تان و پۊ وېڕاۋەبەریی کۊمەڵایەتیی و ھەنگامۍ کرڎەیۍ پەی ئاۋەڎانکەرڎەو ناوچەو ھۆرامانی و ئەۋەگېڵنای زۋانی ھۆرامی پەی بوارو وانای و ڕاۋەبەریی، کتێبێوەن جە نۋیستەی و ئاماڎەکەرڎەی "ئاکۊ مارانی"ن و بە زنجیرە جە بەشو هەورامی ئاژانسەکەیمان (فوڕات نیوز)ەنە وەڵاو مەکریۆنەوە.

[بەشۍ ھەژڎەھەمە]

ئەر دەگێۋە، شارېۋ ،ناوچېۋ یان ھەرېمېۋ ئاماڎەو پېکئاۋرڎەی وېڕاۋەبەریی کۊمەڵایەتی و یۊگېرتەی و پەشتەۋانیکەرڎەی چە وېڕاۋەبەریی دەگایا و شارا  و ناوچا و ھەرېمەکا تەری نەبۊ، چېش؟

درۊس نېیا و خاس نېیا، بەڵام فرە ئاسایین و مافی ڕەۋاو ئاڎېشا ھەن، سیستەمو وېڕاۋەبەریی دەگێ و ناوچەی و شارەکڵەی و شاری و ھەرېمو وېشا بە ئا جۊرە ڕېکۋزا، کە وېشا وازیارېش ھەنۍ و چنی ۋیرۆکەرڎەی وېشا گونجیۊ و مەیسەر بۊ. کریۊ و مشیۊ بەرڎەۋام چنی ئاڎېشا گفتوگۊ کریۊ و بە پەنەوازیی یۊگیرتەی و خاسیی یۊگېرتەی ئاشنێ کریا. بەڵام ھەرگیز بە چەک و ناچارکەرڎەی و سەپنای نا. ھەر پاسە فرە ئاسایی ھەن، کە دەگێۋە سیستەمېۋی تەر پەی وېش ھۊرۋچنۊ، مشیۊ دەگاکۍ تەرۍ ئا مافەیە بە ئاڎۍ ڕەۋا ۋینا و بژناساش. بەڵام چە بارېۋەنە کە سیستەمو ڕاۋەبەریی دەگێۋۍ بۊ بە مەترسیی پەی سەرو دەگاکا تەری، مشیۊ گفتوگۊ و چارەسەری ئاشتییانە و ئەر ناچارییش بۍ، ۋەرەنگاریی و مڎرامانی کۊمەڵایەتییانە ۋەرانۋەرو ئاڎی کریۊ و خەڵکو ئا دەگێ بە پېچەۋانەو ڕاۋەبەرییەکەیشا، پەی گفتوگۊکەرڎەی و چارەسەرکەرڎەی گرفتەکا بانگەۋاز کریۊ، تاکو ئاشتەوایی کۊمەڵایەتیی مېیانو دەگاکانە دەسەبەر کریۊ.

فرە ئاسایی ھەن، ئەر سیستەمو دەگێۋۍ یان چڼ دەگێۋی پارتییانە (حزبییانە) و فەرماندارییانە (حکومەتییانە) بۊ، بەڵام بە مەرجېۋ کە دژو ئاساییشو وېڕاۋەبەریی کۊمەڵایەتیی ناچەکەی و ھەرېمەکەی نەژڵېۋیۊۋە و پەی ئەرەگېرتەی و پەلاماردای دەگاکا یان ناوچەکا تەری نەکۊشیۊ و مەترسی درۊس نەکەرۊ و بابەڼو ڕېکۊتنامە کۊمەڵایەتییەکا بۊ و با. چۇنکە ئاشتی و پېۋەرە-ژیۋای بە مەنەی و ئاساییشو گرڎ لێۋی خزمەتکەرۊ و ھەر دەگێۋە یان ناوچېۋ پەی زۊری و پەلاماردای پەنابەرۊ، ئاساییشو ئەۋیشا تەری ۋزۊنە مەترسی. چە بارېۋی چامنەنە ۋەرەنگاری کەرڎەی ملھوڕیی لایەنی پەلاماردەری و مڎرامانی کۊمەڵایەتیی دەگایا و ناوچا و شارە ئازاڎ و وېڕاۋەبەرەکا پەنەوازیېۋی ھەردەمیین و نمەکریۊ چەمپۊشیش چنە کریۊ و چە ۋیر بریۊ.

ھەڵبەتە ھەرگیز ئەگەرو ئانەی نېیا، خەڵکو دەگا و ناوچە و شارە ئازاڎ و وېڕاۋەبەرەکا پەلامارو دەگا یان شارە سیستەم پارتیی و فەرماندارییەکا بڎا، چۇنکە جەنگ و ئاژاۋۍ ھیچ کات  و ھیچ یاگېۋەنە بە ئامانجو خەڵکی خزمەت نمەکەرۊ، بەڵام بەپېچەۋانۆ پاسە کە ھیزی و ئارۊ و ئایەندەیچەنە ۋینمۍ، ھەرگیز سیستەمە ڕامیارییەکۍ بەبۍ جەنگ و پەلاماردای و ئاژاۋۍ نمەتاۋا مەنا و وېشا گېرا. چۇنکە پېکئاماو وېشا سەرو زۊرداریی و ملکەچکەرڎەی خەڵکی مەرزیانەرە و بەبۍ زۊر و سەرکوتکەرڎەی و ستەم و ملھوڕیی ئابۇریی و ڕامیاریی ۋەرانۋەرو کۊمەڵەکا تەری، ئەستەما سیستەمە ڕامیارییەکۍ (پارتیی و مېلېشیایی و دۆڵەتییەکۍ) بتاۋا مەناۋە و وېشا پارېزنا، ۋەرو ئانەی تاشای دوژمنی دلېنەیی و بەرەکیی یۊن چە ئا ئەفسۇنە ڕامیارا، کە متاۋۊ خەڵکی پېسەو وەشباۋەڕی و شۊنکۆتەو ڕامیارا بازۊۋە.

---------------------------
پەراۋېزۍ:

* دەنگە تایبەتەکۍ زۋانی هۆرامی، پیتە و نمۇنە:

- ڎ : ئەڎا
- ۋ : ۋاران
- ڼ : مەڼ
- ۊ : لۊ
- ﯗ = وو : (مــﯘ)