سەمپۆزیومو 'بنیاڎنیای ئاینڎەو کشتوکاڵی و وارڎەی' کە پارتو یەکسانی و دیموکراسی گەلا (دەم پارتی) جە چوارچێوەو چەمپنەکۊتەکا "نانی و دادپەروەری"نە دەسشپنەکەرڎەن سازکریا. سەمپۆزیومەکە جە هۆڵو کۆنفرانسو تاهیر ئەلچی سەندیکاو پارێزنەرا وانینە دەسش پنەکەرڎ و پەی ماوەو دووۍ ڕوا بەردەوام مبۆ.

جە سەمپۆزیومەکەنە سەرۆک فراکسیۆنو دەم پارتی سەزای تەمەلی قسېش کەرڎۍ و ئاماژەش پانەیە دا کە جە تورکیانە هەنگامەکۍ کۆڵۆنیالیزمی سەرمایەداری جە کورڎەسانەنە ملۆڕاوە و واتش: "جە کورڎەسانەنە گرڎو وەبەرئاوەرەکا سەرو ویستو بەرئاوەرو سەرمایەداری بەرهەم مەیا. ئابووری کشتوکاڵو کورڎەسانی دلېنە بەرا. ئاکەپە جە گرڎوو پارچەکا کورڎەسانینە و بەتایبەت جە ۋەرنیشتوو کورڎەسانینە سیاسەتەکا کۆڵۆنیالیزمی وەڵا مکەرۆوە. دەسسەرەرەگېرتەی سەرچەمەکا کورڎەسانیچ ئینا چوارچێوەو سیاسەتو کۆڵۆنیالیزمی تورکیاینە. ئینەیچ جە بنەرەتەنە پەی دلېنەبەرڎەی زەمینە کشتوکاڵییەکان و بێ موڵککەرڎەی خەڵکین."

'چارەسەری ئینا پارادایمەکاو عەبدووڵا ئۆجالانینە'

جە قسەکاشانە تەمەلی باسش چا چارەسەرییا کەرڎ کە جە ۋەرا ۋەرو کاولکارییەکا سەرمایەدارینە و ئاماژەش بە پارادایمەکا ڕابەرو گەلوو کورڎی عەبدوڵا ئۆجالانی کەرڎ و پی جۆرە بەردەوام بی جە قسەکاش: " پەنەوازا جە دژوو گرڎو کارەکا سەرمایەداری پێوەرە واچمۍ؛ 'خێرئامای بەڕێز ئۆجالان'. چونکی پارادایمو ۋێڕاوەبەری دیموکراتیکی بەڕێز ئۆجالانی جە دژو گرڎو کاولکارییەکا سەرمایەداری، چارەسەری پەی ژیۋایۍ تازەی مارۆنە ئاراوە. متاومۍ سەرو بنەماو ئی پارادایمەیە سیاسەتە یاگەگیرەکا کشتوکاڵی وەڵۍ وزمۍ، ئابوری کشتوکاڵی ئەرەمەرزنمۍ."