کۊمەڵەو مافوو مرۊڤوو کوردسانی وەڵاش کەرڎۆ، ڕۊو جومعەی ٣١و ئایاری هېزەکاو پاسەوانوو سنووری دەوڵەتوو ئێرانی تەقەشا جە کۊڵبەرېوە کەرد بە نامۍ ڕەحیم ئیبراهیمی و دماتەر تەرمەکەشا وستەن دلۍ ڕووبارێوە.خەڵکوو مەنتیقەکەی دماو ٢٤ سەعاتا گېڵای شۆنەو تەرمەکەیرە تاوانشا تەرموو ئا کۆڵبەرەیە بێزاوە.

ڕەحیم ئیبراهیمی خەڵکوو دەگاو وڵیووی سەردەشتین و تاتەو یەرۍ زاوڵا بېیەن.

جە سەرەتاو ئێساڵیوە لاوکەمیۆ ٣٧ کۊڵبەرۍ و کاسبکارۍ کوردی جە مەنتیقە سنوورییەکا ۋەرکەوتوو کوردسانی گېیانشا جە دەسدان، کە فرەیشا بە تەقەو هېزەکاو دەوڵەتوو ئێرانی کریێنۍ ئامانج. تەنیا جە مانگەی ۋییەرڎێنە ١٠ حاڵەتۍ کوشتەی کۊڵبەرا و کاسبکارا تۆمار کریان، کە گرڎ جە تەرەفوو هېزە سەروازییەکا دەوڵەتوو ئێرانیوە تەقەشا ۋنەکریان.