جە چوارچوەو هەڵمەتەو "ئازاڎی پەی عەبدوڵڵا ئۊجالانی و چارەسەری سیاسی پەی بۊ پەرسەو کوردی" چالاکییەکۍ بەردەوامێنی. یۊ چا چالاکییا شاروو ستراسبورگوو فەڕەنساینە ساز کریا.

یەرەم ڕۊو هەڵمەتەکێنە جمیەروو ژەناو کوردی ئەورووپانە (تەژەکە-ئە) پانێلێوەش سازە کەردە. پانێلەکێنە ناوەندی کولتووریی عەلەوییەکاو ستراسبورگینە لوا ڕاوە و دلێشەنە باسوو پاڕادایموو ڕابەروو گەلوو کوردی عەبدوڵڵا ئۊجالان بارەو ئازاڎیپاڕێزنیی ژەناوە، کریا.

'ژەناو کوردی جە ڕاو پاڕادایموو عەبدوڵڵا ئۊجالانیوە ژیوای تازە بونیاد منیا'

ئەلیف کایا پانێلەکێنە قسێش کەردۍ و واتش، "ڕابەر ئاپۊ وەڵۍ ئانەینە دەس بە کۊشیای کەرۊ واتش،' کوردستان ئینا چێروو کۊلۊنیالیزمی و ئەرەگیرینە، ژەنی کۊیلێنێ' و پێسە  چەنەوینای ڕەخنەگرانەش وست ڕووە".

ئەلیف کایا ئانەش وست ڕووە، کە ئا سەرنجۍ بنەمای تارێخییەو کۊشیایشا دیارییە کەردە و ئانەش وست ڕووە، کە پارادایموو کۊنفیدڕاڵیزمی دیموکراتیکی ئا سەرنجۍ و دەسنیشانکەردەێشە فاڕێنۍ پەی چارەسەری بنچینەیی قۊرتەکاو دنیۍ.

ئەلیف کایا واتیچش، کە ئایدۊلۊژیاو ڕزگاریی ژەنا (ژەنۊلۊژی) بە کۊشیای گەورەو ژەناو کوردی خولقیان.

درێژەنە ئەلیف کایا واتش، کە نەتەوە-دەوڵەت دوژمنوو ژەنان و ئاماژەش کەرد، کە ژەناو کوردی بە کۊشیای وێشا وەرنیشتنە سەروو بنەماو پارادایموو ڕابەروو گەلوو کوردی عەبدوڵڵا ئۊجالانی ژیواێوە تازە بونیاد منیا.

ئەلیفە واتیچش، "تا دمایئاردەی بە گێرتەی و گۊشەگیری سەروو ڕابەر ئاپۊی کۊشیای ئێمە بەردەوام بۊ" و باسوو ئانەیش کەرد، کە ئازاڎیی عەبدوڵڵا ئۊجالانی هەمان وەختنە کرێڵوو چارەسەری سیاسیی پەرسەو کوردین.

'عەبدوڵڵا ئۊجالان مدرامانێوە بێهامتا و ئەفسانەییش دەس پەنە کرد'

لاو وێچشۊ ئەندامەو ئەنجوومەنوو پەیەدەی فازیلە سۊسنە واتش، کە ئا خەڵکوو عەفرینی، کە دەوڵەتوو تورکی گێرتەن واتش، "کوردستان ئینا چێروو ئەرەگیریی چوار نەتەوە دەوڵەتانە". فازیلە سۊسنە باسوو ئانەیش کەرد،"ڕابەر ئاپۊ گەلێوەش قەراخوو دلێنەشیەیۊ وست سەروو پایا، مدرامانی ئەفسانەیی بێهامتاش خولقنا. ڕابەرما پەی گەلەکەیما گیانوو وێش وستەن سەروو دەسا، جە ڕاو پیلانگێڵنیی میاننەتەوەیی و چێروو دەساو دەوڵەتوو تورکینە گیریان".

فازیلە سۊسنە واتش، کە گەلوو کوردی جەنگوو مەنەی و نەمەنەی کەرۊ و واتش، "پێسە ژەناو کوردی تا ئازاڎیی ئێمە مۍ دی، تا ئازاڎیی ڕابەر ئاپۊی دەسەبەر بۊ، درێژە بە کۊشیای مدەیمێ".

پانێلەکۍ بە دروشموو "ژەنی، ژیوای، ئازاڎی" و "بۍ سەرۊکی ژیوای مەبۊ" دماییش ئاما.