هامسەرۆکەو تەڤ-دەمی، ڕووکەن ئەحمەدە، ئەرەیاۋناش، بە ئاخێزوو ۋەرنیشتی، نەورۆز بیەن بە ڕەنگەو برایەتی گەلا و جە گرڎوو سەرنیشت و ۋەرکەوتوو سوریاینە وەڵا بیەنۆ. ڕووکەن ئەحمەدە واتش: "ئێمە نەورۆزۍ کە جە ۋەرا ۋەروو ستەمینە پیرۆز کریۍ، یاوان بە پیرۆزباییەکا نەورۆزی و شارەکێما پا بۆنۆ ڕازیێنێوەو". جە گرڎ شارێوەنە لافیتەو "نەورۆز پیرۆزبۆ"ی هۊرواسیان. جە نەورۆزی قەڎەغەکریاوە یاوایمۍ بە نەورۆزی ئازاڎ."

ڕووکەن ئەحمەدە پۍ ئاژانسوو هەوالوو فوراتی قسێش کەردۍ و ڕۊشنش کەردۆ کە نەورۆز ڕووێوە تازەن کەسەرهۊردای دژوو تاریکی و دڕندەیی و نادادپەروەری کریان؛ نەورۆز قولەپۊپەو کۊشیای ئازاڎیی، دیموکراسی، داڎپەروەری و یەکسانییا، واتش، نەورۆز بە مدرامان جە زینڎانوو ئامەڎینە ئانڎەی تەر مەعناش بە ۋێشۆ دی. مەزڵوم دۆغان جە ژوورێوە تاکەکەسینە بە یەرۍ دڎنە شقارتۍ جەژنەو نەورۆزیش پیرۆزە کەردە و بە ئێروو جەسڎەیش ئێروو نەورۆزیش گیسناناوە. نەورۆز بە هەڤاڵا پێسە زکییە ئاڵکانۍ و ڕەهشان دەمیرەلۍ و ڕۆناهیۍ و بێریڤانۍ یاوا قولەپۊپە. ئی هەڤاڵۍ بە واتەی 'شمە متاودۍ نەورۆزی قەڎەغە کەردۍ، گۆشەگیری کەردۍ، بەڵام مەتاودۍ ڕا جە ڕۆحوو مدرامانیما گێردۍ'، ئێرشا جە جەسڎەیشا ۋەردا.

ڕووکەن ئەحمەدە یاڎش ئاردۆ کە نەورۆز جە ۋەرکەوتوو کوردسانینە جە هەلومەرجێوە سەختەنە پێسە پانیشتی و سەرنیشتوو کوردسانی ملۊڕاوە و ئاماژەش پانەی کەرد کە بە ئاخێزوو ۋەرنیشتی جە ١٩و تەمووزو ٢٠١٢ ینە نەورۆز فاڕیان پۍ ڕەنگەو برایەتی گەلا و وەڵا بیەنۆ جە سەرانسەروو سەرنیشت و ۋەرکەوتوو سوریاینە.

'نەورۆزوو ئێساڵی پۍ ئازاڎیی جەسڎەیی ڕابەر ئاپۆی ملۆڕاوە'

ڕووکەن ئەحمەدە ئەرەیاۋناش، هەڵمەتەو"ئازاڎیی پۍ عەبدوڵا ئۆجالانی، چارەسەری دیمۆکراتیکی پۍ قۊرتەو کوردی" نەورۆزەنە یاوا قولەپۊپە و ئەرەیاۋناش: "ئێساڵ پۍ ئازاڎیی جەسڎەیی ڕابەر ئاپۆی و چارەسەریی قۊرتەو کوردی پیرۆز کریۆ". ئی هەنگامۍ چنی نەورۆزی میاوۆ بە قولەپۊپە. ئامانجما جە ساڵەو ٢٠٢٤ ینە یاواین بە ئازاڎیی جەسڎەیی ڕابەر ئاپۆی. پارادایموو عەبدوڵا ئۆجالانی گشگیر بیەن و گەلاو جەهانی پەی ئازاڎیی جەسڎەیی ڕابەر ئاپۆی کۊشیانە."

"با مجیەیمێرە مێڎانەکا نەورۆزی"

ڕووکەن ئەحمەدە باسش جە گرنگی بەشداریکەردەی جە نەورۆزەنە کەرد و بە نامۍ "نەورۆز ڕۆو بەرزکەردەیۆ دەنگوو ئازاڎییا؛ دما ڕۆو دمایی گۆشەگیری، ستەمی و دەسەڵاڎداری ستەمکارانەین. پۊکاتی پێویسا گردما پا ڕۆحیانەتۆ مجیەیمێرە مێڎانەکا نەورۆزی. پێویسا دەنگوو ۋێما پۍ ئازاڎیی جەسڎەیی ڕابەر ئاپۆی بڎەیمۍ گۆشۍ گرڎوو دنیێرە."