سەرسەعبوو ئارۊی هۊڵوو ئوتێل داواو شاروو سلێمانیینە، جە ٩یەمین ساڵیاڎوو کۊکوشیی شەنگالینە، کۊنفڕانسوو "ژەناو ئایینی و پێکئاما جیاوازەکا، بۊنەو ساڵڕۊو کۊکوشیی شەنگالیوە" بە دروشموو "کۊشیای هامبەشوو ژەناو پێکئاما و باوەڕییەکا، زامنوو دماییئارڎەی کۊکوشییەکان، هەنگامنیای بەرەو بونیاڎنیای سیستمێوە دیموکراتی"، دەسش پەنە کەرد.

ئەوەڵوو کۊنفرانسەکە بە لاونایۊێوە ئەداشەمۍ پەی کۊکوشیی شەنگالی و ژەنە گیریایەکاو دەسوو داعشی دەسش پەنە کەرد.

دماو دەیەقێوە مرڎای پەی گیانی پاکوو گەشمەرڎا، وتاروو دەسپەنەکەرڎەی کۊنفرانسی لاو ڕیهام حەجۊیۊ، قسەکەرەو تەڤگەروو ئازاڎیی ژەنا ئێزدی-تاژێوە پێشکەش کریا و ئاماژەش پانەیە دا، ٩ ساڵۍ ملوو کۊکوشیی ئێزدییەکارە ویەرۊ و تا ئیساتۍ زەخموو ئیزدییەکا ساڕێژ نەبییەن، هەزاران ژەنۍ ئڕفانیێنۍ و کۊکوشی کریێنۍ، ئا هێزۍ شەنگالنە بێنۍ وەڵی کۊکوشییەکەی، شەنگالشا بە تەنیا جیا ئاست، ٣٥٠٠ ژەنۍ کەوتۍ دەسوو داعشی و بازاڕوو کۊیلایەتیینە ورەشیۍ، تا ئیساتێچ ١٣٠٤ ژەنۍ گیریۍ دەسوو داعشینە مەنێنیوە، بەداخۊ لاو عێراقیوە تا ئیساتۍ کۊکوشییەکە لاو حوکمەتوو عێراقیوە بە جینۊساید نەشناسیان و داعش و هامکارەکێش دادگایۍ نەکریێنۍ، ئینەیچە مایۍ شەرمەزاریینە.

درێژەو وتارەکەیشنە، ڕیهام حەجۊ واتش: "وەروو ئانەیە کۊکوشیێوە تەر سەروو ژەناو شەنگالیوە نەگنۊوە، ژەنی دماو ئەمرەکێوە وێشا ڕێک وست و هێزوو پارێزنای جەوهەروو وێشا بە نامۍ هێزەکاو ژەناو شەنگالی-یەژەشەیشا ئەرەمەرزنۍ و چا چوارچوەنە کۊشیۍ، چونکوم بە ئامانجکەرڎەی ژەنا و کۊکوشکەرڎەیشا حەرشۊنێوەنە بۊ یەک چێوا. پانیشتوو کوردستانینە ئەنفال بە هەزاران ژەنێش کۊکوشۍ کەرڎۍ، جگە جە شەنگالی گرڎوو پێکئامایەکا پێسە، کاکەییەکا، زەرڎەشتییەکا و گرڎوو باوەڕییەکای تەری ڕووبەڕووۍ کۊکوشی بیێنێوە، وەروو ئانەیە حیچ ئاین و باوەڕۍ و پێکئامێوە تەر ڕووبەڕووۍ زوڵمی و دلێنەبەرڎەی نەباوە، کۊشیای بنچینەیی بۊ ژیواێوەی ئازاڎی و دیموکراتیکی بۊ بە هەرمانەی وەڵینە و هومێد کەرمۍ ئی کۊنفرانسە بۊ بە ئامیانوو گەشەکەرڎەی کۊشیای ژەنا".

 وتاروو لایەنەکا ونیاوە

درێژەو کۊنفڕانسەکەینە لایەنە بەشداربییەکۍ کۊنفڕانسەکەی وتارشا پێشکەش کەرد، ئادێچ، ئەڤین سوێدە، نوێنەرەو وێڕاوەبەریی سەرنیشت و وەرکەوتوو سووریای پانیشتوو کوردستانینە، شادی سەمەدە، ڕێکوزیاو ژەنە ئازاڎاو کوردستانی، ڕۊزەرین کەمانگەرە، نوێنەرەو گلێرگەو ژەنە ئازاڎاو وەرکەوتوو کوردستانی، نورتەن چەلەبییە، کۊمیتەو ژەناو سەرنیشتوو کوردستانی.

کۊنفڕانسەکە بە دوۍ پانێلۍ بەرڎەوام بۊ

کۊنفڕانسەکە بە دوۍ پانێڵۍ بەرڎەوام بۊ، پانێڵەو یوەمی بە ناموونیشانوو "دەوروو ژەنا دلۍ گەلی و پێکئاما و باوەڕییە دێرینەکانە" کە لاو شەهێن محەمەدێوە  ملۊ ڕاوە و حەریۊ جە سوهام شەنگالیۍ، قسەکەرەو کۊمیتەو پەیوەندییەکاو تاژی، ئەسرا محەمەدە، ڕێکوزیاو کوردی فەیلی پەی مافوو ئینسانی، د. نازدار قودرەتە، چالاکەی کاکەییە، بابەتی تایبەت پێشکەش کەرا.

پانێڵەی دووەمە بە ناموونیشانوو "چەنی ژەنۍ جە بووڵەو وێشا گەلۍ بونیاڎ منیاوە، هەرمانەو ژەنا جە پارێزنای و بونیاڎنیای سیستمێوە دیموکراتیک و هامچەرخینە" لاو ئاوات حیسامەدینۍ، نوێنەرەو زەرڎەشتییەکاوە ملۊ ڕاوە و حەریۊ جە زەینەب مورادۍ، هامسەرۊکەو کەنەکەی، ڤەژین شەنگالییە، ئەندامەو یەکینەکاو ژەناو شەنگالی، فەلەکناس ئوجە، ئەندامەو پەرلەمانوو پارتوو دیموکراتوو گەلا-هەدەپەی، بابەتی تایبەت پێشکەش کەرا.

قەرارا ئاخروو کۊنفرانسەکەیۊ ئەنجامنامەو کۊنفرانسەکەی لاو ئەڤین ئەمینۍ و سوهام شەنگالیێوە بونیۊوە.  
       

س.ز