سەفەری یەڵماز: گێرا ئاماڎەکاری پەی تیرۊری کەرا
ئاشکرا بی، کە چەمڎاریی یانەو سەفەری یەڵمازی کریان، کە وەڵتەر کتێبخانەکەش تەقییابێوە، یەڵماز واتش، "گێرا ئاماڎەکاری پەی کرڎەوەی تازەی تیرۊریستی کەرا".
مەنتێقەو شەمزینانوو جۊلەمێرگینە ئاشکرا بی، کە کەسێوە نەشناس جە دەوروبەروو یانەو سەفەری یەڵمازینە ساعیبوو کتێبخانەو ئومێدی، کە وەڵتەرۍ بە بۊمب تەقییابێوە، خەریکوو چەمڎاری و سیخوری بییەن. کامێرەی چەمڎاری یانەو سەفەری یەڵمازی ڕسموو ئا کەسەیشا تۊمار کەرڎەن. یەڵماز ئاماژەش پانەیە کەرد، کە دیمەنەکانە وینیۊ کە ئا کەسە ١٥و ئابینە نزیکوو باخچەو یانەکەیشنە دووۍ جارۍ چەمڎاریی کەرۊ و دمای ئانەیە هەست کەرۊ، کە پەنەش زانیان ور و چاگەیە دوور گنۊوە.
سەفەری یەڵماز بە ئاژانسوو مێزۊپۊتامیایش ئەرەیاونان، نیگەرانا چانەی کە ڕووەداێوە هامشێوەو تەقنایۊ کتێبخانەو ئومێدیش سەرەرە بێوە. واتیچش ئەگەرچی پۊلیسش هاگادار کەرڎەنۊ، وەلۍ پۊلیس نەلۍ شنەو ڕووەداکەی و ئەگەرش هەن، کە ئاماڎەکاری پەی تیرۊرێوە تەری کریۊ.
یەڵماز ئا هجوومشە ویر ئارڎۊ، کە ساڵەو ٢٠٠٥ کریا سەروو کتێبخانەو ئومێدی شەمزیناننە و ئانەیچش وست ڕووە، کە چەنی دیمەنە تۊمارکریایەکاو کامێرەو چەمڎاری لوان داواکاری گرڎینوو و سکاڵاش تۊمارە کەرڎێنە.
س.ز
