ژماره‌ېۋە جە ڕېکوزیاکا مافو مرۆڤی و پارێزنه‌را جە توركیا و سەرنیشتوو كورڎسانی جە ڕۊو پەشتیوانی کەرڎەی چا كه‌سا کە ئه‌شكه‌نجه مڎریا داواو دمایی ئارڎەی به ئه‌شكه‌نجه‌دای و ئاشكرا کەرڎەی گرڎو گوزارشتەکا سی پی تی کەرا.
ژماره‌ېۋە جە ڕېکوزیاکا مافو مرۆڤی و پارێزنە‌را جە توركیا و سەرنیشتوو كورڎسانی جە ڕۊو پەشتیوانی کەرڎەی چا كە‌سانە کە ئە‌شكه‌نجه مڎریا ، جە شارو ئیزمیری و جە كۆنفرانسېۋە ڕۊنامەوانینە، ئەرەیاۋنېۋە هامبە‌ششا ۋەڵاکەرڎۊ.
لاو ۋېشۊ جۆشكون ئوسته‌رجی، سكرتێرو گرڎی ڕێكوزیاو مافو مرۆڤی جە توركیانە به‌نامۍ ڕێكوزیاکاوە ئەرەیاۋنا هامبه‌شە‌كەش ۋەناوە و ۋاتش: مەبۊ ده‌وڵه‌ت ئە‌شكەنجەی پېسە ئامرازێۋە سەركوتكەرڎەی بەكاربارۊ و پێۋیسا به شێۋېۋە كاریگەر جە تاوانەكا ئەشكەنجە‌دای کۊڵۊۋە و دژ بە سزانه‌ڎای کۊشیای کەرۊ.
ئاماژه‌ش پانەی کەرڎ، توركیا ڕێككۊتننامه‌ش جە دژوو ئه‌شكه‌نجه‌دای ئیمزا کەرڎەن، به‌ڵام به پاو ئا ڕێككۊتننامه‌یه مامە‌ڵه مەکەرۊ و ۋڵات بە تەمامی بیەن بە یاگۍ ئەشكەنجه‌دای.
ئوستەرجی تەئکیدش کەرڎۊ، حیچ ساڵێوە ئنڎەو ساڵەو ٢٠٢٢ خه‌ڵك ئەشکەنجە نەڎریان و خانەواڎەکېشا سەردای ڕېکوزیاو مافو مرۆڤو توركیایشا نەکەرڎەن.
ئوستەرجی ئا پێشنیارۍ کە پەنەوازەن دژوو ئه‌شكه‌نجه‌دای کریا پی جۊرە وستېش ڕووە:
* مەبۊ حیچ ۋه‌رپەرسۍ ستایشو ئەشکەنجەی و ئەشکەنجەکەرا کەرۊ و پیۋیسا پرۆسه‌كه به گوێره‌و میكانیزمه میان نه‌ته‌وه‌یه‌كا بۊ، حەرپاسە ئه‌شكه‌نجه‌دای ۋەروچەما جەهانینە شه‌رمه‌سار کریۊ.
* مشۊم دمایی به سیاسه‌تو نه‌سه‌پناو سزۍ بۍ.
* مشۊم مه‌رجه‌كۍ ئاژەو گېرتەی به بۍ كه‌موكوڵی و به بۍ جیاوازی جابەجۍ کریۊ.
* مشۊم ماوه‌و دەسبەسەربیەی کوڵ کریۊۋە.
* مشۊم زینڎانه‌كۍ ڕۋەو شۊنیرەلۋاو سه‌ربه‌خۊو ڕێكوزیاکا مافو مرۆڤی و یاسایرە کریاۋە.
* پێۋیسا گرڎو گوزارشتەکا سی پی تی ئاشكرا کریا و گرڎو پێشنیاره‌كا جابه‌جۍ کریا.
هـ . ش
