سوپاو ترکی ئەرەگیری دەگاو ترڤانیشیش بۊمبۋاران کەرڎە
دۊڵەتو ترکی ئەرەگیری بە تۊپەو کاتیۊشۍ، دەگاو ترڤانیشی سەر بە مەتینایش جە پانیشتوو کورڎسانی تۊپۋاران کەرڎە. بە مەڵامەتو هجومەکەیۊ زەرەر بە یانە و باخەکا دەگاگۍ یاۋان.
دۊڵەتو ترکی ئەرەگیری، بە شېۋېوە سیستماتیک تۊپۋاران و دەگایەکا پانیشتوو کورڎسانی کەرۊ.
وەڵۍ نیمەڕۊو ئارۊی، دەگاو ترڤانیشی جە هەرېمو مەتینای جەلایەنو دۊڵەتو ترکی ئەرەگیریۊ بە تۊپەو کاتیۊشۍ بۊمبۋاران کریا. جە هجومەکەنە ڕاسەوخۊ دەگاکۍ کریېنە ئامانج و زەرەر بە یانەو باخەکا دەگېکۍ یاۋان.
ئانەیچ جە وەختېنە، ئەرەگیرەکۍ شەوەو ٢١ و ئابی، دەگاو گوهەرزیشا جە ئامېدی تۊپۋاران کەرڎە.
جە لایۍ تەرۊ ئەرەیاۋیا، پەدەکە چنی دۊڵەتو ترکی ئەرەگیری دەسش تېکەڵ کەرڎەن و ئا دروېچشە ۋەڵاکەرڎۊ کە هجومەکە جەلایەنو پەکەکەیۊ ئەنجامدریان و حۊڵشدا خەڵکی دژوو پەکەکەی هانی بڎۊ.
دۊڵەتو ترکی ئەرەگیری، ڕۊو ٦ و ئابی، ترۊمبېلېوە مەڎەنیش جە دەگاو بڵندباسی سەر بە ناحیەو چەمانکۍ جە هەرېموو گارەی بۊمبۋاران کەرڎوو جە ئاکامەنە کەسېوە مەڎەنی بەنامۍ ئالان ئیسماعیلی گەشمەرڎەبی و کەسېوەتەریچ بەنامۍ هاشم شەکری بەسەختی زامڎاربی.
هـ.ش
