ڕابەرو باڵاو ئاینی ئێرانی، ئایەتوڵا عەلی خامنەیی بە قسێوە هرووژمە ئاسمانییەکې ئەمریکایش پەی سەرو ئەرەمەرزیا ئەتۆمییەکا وڵاتەکەیش گولانە نیشانە دې. دماو ئی قسې خامنەیی، پېسە کاروەدایې دۆناڵد ترەمپ پلانەکېش پەی کەمکەردەیۆ سزاکاو سەرو ئێرانی هۊرشێونێوە.

خامنەیی واتش، جە دژو هرووژمەکا ئەمریکا و ئیسرائیلی پەی سەرو وڵاتەکەیش، ئێران سەرکۊتەیش بەدەسئاوردەن. ئی قسێچە دماو ئانەی مۍ، جە چوارچێوەو جەنگو ئیسرائل-ئێرانینە، بارەگێوە سەروازی ئەمریکای جە قەتەرەنە بی بە یاگې ئامانجو هرووژمە مووشەکییەکا ئێرانی و 'شەپەکانیێوە ۋەرو ڕووەو ئەمریکای کۊت'. خامنەیی ئانەیچش واوەی کەرڎۆ ئێران هیچ وەختې تەسلیمو داواکاریەکا ئەمریکای نمەبۆ.

شۊنەو ئی قسا خامنەیرە، دۆناڵد ترەمپ قسەکې خامنەیش پېسە 'توڕەی و نەفرەت'ی وەسف کەردې و دمایش بە پرۆسەو کەمکەردەیۆ سزاکاو سەرو ئێرانی ئارڎ.

جە کۆنگرێوە ڕۆنامەوانینە کە جە کۆشکەی چەرمێنە ئەنجام دریا، ترەمپ جە جوابو پرسیارەو 'ئەر پەنەواز بکەرۆ، ئەگەرو ئانەی هەن جارێوەتەر ئەرەمەرزیا ئەتۆمییەکې ئێرانی بکریاوە ئامانج' ئینەش وات: "واوەی هرووژمکەردەیۆ سەرو ئێرانی بەدوور نمەزان و یاگې شەرمی نییەنە."

ترەمپ ئاخرو حەفتەی ۋېیەردەی، داواش کەرڎەبې ئا ئەرەمەرزیا ئەتۆمیې ئێرانی کە بۆمبواران کریێنې، جە لایەنو ئاژانسو مېیاننەتەوەیی وزەی ئەتۆمیوە یان جە لایەنو وشکنەرا  لایەنێوە تەریۆ کۆنترۆڵ بکریا.