەو قسەکاشەنە، کاوێز مەلا پەروێز واتش: "ئشیۍ حکومەتو عێراقی ڕاش نەڎابیۍ کە تورکیا ئا دەورەیە بگێڵنۆ سەرو دووۍ شارا گرنگۍ عێراقی، کە چنی گەرەکش بۆ پا جۆرە ئیدارەو شارەکا پێکبارۆ، کە موینمۍ شالیارو جبەرو تورکیای بە ئاشكرا ماچۆ پەنەوازا پێکئاورڎەو ئیدارەو کەرکوکی بەشێوەو نۆبەتی بۆ جە بەینو پێکئامایەکانە، مشۊم عێراق ڕا جە هێزو لایەنا بگێرۆ کە ئەجینداو تورکیای جابەجۍ مکەرا ".

 ' مشۆم گرڎ شۆنێنە ڕووبەڕوو ئەرەگیری تورکیای مردمێوە '

 کاوێز مەلا پەروێز واتش: "شالیارو جبەرو تورکیای فرە بە ئاشکرا ماچۆ ' مشۆم پێکئامای ئیدارەو کەرکوکی بە نۆبەت بۆ '، پەنەوازا ئا مافە بە تورکیای و هێز و لایەنەکا سەربە تورکیای نەڎریۆ مافو ئانەیشا بۆ چارەنوویسو ئی ناوچەیە دیاری بکەرا، مەترسیە ئەرەگیریەکۍ تورکیای فرە گۆرەتەرێنۍ چانەی کە موینیا، ئی ئەرەگیریەو تورکیای ئڼەو مەترسی پەی سەرو ناوچەکەی مەترسیچا پەی سەرو ئا هێزا کە سەر بە تورکیاینۍ، پۊکەی مەترسیە ئەرەگیریەکۍ سوپاو تورکیای جدیێنۍ مشۆم کورد بە کۆ دەنگی و یەک هەڵوێسی جە گرڎ شۆنێنە ڕووبەڕووو ئامای تورکیای مردۆوە،هەرپېسە چنی کەرکوکییەکۍ شکسشا بە ئەجینداو تورکیای ئارڎ پەنەوازا جە هەرێمو کورڎەسانیچەنە شکس بە ئامای تورکی پەی ئا ناوچا بێنە".

'تورکیا بەهامکاری پەدەکەی چا ناوچانە باڵادەسا'

 هەرپاسە کاوێز مەلا پەروێز، واتش: "ئا ئاژەی کە جە هەرێمو کورڎەسانینە هەن ئاژێوەش خوڵقنان کە هەر هێزێوە جە سنوورو جوگرافیاو ۋێشەنە بەپاو بەرژەوەندی ۋێش سیاسەت مکەرۆ و ئیدارەو ناوچەکەی مکەرۆ، پانیشتوو کورڎەسانی بە جۆرۍ بەش بیەن ئیدارەو هێزە سیاسییەکا دیارا سنوورشا دیارا، دۆڵەتو تورکیای چکۆ باڵادەسا بێگومان بەڕێکۊتەی و بەهامکاری هێزێوە سیاسی پېسە(پەدەکە)ین چا ناوچانە کە دەرفەتش پەی تورکیای خوڵقنان چا بۆ".

' مشۆم جە ڕاو هۊرچنیەیۆ پاشەکشە بە ئەجینداو تورکیای بکریۆ'

کاوێز مەلا پەروێز، ئەرەیاۋناش "جە هەردووە پارێزگاو کەرکوکی و نەینەواینە جە ڕاو هۆرچنیەیۆ پاشەکشە بە ئەجینداو تورکیای کریا، پۊکەی پەنەوازا هێزە سیاسییەکا پانیشتوو کورڎەسانی چی هۊرچنیەو ئاینڎەینە کارۍ بکەرا، تاوەکو تورکیا نەتاوۆ بە مەیلو وێش فشار بوزۆنە سەرو شارەکا کورڎەسانی، پەنەوازا سەرو گەلوو پانیشتوو کورڎەسانی کە هەر هرووژمێوە ئەرەگیری تورکیای پەی سەرو هەر شارو ناوچێوە پانیشتوو کورڎەسانی کریا گرڎما پێوەرە ناڕەحەتۍ بیمۍ، مشۆم ئەگەر ئێشێوە بە سلێمانی یاوا خەڵک جە دهۆکەنە ناڕەحەت بۆ ئەگەر ئێشێوە بە ئامێدی یاوا تورکیا ئەرەگیرش کەرڎ خەڵک جە جەلەولا و کەرکوکەنە ناڕەحەتۍ با و ئانەی بە بەشێوە جە پرسەکەو ۋێش بوینۆ پی جۆرە نەتەوە وەش بۆ".

 'تورک نەشارانشۆ کە بیەو کورڎی قبووڵ نمەکەرۆ'

جە دمادمایی قسەکاشەنە کاوێز مەلا پەروێز، واتش: "هیواڎارێنمۍ چی هۊرچنیەو ئاینڎەو پەرلەمانو کورڎەسانینە ئا هامکێشە بواڕیۆ و ئەرەگیری تورکیای جە پانیشتوو کورڎەسانینە پاشەکشەش پنە بکریۆ و ئەجینداو تورکیای جە هەرێمو کورڎەسانینە جە شۊنێنە مردیۆ، مشۆم بزانمۍ ئەجیندا و مەترسی دەوڵەتەکا سەرو ئاینڎەو ئێمەی کورڎی چێشا، تورک نەشارانشۆ جە هیچ شۊنۍ جیهانینە بیەو کورڎی و ژیۋایکەرڎەو کورڎی قبووڵ نمەکەرۆ، پۊکەی مشۆم درک پا مەترسیا بکەرمۍ، پەنەوازا پېسە کورڎی تەمەشەو بەرژەوەندییەکا ۋێما بکەرمۍ و بەپاو بەرژەوەندییە نەتەوەییەکا ۋێما چنی دۆڵەتا پەیوەندی وەش بکەرمۍ، تورکیا مشۆم دلۍ ئا بازنەینە بۆ کە هەمیشە بەمەترسیش بزانمۍ سەرو بیەو ۋێما پېسە کورڎی".