جە ١٦و ئەیلولو ٢٠٢٢ۍ جە لایەنو پۆلیسی ئەخلاقی ئێرانیوە کناچە کوردە ژینا ئەمینیە گەشمەرڎۍ کریا. دژو گەشمەرڎەکەرڎەی ژینا ئەمینیۍ گەل جە دەورو فەلسەفەو 'ژەنی، ژیۋای، ئازاڎیی'رە کوۍ بیێوە و مجیێرە مېڎانەکا. سەرەڕاو ئانەی سەرهۊرداو 'ژەنی، ژیۋای، ئازاڎیی' جە جیهانەنە وەڵا بیەنۆ و بەردەواما، جە ۋەرا ۋەرو ئینەیچەنە فشارەکۍ ڕژێمو ئێرانی پەی سەرکوتکەردەی سەرهۊرداکەی جە ڕاو ئەشکەنجە، گێرتەی و جە قەنارەدایۆ بەردەواما.

تەڤگەری ئازاڎی ژەنا ئێزدی (تاژێ) بۆنەو دووەمیین ساڵوەگەڕو سەرهۊرداکەیۆ ئەرەیاۋنێوەش وەڵا کەردۆ و جە کەسایەتی ژینا ئەمینیۍ و شلێر ڕەسوڵیێنە یاڎو قوربانیا سەرهۊرداکەیش کەردۆ و واتش: " دەسەڵاتداری ڕژێمو ئێرانی شەرمەزار مکەرمۍ، کە بە هیچ جۆرێ دڎان بە بیەو و ئیراڎەو ژەنارە نمەنیۆ."

جە بەردەوامی ئەرەیاۋناکەینە ئامان: " سیستەمو پیای-دەوڵەتی جە ئەساسەنە دژمنو ژەنا، گلێرگەی و ژیۋاین. سەرو بنەماو ئا دژمنایەتییە درێژە بە بیەو ۋێش مڎۆ و هەڕەشێنە پەی سەرو گرڎو مرۆڤایەتی. کوشتەی ژینا ئەمینیۍ و چڼین ژەنی تەرۍ دەرەنجامو ئی دەسەڵاتدارییەینە. ئانە دووۍ ساڵۍ سەرو سەرهۊرداکەیرە موییەرۆنە، ڕژێمو ئێرانی جیای ئانەی گۆش بەداواکارییە ڕەواکا ژەنا بڎۆ، کەچی هەزاران کەسێش گێرتۍ و جە قەنارەش دۍ. جە قەنارەدای ژەنا تاوانێوە گۆرۍ ستەمکارانێنە جە دژو بەهاکا مرۆڤایەتی. جە کەسایەتی پەخشانۍ، شەریفەی و بەدەیان ژەنی هامشێوەو ئاڎیشانە مەترسییەکۍ جە قەنارەدای بەردەوامێنۍ. پۊکەی پەنەوازا جە دژو ئی مەترسیا پېسە ژەنا ئەرەکۊشایۍ هامبەش و ڕادیکاڵ ڕاوەبەر بکەرمۍ و دمایی پی ستەمیە بارمۍ."

هەر جە ئەرەیاۋناکەینە تاژێ سەرنج وزۆ سەرو فەلسەفەو ڕابەرو گەلو کورڎی عەبدوڵا ئۆجالانی و ئاماژەش پانەی کەرڎەن کە؛ پېسە ژەنا ئازاڎی ۋێما جە پارادیمەکا پارادایمو نەتەوەی دیموکراتیکینە موینمێوە.

'زهنیەتو کوشتەی ژینا ئەمینیۍ، هەمان زهنیەتو فەرمانەو سەرو گلێرگەو ئێزدینە'

جە درێژەو ئەرەیاۋناکەینە ئاماژە پانەی مکەرۆ ئەرەکۊشای ژەنۍ پەی ئازاڎیی جە تاریخەنە دەورێوە گرنگش هەن و ماچۆ: "ئینایمۍ سەردەمێوەنە کوشتەی ژەنا بە سیستەماتیک کریان. ئا زهنیەتەی کە ژینا ئەمینیەش کوشتە، هەمان ئا زهنیتەنە کە فەرمانەو سەرو گلێرگەو ئێزدیش جابەجۍ کەرد. پۊکەی ئەرەکۊشای هامبەشو ڕادیکاڵی ژەنا جە ۋەرا ۋەرو سیستەمو دەسەڵاتداری پیای-دەوڵەتینە پېسە مافێوە موینمۍ و پەنەوازش بە ڕێکوستەی قەوەتتەری هەن."

جە دما دمایی ئەرەیاۋناکەینە بانگەواز پەی ئەرەکۊشای هامبەشو ژەنا کریان و ماچۆ: "پی ویر و باوەڕدارییۆ داواو قەوەتکەردەی ئەرەکۊشای هامبەشو ژەنا جەهانی بەگرڎی و ژەنا ئێرانی و ۋەرکۊتوو کورڎەسانی بەتایبەتی مکەرمۍ. پېسە ژەنا ئێزدی تا دمایی بە فەلسەفەو 'ژەنۍ، ژیۋای، ئازاڎی'یۆ جە دژو ناحەقی، قڕکەردەی و ستەمی مردمێوە."