قەرارا ڕۊو چوارشەممەی ١٣ و ئەیلول و ٢٠٢٣ سەعات٠٢:٣٠ دەیەقۍ دما نیمەڕۊی جە هۊڵ و ئازاڎبیەینە، ۋەران ۋەر بە هۊڵ و خاکی جە سلېمانی سیمینارۍ تایبەت بە"ژەنی، ژیای، ئازاڎیی" بلۊڕاوە.

سیمینارەکە بەدەسوەڵۍ وستەی کژاری و بەبەشڎاری ژەنا پانیشتی و ۋەرکەوتوو کورڎسانی بۊنەو ۋیەرنای یۋەمین ساڵەو سەرهۊردای"ژەنی، ژیای، ئازاڎیی" جە ۋەرکەوتوو کورڎسانی و ئېرانی سازکریۊ و چنەشەنە دەسکۊتەکۍ ژەنا چی سەرهۊرداینە و یۊگېرتەی و یەکڕیزی ژەنا پۍ درېژەدای بە سەرهۊرداکەی شەنو کەو کریا.

جە سیمینارەکېنە حەریۊ جە ڕۊزەرین کەمانگەرە قسەکەرەو کۊمیتەی دیبلۊماسی کژاری، کانی کەرەم پورە، ئەنڎامەو کۊمەڵەی- ڕېکوزیاو کورڎسانی پارتوو کۊمۊنیسی ئېرانی و چیمەن جەوانڕودی-ە، ئەنڎامەو ڕېکوزیاو ئاسۆ و ژەنۍ پانېڵېوە پېشکەش کەرا.

سیمینارەو "ژەنی، ژیای، ئازاڎیی" بە دەسوەڵېوستەی کژاری جە سلېمانی ملۊڕاوە.

ڕۊو ١٦ و ئەیلول و ٢٠٢٢ دماو ئانەی ژینا ئەمینیەکناچە کورڎەو شاروو سەقزی جە شاروو تارانی بە بەهانۍ حیجابیۊ جە تەرەفوو هېزەکا بەنام پۊلیسی ئەخلاقی ئېرانیوە کوشیا، ۋېنیشاندای و ناڕەزایی جە سەرانسەروو ۋەرکەوتوو کورڎسانی و ئېرانینە دەسشپنەکەرڎ، کە بە سەرهۊردای "ژەنی، ژیای، ئازاڎیی" ئشناسیان.

ئا سەرهۊردایە کە بە سەرمەشقی ژەنا و گەنجا بی بە درېژ مەوداتەرین و گۊرەتەرین ناڕەزایی بەربڕیەی جە تاریخوو جمهوری ئېرانینە، تا ئیسەیچ بەشېوېۋە جیاجیا ۋەردەوامیش هەن و جە سەروبەنڎوو ساڵوەگېڵ و سەرهۊرداکەینە ئاماڎەکاری کریۊ، پۍ ئانەی جارېوەتەر گوڕەش پنە بڎریۊوە.