تەڤگەری ئازاڎیی ئەرەیاۋناش، پۍ واوەی نەبیەیۆ قڕکەردەو هەڵەبجەی داواو یەکڕیزیی کەرمۍ، گەر جە چوارچێوەو سیستموو ۋێڕاوەبەری دیموکراتی و کۊشیایۍ فیکرینە، وەرەنگارۍ دوژمنی نەبیمێوە، ئانەی ئینا وەڵێمانە جە جینوسایدوو هەڵەبجەی فرە خراپتەر بۆ.
جە یاڎوو٣٦ەمین ساڵەو کیمیاۋاران و گەشمەرڎە کەردەی زیاتەر جە پەنج هەزار کەسانە جە خەڵکوو شاروو هەڵەبجەی، دەسەو ڕاوەبەری تەڤگەری ئازاڎیی گلێرگەو کوردسانی، بەیاننامێوەش وەڵا کەردۆ:
"جە وەختێنە، یاڎوو ٣٦ ساڵەو کیمیاۋاران کەردەی شاروو هەڵەبجەی کەرمێوە، تاریخ ۋێش واوەی کەرۆوە. دماو ٣٦ ساڵا جارێوەتەر ئەرەگیری و هجومی کیمیاۋیی و بۆمبی ئەتۆمی تاکیکیی و گرڎ جۆر و چەکێوە قەڎەغە کریای دژ بە گەلوو کوردی بەکار مۍ. تەنیا یاگەکۍ و جیۆگرافیاکۍ فاڕیێنۍ، ئەگەرنا هەر کورد کوشتەی و ئەرەگیری و دلێنەبەردەی ئەرەکۊشا رەواکەش بەردەواما.
عەقڵیەتوو ئەرەگیری و ستەمی جە گەلوو کوردی، هەمان عەقڵیەتا، چ بەعس بۆ یا ئاکەپە، یا هەر سیستمێوە تەروو حکومڕانیی. لاو ئاڎیشاو، ئانە گرنگا کە کوردێوە ئازاڎ و خاوەن ئیراڎە، بیەیش نەبۆ.
دماو ٣٦ ساڵا جە کیمیاۋاران و گەشمەرڎە کەردەی زیاتەر جە پەنج هەزار کوردا بێتاوان و مەردموو شاروو هەڵەبجەی، حەتا ئیسەیچ دەسەڵاڎدارا پانیشتوو کوردسانی، ۋەنێوەشا چا کۆم کوشیی و مەرگەساتەیە هۊرنەگێرتەن. حەرپاسە نەتاوانشا لاو کەمیۆ، دلۍ یانەو کوردیی جە پانیشتوو کوردسانینە ڕێکوزا و یەک هەڵوێسی ۋەرا ۋەر بە دوژمنا، نیشانە بڎا.
رژێموو بەعسی گۆڕ بەگۆڕی، گرڎ جۆرە قڕکەردەیێش بەکار ئارد، پۍ دلێنەبەردەو گەلوو کوردی و ئەرەکۊشا ئازاڎییوازیەکەیش، بەڵام پا ئیرادەیەی ئا وەختە بۍ، نەتاواش بیاوۆ ئەنجام. کەچی ئیسە موینمۍ جە سایەو ئی دەسەڵاتەینە، ئانەیچ کە بۍ جە کۊشیای و قوربانیی دای نزیکەو سەڎ ساڵا، چێوێوە نەمەنەن بەنامۍ ئیرادەی و کۊشیای جە پانیشتوو کوردسانینە. کار یاوان پانەی کە مەترسیی گنۆ سەروو قەوارەو هەرێموو کوردسانی و سیستموو فیدڕاڵیی جە عێراقەنە.
حەرپۊکەی ئەگەر گەلوو کوردی و گلێرگەو پانیشتوو کوردسانی، ۋێشا ڕێک نەوزاوە، جە چوارچێوەو سیستموو ۋێڕاوەبەری دیموکراتی و کۊشیایۍ فیکریی و ڕێکوزیاینە، ۋەرەنگاری نەکەرا، ئانەی ئینا ۋەرمانە جە قڕکەردەی هەڵەبجەی فرە خراپتەر بۆ.
جە دمادمایینە، سەرەو ڕێز و حورمەتی، پۍ گەشمەرڎا قوربانییاو هەڵەبجەی و تەماموو گەشمەرڎا کوردسانی منامنمێرە، داواو خزمەتی زیاتەری پۍ زامڎارا چەکی کیمیاۋیی هەڵەبجەی و تەماموو خەڵکوو شاروو هەڵەبجەی گةسمەرڎەی کەرمۍ و داواو یەکڕیزیی زیاتەری کەرمۍ، بەتایبەت کە موینمۍ دەوڵەتوو ئەرەگیری تورکی، هەڕەشۍ زیاتەرۍ کەرۆ پۍ ئامای دلۍ خاکوو پانیشتوو کوردسانی".
