ئەنجوومەنوو هەرێموو کەرکووکوو تەڤگەروو ئازاڎی ئەرەیاوناێوەش بارەو وێنیشانەدای و تندوتیژییەکاو ڕوای وەڵینوو پارێزگاکەیۊ وەڵا کەرڎۊ، دلێشنە ئاماژەش پانەیە کەرڎەن، ئانە کە كەركووكنە ڕووە مدۊ، ئەگەر زوو وەرش پەنە نەگێریۊ و بەئاشتییانە چارەسەر نەكریۊ، بۊ مایۍ فیتنەی و جەنگی و ئاژاوۍ و ماڵاییۊیرەی تائیفی و نەتەوەیی شۊنەو وێشەرە مارۊ و شارەكەی بەرەو وێرانەیی بەرۊ و چارەسەركەرڎەیش مەحاڵ بۊ.

ئاماژەش پانەیە کەرڎەن، ئێمە پێسە تەڤگەروو ئازاڎی تەسەورما چانەن بە تاكڕەوی و عەسكەرتاریەت و بەسەروازكەرڎەی، نە جە ویەرڎەنە و نە ئیساتێنە و نە ئایندەنە مەتاویۊ كەركووك بریۊ ڕاوە.

ئانەیچش وستەن ڕووە، پەنەما چانەن گونجیاتەرین شێوازوو ڕاوەبەرڎەی پەی كەركووكی و كەركووکییەکا ئانەن، کە وێشا قەراروو ڕاوەبەرڎەیشا بدا، پەنەما چانەن ئەگەر زوو ئی گرژی و ئاڵۊزییۍ نەمرڎیا، ڕا وەشە بۊ پەی ئامایدلۍ دەسوو جبەری.

تەڤگەروو ئازاڎیی ئانەیچش واتەن، ئانە کە ڕووە مدۊ پەشتەو ئی وێنیشانەدایۊ بەشێوەش مەرامی سیاسینوو و حەملەو ئینتیخابیی وەڵێوەختەن، پەی بەدیئارڎەی ئا مەرامە گڵیاوەیچە خەڵكوو كەركووكی و ئاشتی و تەبایی بەینوو نەتەوەكا بۊ بە قوربانی.

ئاخریچۊ ئەرەیاونانشا: داواكارێنمۍ جە سەرجەموو پێكئامایەکاو شاروو كەركووكی بەوریاییوە مامەڵە چەنی دۊخەكەی کەرا ئاشتی و پێوەژیوای کەرا بە بنەماو چارەسەركەرڎەی قۊرتەکاشا تا بتاوا ئا مەرام و پیلاناشا، کە هەنۍ هەیە پێوەرە پوچەڵێشا کەراوە.

س.ز