جمیەرو ژەنا کورڎی جە ئۆروپا (تەژەکە-ئە) جە نامێوەنە کە پەی ئەنداماو ئەنجوومەنو ئۆروپایش کیاستەن، داواش ۋنەکەرڎێنۍ کە جە ۋەرا ۋەر بە گۆشەگیریی سەرو ڕابەرو گەلوو کورڎی عەبدوڵا ئۆجالانی ۋەرپرسیاری ۋێشا جابەجێ بکەرا.
تەژەکە-ئە، وەڵۍ کۊبیەیۆ کۆمیتەو وەزیرا ئەنجومەنو ئۆروپاینە کە قەرارا جە ما بەینو ١٦-١٩و ئەیلولینە بلۆڕاوە، نامێوەش پەی ئەنداما یۆبیەی ئۆروپای کیانان. جە کۊبیەیۆ ئاینڎەینە ئەوەکۊڵیایش ۋنە مکریۆ کە ئایا شەرتەکۍ و قەرارەکۍ پاشێلکاریی دادگاو مافەکا مرۆڤو ئۆروپای جابەجێ مکریا یان نا. هەرپاسە جە گلێرۆبیەکەینە سەبارەت بەڕابەرو گەلوو کورڎی عەبدڵا ئۆجالانی قەرارێوە تاوتوێ مکریۆ.
تەژەکە-ئە، داواش جە وڵاتا و نوێنەرا ئەندامی کەرڎەن کە فشار بوزانە سەرو تورکیای پەی ئانەی ۋەرپەرسی ۋێش بەپاو ڕێککۆتننامەو ئۆروپای پەی مافەکا مرۆڤی جابەجێ بکەرۆ.
ژەنا تەژەکە-ئەی، نامێوەشا پەی گرڎو ئەنداما یۆبیەو ئۆروپای کیاستەن و داواش ۋنەکەرڎێنۍ کە بەپاو شەرتە و یاسا مېیاننەتەوەییەکا ئەرک و ۋەرپرسیاری ۋێشا سەبارەت پا پەرسەیە جابەجێ بکەرا.
جە نامەکەو تەژەکە-ئەینە پەی کۆمیتەو وەزیرا و ئەنداما ئۆروپای چەمەڕاییەکێش پی جۆرە بەربڕیەن:
- پەنەوازا سەبارەت بە ژمارەو ئا کەسا کە تورکیانە سزاو زیڼانی هەتاهەتایشا سەرەرە سەپیان و ژمارەو ئا کەسا کە ساڵانە ئی سزێشا پەی بەرمشۆ، ژمارە و ساڵانێوە کە قەرارەکا پێوەس پینیشا پەشڕاس مکەرۆوە، داواو داتاو ئامارۍ جە دۆڵەتو تورکیای بکریۆ.
- پەنەوازا داوا جە تورکیای بکریۆ پەی ناستەی جیاکەردەیۆ جە پارێزبەندی پەی بەشێوە جە تاوانەکا بە زووتەرین کات فاڕیای بکەرا.
- ئەگەر پەی جابەجێکەرڎەی قەرارو ئۆجالانی(٢)، کایتان، قوربانی و هتد، جە تورکیانە (داواکاری ژمارە ٢٤٠٦٩/٠٣،٢٧٤٢٢/٠٥،٤٩٤٧/٠٤،٣٣٠٥٦/١٦) هەنگامێوە یەکلای کەرەوۍ نەنریا، پەنەوازا سکرتاریەتو کۆمیتەو وەزیرا ڕەشنوویسو قەرارێوە ڕەوای پەی ئەوەکۊڵیای زیاتەری ئاماڎە بکەرۆ.
- پەنەوازا ئەمرە بە سەرۆکایەتی کۆمیتەو وەزیرا یان سکرتێرو گرڎی کۆمیتەو وەزیرا بکریۆ پەی قەوەتکەردەی گفتوگۆی سیاسی چنی قەرارە مېیاننەتەوەییەکا سەبارەت بە جابەجێکەرڎەی قەرارەکا پێوەس بە جاڕنامەو ڕیکژاڤیکی بە نووسیای پەی ۋەرپەرسا دۆڵەتو تورکیای.
جە نامەکەنە پی جۆرە ئەرەیاۋییان: "ئەنداما ئێژاو ئەنجومەنو پەرلەمانو یۆبیەی ئۆروپای و کۆمیتەو وەزیرا، مافو شمەن کۆنتڕۆڵ و چەمڎاری پرۆسەو جابەجێکەرڎەی بکەردۍ. پا مەڵامەتۆ داواتا ۋنە مکەرمۍ کە مافو ۋێتا بە نووسیای و جە ڕاو وستەی ڕوەو پرسیارێوە بەکاربەردۍ و وزدێش بەرنامەو کارو کۆمیتەو وەزیراوە، هەرپاسە پەیوەندی بکەردۍ بە نوێنەرا وڵاتەکاتاوە جە کۆمیتەو وەزیرا و داواکارییەکاما بیاوندۍ و چی بارۆ جە کۆبیەیۆ کۆمیتەو وەزیرانە، پەی جابەجێکەرڎەی ئەرکو ئەوەکۊڵیای بەبێ جیاوازی گندۍ کۆششۆ.
هەرپاسە جە نامەکەنە ئانەیچ ئەرەیاۋییان: "دەورو بەڕێز ئۆجالانی پەی کێشەو کورڎی جە تورکیانە، دیموکراسی و ئاشتی جە هەرێمەکەنە گۆرەن. بەڵام بەمەڵامەتوو گۆشەگیری ڕەهایۆ نمەتاوۆ دەورێوە چامنە بگێڵنۆ. جە هەمان کاتەنە بێجگە جە پاشێلکەرڎەی جددی مافە یاساییەکاش، ناڕەحەتۍ سلامەتی، تەندروسی و ژیۋای بەڕێزیشانمۍ."
