چن ڕووۍ چېوەڵتەر ساڵیاڎوو ئا ڕیفراندۊمەیە بۍ، کە مەسعود بارزانی سەرۊکوو پەدەکە و ئیسەی و سەرۊکی ماوە سەرشیەو ئا وەختەو هەرېمی تاکلایەنەو بە عینادی و بۍ حساب کەرڎەی پۍ ڕەئیەو حیچ کەسۍ کەرڎش.

جە ششەمین ساڵیاڎوو ڕیفراندۊمینە بەغڎا بە ئەنقەس ئا ڕووەشە هۊرچنی و دماو یەرۍ مانگا بڕۍ زەڕش پۍ مەعاش و فەرمانبەرا هەرېمی کیانا و خەڵکوو کورڎسانیچ چی ڕووەنە بە ڕەخنەگېرتەی جە سەرکردایەتی کورڎی ئی یاڎەشا کەرڎۊ.

هاموڵاتی کورڎسانی ماچا،"ماناو ئانەی نیەنە کە ئېمە دژوو دۊڵەتی و چنی سەربەخۊیی نیەنمۍ، بەڵام ئېمە زانېنمۍ کە مەسعود بارزانی مەبەسش دۊڵەت نیا و پلانەی تەرە ئینا پەشتەو ئی ڕیفراندۊمیۊ".

دکتۊر هونەر حاجی، کە ئا وەختە جەبەرەو نەخېرینە بۍ جە ئیسەنە ماچۊ:"نەخېروو ئېمە ماناو ئانەی نەبۍ، کە ئېمە دژوو دۊڵەتینمۍ، بەڵام ئېمە جە ڕاو دڵسۊزیماوە پۍ نەتەوە و نیشتیمانەکەیما و چېروو چنڎین توېژینەوا زانستینە پەیلوایما چانە بۍ وەختوو ئی ڕیفراندۊمیە نیا، بەڵکم ئی ڕیفراندۊمە بۊ بە بەهانۍ دای دەسۊ پۍ ئانەی دوژمنەکېما هجومما کەرا سەر بەداخیچۊ حەرپاسە بەرشی".

دکتۊر هونەر ئاماژەش پانەیچ کەرڎ"بەپاو ئا توېژینەوا کە ئېمە کەردېبێنێما چا وەختەنە چ جە ڕوو ئابوری، جیۊپۊلۊتیکی و سەروازیۊ وەختوو سەربەخۊی نەبۍ، چونکی ئېمە چواردەورما بە دوژمنا تنیان، بۍ ئانەی سوپېوە یۊگېرتەی نیشتیمانی بۊ، کە تا ئارۊیچ هېزوو پېشمەرگەی یۊش نەگېرتەنۊ، جە ڕوو ئابوریچۊ ئېمە ئابوریۍ عالما نەبۍ، پېسە مۋیندۍ یەرۍ مانگېن خەڵکوو کورڎسانی مەعاششا هۊرنەگېرتەن".

"بارزانی فېڵەش ۋنەکەردیمۍ و ئامانجش ئانەبۍ کەرکوک دەسوو ئېمەنە نەمەنۊ"

ئەنڎامېوە ئەنجوومەن و سەرکردایەتی یۊبیەی نیشتیمانی کە گەرەکش نەبۍ نامېش بریۊ ماچۊ:"ئېمە پېسە یۊبیەی چنی ڕیفراندۊمی نە بېنمۍ بەتایبەتی دماو ئانەی کە ئېرانیەکۍ بڕۍ وەعدېشا پنە دایمۍ پنەشا واتیمۍ ئەگەر ڕیفراندۊمی دما وزدۍ ئاڵاو کورڎسانی جە کەشوو حەمرینی هۊردەیدۍ".

ئەنڎامەکەو سەرکردایەتی یەنەکەی کە جە کۊنگرەو پەنجینە بە سەرکردایەتی هۊرچنیاوە ئاماژەش پانەی کەرڎ،"لۋایمۍ لاو بارزانی و وەعدەکەو ئېرانیما پنە یاونا و نېچیرڤان بارزانیچ پنەش خاس بۍ ڕیفراندۊمەکە دما وزیۊ، بەڵام ئاڎ پنەش واتیمۍ مەسعودش پۍ ڕازی مەبۊ و ئاڎ عیانداو حەرکەرۊش".

کورڎ باجوو عینادی مەسعود بارزانی مڎۊ و مشۊم داڎگای کریۊ"

بەهرۊز حاجی چالاکی مەڎەنی ماچۊ:" بەمەڵامەتوو غەڵەتوو عینادی بارزانی جە ئیسەنە پەنج ملۋېن کوردۍ سزا دریاو ئاورۍ کریا، پۊکەی مشۊم بارزانی داڎگایی کریۊ".

ئاماژەش پانەیچ کەرڎ،"بارزانی ئامانجش سەربەخۊی نەبۍ، بەڵکم ئانەی کەرڎش پلانېوە ئەردۊگانی و تورکیای بۍ بەئامانجوو ئانەی جە ڕاو پەدەکەو بارزانیۊ دەسشا بە نەوتەو غازوو کەرکوکی بیاۋۊ".

