تەڤگەروو ئازاڎیی گلێرگەو کورڎسانی هجوومەکاو دەوڵەتوو تورکی پەی سەروو خەڵکی مەدەنی و ژیوگەو کورڎسانی شەرمەزار کەرۊ و باسوو ئانەیچ کەرۊ، سەبەبوو زیاتەربییەی ئا هجووما پەی شکستەکاو ئا دەوڵەتە ئەرەگێرەیە کەشەکاو کورڎسانینە گێڵۊوە.
ئەرەیاوناێوەنە دەسەو ژەناو تەڤگەروو ئازاڎیی گلێرگەو کورڎسانی بە ئاماژەدای بە هجوومە عاسمانییەکەو ڕۊو پەنج شەممەی وەڵینوو دەوڵەتوو تورکی ئەرەگیری پەی سەروو سەیارێوە ژەن تیڤی، کە گەشمەرڎۍ و بریندارێش چەنە کەوتێوە ئەرەیاونانش، " ئا تاواناو دەوڵەتوو تورکی کە کەرۊشا، جە دیارڎەیۊ بیێنۍ دایمیۍ، یاوێنی ئاستێوە خۊفناک و ڕاستەوخۊ ژیوای هاموەڵاتە مەدەنییا و ژەنا کەرۊ ئامانج".
ئەرەیاوناکەی فرەبییەی هجوومەکا پەی سەروو کەسە مەدەنییا و ژیوگەو کورڎسانی پەی بۊ شکستەکاو دەوڵەتوو تورکی ئەرەگیری وەراوەروو کوڕا و کناچە کۊشەراو کوردی کەشەکاو کورڎسانینە گێڵناوە، داوایچش کەرڎەن دامودەزگا میاننەتەوەییەکۍ وەراوەروو ئا تاواناوە بێدەنگۍ نەبا و هەڵوێستی تندشا بۊ.
ئەرەیاوناکەینە دەسەو ژەناو تەڤگەروو ئازاڎیی گلێرگەو کورڎسانی تووڕەیی وێشا وەراوەروو خەتەو خیانەتی بەروستە، کە هامکاریی دەوڵەتوو تورکی ئەرەگیری کەرا و واتەنشا: " ئێمە پێسە دەسەو ژەنا تەڤگەروو ئازاڎیی گلێرگەو کورڎسانینە نەعلەتە وەنەو خەتەو خیانەتکارا کەرمۍ، کە بە درێژایی تارێخی هەوڵێشا دێنۍ زەربەی گەورە وەنەو کۊشیای بدا. هەمیشە وابەستۍ ئەرەگیرا و دوژمناو گەلەکەیما بیێنێ".
گردوو ئەرەیاوناکەی ئینەن:
ڕۊو پەنج شەممەی ٢٣-٨-٢٠٢٣ سەعات ٥وو وێرەگای، دەوڵەتوو تورکیای فاشیستی قامشلۊ_عامودانە بە هجوومی عاسمانی (درۊن) سەیارێوەش کەرد ئامانج. کە تایبەت بە دەزگاو میدیایی ژەن تیڤیی بۍ. ئەنجامنە گەشمەرڎۍ و بریندارێش چەنە کەوتێوە.
ئەو تاواناو دەوڵەتوو تورکی مەنتێقەکەنە کەرۊشا جە دیارڎەیۊ بیێنۍ دایمیۍ، یاوێنی ئاستێوە خۊفناک و ڕاستەوخۊ ژیوای هاموەڵاتە مەدەنییا و ژەنا کەرۊ ئامانج. ئانێچ پاشێلکاری و تاوانەکاو دەوڵەتوو تورکی ئەرەگیری مەنتێقەکەنە پەی ڕای گردینی فاڕاوە، کریا ئامانج و گەرەکشانە بێدەنگێشا کەرا، پێویستا دامودەزگا میاننەتەوەییەکۍ بێدەنگۍ نەبا و هەڵوێستی تندشا بۊ.
ئێمە پێسە دەسەو ژەنا جە تەڤگەروو ئازاڎیی گلێرگەو کورڎسانینە نەعلەتە وەنەو خەتەو خیانەتکارا کەرمۍ، کە بە درێژایی تارێخی هەوڵێشا دێنۍ زەربەی گەورە وەنەو کۊشیای بدا. هەمیشە وابەستۍ ئەرەگیرا و دوژمناو گەلەکەیما بیێنۍ. شەرمەزاری پەی دەوڵەتوو تورکیای بۊنەو شکستەکاشۊ وەراوەروو مدرامانوو هامڕایا و و ئازاڎیوازا و کۊشەراوە. پاسەش کەرڎەن، کە هجوومە ئاسمانییەکاش پەی پانیشتی و وەرنیشتی هەستەرۍ کەرۊوە، کەسۍ بۍ وەرگێریۍ و بێتاوانۍ کەرۊ ئامانج و ژیوگەو کورڎسانی دلێنە بەرۊ جە چند ڕۊی وەڵیننە. مەنتێقەو پێنجوێنۍ، خەلەکانی و چەمچەماڵی و دوکانینە خەڵکی بێوەرگێرییش کەرد ئامانج. ئینەیچە پەنەما ماچۊ ئیرادەو گەلەکەیما و کوڕ و کناچە کۊشەرا کەشەکاو کورڎسانینە شکسشا بە دەسەڵاتەکەو ئاکەپەی و مەهەپەی ئارڎەن.
ڕۊحوو گەشمەرڎا شاد و ئارام بۊ
تەڤگەروو ئازاڎیی گلێرگەو کورڎسانی
دەسەو ژەنا
