پەرلەمانتارو پارتی چەپی سەوزی فەرید شەنیاشار ئەرەیاۋناش، کە ئەگەر جە ١٨و تەمووزیەنە قەرارېۋە داڎپەروەرانە سەرو دۆسیەو کۊکوشی خانەواڎەکەیشا نەڎریۊ، ئێشکگیریی داڎپەروەری بەرانە ئەنقەرە.
پەرلەمانتارو پارتی چەپی سەوزی فەرید شەنیاشار سەبارەڎ بە مامەڵەی هەڕەمەکی قەیومەکا جە پرسوس و دۆسیەو خانەواڎەو شەنیاشاری جە پەرلەمان کۆنفڕاسێۋە ڕۊنامەوانیش ساز کەرڎ.
فەرید شەنیاشار جە کۆنفڕانسە ڕۊنامەوانیەکەنە ۋاتش، قەیومو شارەوانی پرسوسی ئا کارمەنڎېشە بەرکەرڎېنۍ کە سەر پایشا نەبیېنۍ و حەرپاسە فشاریچش وستەن سەرو ڕاوەبەری پەروەردەی و ٢٠ مامۆسېش بە بۍ حیج بەهانېۋە جە هەرمانۍ لادېنۍ.
شەنیاشار ۋیرش وستۊ کە ئاڎو ئەڎاش ماوەو زیاڎ جە دوۋۍ ساڵان بەمەڵامەتو کۊکوشیۋە و بە داواکەرڎەی چەسپناو داڎپەروەری ئینۍ چالاکی ئێشکگیرینە و چالاکیەکەشا ۋەردەواما و ۋاتش، "ئەڎام چەمەڕاو چەسپناو داڎپەروەریینە. جە ١٨و تەمووزینە جە مەلاتیە ئەرەنیشتېۋە سەرو دۆسیەو کۊکوشی نەوەشخانەی ملۊڕاۋە. ئەگەر چا دۆسیەنە قەرارېۋە داڎپەروەرانە نەڎریۊ، من و ئەڎام ئێشکگیرییەکەی بەرمېنە ئەنقەرە".
شەنیاشار ئانەیچش وست ڕووە کە ئەگەر قەرارېۋە داڎپەروەرانە بڎریۊ، ئاڎۍ دمایی بە چالاکیەکەیشا مارا.
هـ . ش