"ئانەی کریا غەڵەتېوە فرە گۊرەبۍ"

د. یوسف محەمەڎ، سەرۊکی وەڵین و پەرلەمان و کورڎسانی ماچۊ:"جە تاریخوو گەلانە ڕووەداکۍ کاریگەری گۊرەشا هەن.ڕووەداکۍ هەمیشە بە ڕېژەی جیاوازهۊرگیرۍ مەتەرسی و دەرفەتیچەنۍ. سەرکرڎۍ کارامۍ ئانېنۍ کە نەک تەنیا گەلەکەیشا جە مەتەرسی پېشئاماو ڕووەداکا پارېزنا، بەڵکم تەنانەڎ مەترسیەکا فاڕا پۍ دەرفەتی".

د. یوسف ئاماژەش پانەیچ کەرڎەن،"پۍ نمونەی سەرهۊردای داعشی، جەنگ وکردەوە تیرۊریستیەکېش، مەترسی بۍ پۍ سەروو ئاشتی و ئاسایش و مەنتیقەکەی و جەهانی. بەڵام ئینە ڕاش چانەی نەگېرتە کە جەنگوو دژوو تیرۊری جە لایەن و فرېوە جە دۊڵەتاوە قۊزیۊوە پۍ دەسکۊتی و جابەجېکەرڎەی پڕۊژە ستراتیجیەکاشا، پېسە ڕژېموو بەشار ئەسەدی کە کەرڎش بە دەرفەتۍ پۍ حېقم کەرڎەیۊ کۊڵەکەکا حوکموو ۋېش، یان تورکیا کە کەرڎش بە بەهانۍ هجوم کەرڎەی پۍ سەروو هەرېموو کورڎسانی و سەرنیشتوو ۋەرنیشتوو سوریای، یان ئېران کە جەنگەکەش فاڕا پۍ پتەوکەرڎەی ئانەی پنەش وچیۊ(کەوان و شیع)ەی. ئانە تەنیا کورڎ بۍ کە سەرەڕاو ئانەی جە بەرەکا وەڵېوە جەنگی دژوو تیرۊری بۍ و هەزاران گەشمەرڎۍ و زامڎارېش بەخشۍ، بەڵام نەک بۍ دەسکۊت، بەڵکم بە گېڵایۊ پۍ دمای و لاوازیېوە گۊرۊ چنەش ئاما بەر".

سەرۊکوو پەڕلەمانی جە درېژەو قسەکاشەنە کە جە ششەمین ساڵیاڎوو ڕیفراندۊمینە نۋیستېنېش باسش چانەیچ کەرڎەن،"وەختوو ۋېش فرەما وات ئینەی مەکەرڎۍ غەڵەتۍ فرە گۊرەن، بەڵام ئاڎۍ ئېمە بەبۍ تەجرووبە زانېنۍ و پاسە لەیەکش دېنۍ کە ،،هەڵای ئېمە جە دنیۍ نەیاۋېنمېنە،،! ئەنجامدای ڕیفراندۊمی چا وەختەنە بە پەشتگۊش وستەی ئەرەمەرزیا شەرعیەکا هەرېمی، نەوانایۊ وەزعەو مەنتیقەکەی و جەهانی بۍ. نەوانایۊ جیۊپۊلۊتیک و مەنتیقەکەی و ئاڵۊزی قۊرتەو کورڎی بۍ، تەنانەڎ نەوانایۊ تاریخوو دۊڵەتوو عېراقی و مەڵامەتوو لکنای ۋیلایەتوو موسڵی پا دەوڵەتیۊ و دەوروو کاریگەری حەریۊ جە کارەکتەرەکا وەڵین و ئیسەو ئېراقی بۍ. حەرپۊکەی متاومۍ واچمۍ کە کەرڎەی ڕیفراندۊمی چا وەختەنە ئانڎەی پەرچە کردارۍ شەخسی بۍ پۍ جە دەسداو شەرعیەت و پۊستېوە، ئانڎە پڕۊژېوە نیشتیمانی نەبۍ پۍ وەڵۍ وستەی دۊزوو گەلېوە. ڕەنگە حەر ئینە شرۊڤەو ئانەی کەرۊ کە ئاخۊ پۍچی حیچ دیکۊمېنتێوە قانونی و ڕسمی جە ڕۊنامەو وەقایعی کورڎسانینە سەبارەڎ بە ڕیفراندۊمی بیەیش نیا!؟

ئېساڵ جە ششەمین ساڵیاڎوو ڕیفراندۊمینە جە سنوروو سلېمانینە حیچ یاڎۍ ئا ڕووەیە نەکریاوە و جە هۊلېریچ بارزانی وپەدەکە کەسشا پۍ کۊنەکریاوە. هاموەخت نېچیرڤان بارزانی، سەرۊکوو هەرېمی و مەسرور بارزانیچ حیچشا چا بارۊ نەوات ومەسعود بارزانیچ کە ئیسە تەنیا سەرۊکوو پەدەکەین، تەنیا بەیەک ڕستە جە سۊشیال میدیانە یاڎوو ڕیفراندۊمیش بە سەرکۊتەیۍ تاریخی ئشناسا، بەڵام هامۋڵاتیۍ پەرسا کام سەرکۊتەی؟ئا سەرکۊتەی کە سەڎەنە پەنجاو یەک و خاکوو کورڎسانیش جە دەسدا؟ یان ئا سەرکۊتەی کە یەرۍ مانگېن مەعاشوو فەرمانبەرا نە دریان.