سونگوڵ شارکلیە، ئەنڎامەو ئەنجومەنوو ژەنا پارتی دیموکراتیکی گەلان(هەدەپە)ی ئەرەیاۋناش، دماو پڕۊسەو هۊرچنیەی چنی خەڵکی کوۍ بیېنێوە، دماو هۊرگېرتەی ڕەخنەو پېشنیارەکا، پېوەرە کوۍ بیېنێوە بە مەبەسوو شەنو کەو کەرڎەی ئا ڕەخنا گفتووگۊ و کۊنفڕانسشا سازکەرڎ.

سونگوڵە ۋاتیچش،"دماو کۊنفڕانسەکەی کۊنگرە بەسیۊ، جە کۊنفڕانسەکەنە گفتووگۊی جدی  و ڕا چارۍ عالۍ شەن و کەو کریۍ. تاواما قۊرتەکا دەسنیشان کەرمۍ. وەڵۍ گرڎ چېوېنە، کەشېوە پی جۊرە کۊنفرانسەکەنە خوڵقیا، بەڵام ئېمە جە مژاروو فاڕیای بوارە قۊرت دارەکانە کەمو کەسرما هەن، جە ڕوو بە کردارکەرڎەی ئیراڎېوە پەنەوازیۊ لاوازېنمۍ، هیواڎارەنا پۍ چارەسەرکەرڎەو ئا قۊرتا دەسما وستۍ سەر، ئیراڎېوە بەقوەتتەر و جدی تەرما بۊ".

"بەکردەوە ڕەخنە جە جە ۋېما گېرمۍ"

سونگوڵ شارکلیە، ئەنڎامەو ئەنجومەنوو ژەنا پارتی دیموکراتیکی گەلان(هەدەپە)ی ئاماژەش بە ڕخنەکا هاموڵاتیا جە پارتوو چەپی سەوزی کەرڎوو ۋاتش،"ئا ئەنجامۍ هامپەیمانی ڕەنج و ئازاڎیی بە دەسشا ئارڎۍ، ڕەخنەی فرەشا ۋنەگیریا. جە بارەو کاندیدەکاوە ڕەخنېوە فرە بۍ، کە بەتەمەمی ئیراڎەو هەرېمەکەیش نەگېرتەبۍ ۋېش.جە هۊرچنیەو سەرۊک کۊمارینە ڕەخنۍ فرۍ جە پەشتگیری بۍ شەرت و مەرجی جە کڵیچدار ئۊغلوی کریا. دەسنیشان کریا، کە پارتوو چەپی سەوزی بەتەمامی پۍ جەماوەرین،پۍ گەلەکەیما ڕۊشن نەکریانۊ، حەرپۊکەی دەنگېوە فرۍ بە زایە لوۍ. ئی ڕەخنۍ منیچ گېراوە چونکی منیچ بەشڎارەنا. زیاڎ چنیشا گرڎی، قۊرتە پېکئامېکۍ دەسشا وزیا سەروو ڕەخنەشا ۋنەگیریا. بېگوومان ئینۍ گرڎ جە ۊرک شۊپەکانە باسکریۍ. بە پوختی بە کرڎەوە جواب و ڕەخنەکا مڎریۊوە".

"بەڕېکوستەی بیەیما بەقوەت کەرمۍ"  

سونگوڵە تەئکیدش کەرڎۊ، هەم جە ڕېکوستەی ژەنا و هەمیچ جە هەرمان و کاری گرڎینەو پارتەکەینە کەم و کەسریما هەن و ئاماژەش پانەی کەرڎ، جە ماوەکا ئاینڎەینە قۊرتەکا چارەسەرۍ کەرمۍ. ۋاتیچش،"پۍ ئانەی بەقوەتتەرۍ بیمۍ، پەنەوازەن هەرمانەی بەرجەسۍ بەئیراڎەو قەراروو ژەنا ئەنجام بڎەیمۍ. ئېمە هامڕېنمۍ کە ڕېکوزیېوە پەشت حېقم بە قەراروو ژەنا تەنیا چېۋېوەن کە بۊ بە مەڵامەتوو گەشەکەرڎەیما. چونکی ئینە تەنیا چېوا، کە ئېمەو بەڕېکوستەی بیەو ژەنا بەقوەتتەر کەرۊ. جە هەمان وەختەنە باڵادەسی پیایا لاواز کەرۊ . چونکی وەختۍ کاریگەری ژەناو ڕېکوستەی ژەنا کەم بۊوە، ئا وەختە هۊشمەنڎی پۍ باڵا دەسی پیایا دلۍ پارتەکەینە فراوان بۊ، مېڎانەکەما ۋەرتەسک بۊوە،فاڕیۊ پۍ ئا چېوا کە ژەنا جە ئاماڎەبیەیشا دلۍ پارتەکەینە دوور وزاوە. چارەسەر پۍ ئینەیچ ئەرەمەرزناو ڕېکوستەیۍ بەقوەتوو ژەنان".