ژمارێوە جە چالاکا سنەی بەمەڵامەتو رۆو جەهانی وەرەنگاربییۆ تنوتیژی دژو ژەنا سەرو نزرگەو ژەنە گیانبەخشایاوە مەراسیمێوەشا سازکەرد و جەختشا جە یەکڕیزی ریزەکا ژەنا جە دژو چەوەسنایۆ و تنوتیژی کەردۆ.
رۆو یەکشەممەی ژمارێوە جە ژەنە چالاکا کە سەر بە رەوت و لایەنە فکرییە جیاجیاکابینێ سەرو نزرگە و ئا ژەناوە ئاماڎۍ بێنێ کە بەمەڵامەتو تنوتیژی خێزانی و کۆمەڵایەتی و هەرپاسە جە سەرەنجامو تنوتیژی دەسەڵاتیۆ گیانشا جەدەس دابێ.
جە مەراسیمەکەنە ژەنا جە دماو نیایرەو ولا سەرو نزرگەو ئا ژەناوە کە گیانشا بەخشان بە دەیەقێوە بێدەنگی ڕێزشا ۋنەو قوربانیا تنوتیژی گێرت و جەختشا سەرو پەنەوازی بە دمای ئاردەی بە گردو جۆرەکا تنوتیژی دژو ژەنا کەردۆ.
جە ئەرەیاونێوەنە کە جەلایەنو یۆ جە بەشداربیاوە ونریاوە، گرڎو جۆرەکا تنوتیژی دژو ژەنا پێسەو تنوتیژی دۆڵەتی، کۆمەڵایەتی و ئابوری بە تنی شەرمەزارۍ کریێ و جەختش جە پەنەوازی بەکارئاوردەی قوەتو ئیراڎەو ژەنا پەی وەرەنگاربییەیۆ ئا تنوتیژیا کریاوە.
جە ئەرەیاوناکەینە ئامان، "قەبرسانۍ و زینانەکۍ پەڕێنێ چا ژەنە کوردە ئازادیوازا پێسەو لەیلا قاسمۍ، شەهین باوەفا، واڵا کەعبی، سەکینە جانسز، رۆیا عەلیپەنا، لەیلا زانا، زەینەب بایەزیدی، هاجەر سەعیدی، سەکینە پەروانە، ژیلا هوژەبری، ژینا مودرسی، پەخشانە و وەریشە و سەڎان ژەنێ بەتوانێ تەرێ کە سەڕییەیشاوە بەروزی قووڵو سەرکوتکەردەی سیستمێوەن کە هەوڵ مڎۆ دەنگو ژەنا کوردی کپ بکەرۆنە".
ئەرەیاویان، ئێمە ژەناو کوردی پاڵپەشتی بە هوشیاری بەکۆمەڵو وێما، تۆڕەکۍ هامپەشتیما بنیاڎنیان، جە وەراوەرو تنوتیژینە مدرێنمێ و بیێنمێ بە هێزێوە یەکلاکەرەوەو جە جمیەرە کۆمەڵایەتی و سیاسیەکانە.
ئێمە سەلەمنانما کە تەنانەت چێرو سەیەو قورسو تنوتیژینە، متاومێنە گەشە بکەرمێ، مڏرامان ڕێکوزمێ و پەی ئازادی جەنگ بکەرمێ.
ئێمە قەناعەتما چامنەن کە جە هەناوو ئی رەنج و مەینەتینە، متاویۆ جەهانێوە تازە بنیاڎ بنیەیمێ، جەهانێ کە دلێشەنە ژەن بییەی بە ماناو سەرکوت کەردەی نییا، بەڵکم بە ماناو خوڵقنای ژیوای و ئازادیین".
بەشدارا مەراسیمەکەی ئانەشا وست ڕووە کە ژەنی وەرا وەر بە تنوتیژی قوربانییەکا دەسەوسانۍ نیەنێ، بەڵکم هێزۍ کاریگەر و سەرمەشقێنێ پەی فاڕیای و بنیاڎنیای ئاینڎێوە ماڵیایرەی جە تنوتیژی. بە قسێ یۆ جە بەشدارا "ئی مەراسیمە نمایشو یۆگێرتەو ژەنا کوردی بێ، کە سەرەڕاو فەرقو هزری و ئایدۆلۆژیایی، جە بەرەو ئەرەکۆشای وەرا وەر بە تنوتیژی رەگەزی شان بە شانو یۆی مدرێنێوە. ئاماڎەبییەو ئی ژەنا هێماو یەکڕیزی و دەورو ژەنان جە ئەرەکۆشای پەی ئازادی و یەکسانی".
مەراسیمەکە بە واتەیۆ سرودەو "من ژەنینا" و واتەیۆ دروشمۊو "ژەنێ، ژیوای، ئازادی" دمایش ئاما.
