دماو شۆڕشوو ٢٠١٢و وەرنیشتیوە، پەروەردە و فێرکەردەی واوەی مجیاراوە، چوارچوەو پارادایموو نەتەوەی دیموکراتیکینە مبریۆنە ڕاوە، سیستموو پەروەردەو سەرنیشت و وەرکەوتوو سوریاینە زوانەکاو کوردی و عەرەبی و سوریانی هەنێ.  

ساڵەی تازێ وانای سەرنیشت و وەرکەوتوو سوریاینە ٨و ئەیلوولیوە دەسش پەنە کەرد و زیاتەر جە ٨٦٠ هەزار وانیارا بەشدارێنی. هەر وانیارێوە یەرێ ساڵێ ئەوەڵێ بە زوانی ئەدایی وێش پەروەردە مکریۆ، دمایی ساڵەی چوارەمۆ بە کوردی، عەرەبی و سوریانی بەردەوام مبۆ و ساڵەو پەنجیوە بە ئینگلیزییچ پەروەردە مکریۆ.

لوجنەو مەنهەجوو پەروەردەی کە ساڵەو ٢٠١٤یوە ئەرەمەرزیان، پەی ئێساڵی مەنهەجوو پۆلەکاو ١، ٤، ٧ و ١٠یش دەسکاریێ کەردێنێ،پەی زیاتەر قەوەتکەردەی پەرسەکێ و تەجرووبە جە هەرمانێ پەروەردەیێ و چارەو کەمییەکا.

ئەرەمەرزنای ئەنجومەنوو بنەیانەو وانیارا

هامسەرۆکوو دەسەو پەروەردەی و فێرکەردەی ڕاوەبەریی وێمانەو دیموکراتیکوو سەرنیشت و وەرکەوتوو سووریای،پەی ئێساڵوو وانای ئەنجوومەنوو بنەیانەو وانیاراشا ئەرەمەرزنان، پەی یاواینەی و ئاسانکەردەی پەروەردەو وانیارا، ڕاو ئی ئەنجوومەنیوە هامکاری و هەرمانەی هامبەشە بەینوو وانیارا و مامۆسایا و بنەیانەکانە ئاسانتەرە بۆ.

پەرەوەردە ڕاو مامۆسایاو زوانی ئەرمەنیوە

عیماد تەتەرییان باسوو ئانەیش کەرد، کە دماو شۆڕشوو سەرنیشتوو وەرکەوتوو سووریایۆ، دەسشا کەردەن بە پەروەردەو زوانی ئەرمەنی و واتش:" پەی پارێزنای و پەرەدای بە زوانی ئەرمەنی پەنوازییما بە مامۆسای پڕۆفیشناڵی بێ، دلێ گلێرگەی ئەرمەنینە ورچنیەی ئەرمەنیما پەی پەروەردەی بە زوانوو وێشا پە گەنجا دەسەبەر کەرد و ٣٠ مامۆسێ پسپۆڕێ پەروەردەکێشا واتێوە، ساڵەو ٢٠٢٥ینە ڕێکوزیایەکەما ئەرەمەرزیۆ و گردوو قۆناغەکاو پەروەردەینە هەوڵێ پەروەردەی و پەرەدای بە زوانی ئەرمەنی مدەیمێ. ئینەیچە چوارچوەو پارادایموو نەتەوەی دیموکراتینە بۆ و زارۆڵێ ئەرمەنیێ پەروەردە هورمگێرانە."

ئەرەمەرزیاو سوریانیی ئۆلاف تائۆ

ئەرەمەرزیاو سوریانی ئۆلاف تائۆی وەرپەرسا چانەیە، کە مامۆسێ سوریانیێ بە پاو مادەکاو ڕاوەبەریی وێمانەی پەروەردێ بکەرۆ و مەنهەجی پەروەردەیی بە بە پاو زوانی سوریانی ئامادە بکەرۆ. تا نەوەی تازەی ئاشنا بە زوانوو وێش بکەرۆ، پەروەردەشا پەی مکەرۆوە. ئۆلاف تائۆ دێرک، حەسەکە، قامیشلۆ و دربەسبینە ناوەندی تایبەت  بە وێش هەنش و تا زارۆڵێ سوریانیێ ئیسفادە جە مادەکاو پەروەردەو ڕاوەبەریی وێمانەی بوینا ساڵەی تازێ پەروەردەینە دەسشا بە پەروەردەی کەرد.

سالیبا یەعقوب جە ڕاوەبەراو ئەرەمەرزیاو  سوریانی ئۆلاف تائۆی واتش:" ئۆلاف تائۆ ساڵەو ٢٠١٤یوە ئەرەمەرزیان، چندین هەرمانێش پەی وستەیوەڵێ زوانی سوریانیی کەردێنێ، گەرەکمانە زاڕوەکێما بە زوان و کولتوورو وێساوە گەورێ بانە. ساڵەو ٢٠١٩ مەنجهەجی پەروەردەییما بە زوانی سوریانی ئامادە کەرد. هەروەختێوە پەروەردەو مەنهەجی سوریانی پەنەوازییش بە فاڕیای بۆ مفاڕمێش."